Ang’o Momiyo Piny Opong’ gi Sigu?

Ang’o momiyo pinyni opong’ gi sigu ahinya? Mondo wayud dwoko, dwarore ni wang’e gima sigu en, gimomiyo ji chakoga bedo gi sigu, kod kaka sigu landorega.

Sigu En Ang’o?

Sigu en chayo jomamoko ahinya kata bedo mager kodgi mokalo tong’. En achaya ma dhi nyime kuom kinde malach.

GIMOMIYO JI CHAKOGA BEDO GI SIGU

Nitie gik mang’eny ma miyo ji chakoga bedo gi sigu. Thoth joma nigi sigu gi jowetegi timoga kamano, ok nikech gimoro amora marach ma jowetegigo otimo, to gin gi sigu kodgi nikech kuma jowetegigo ae kata kaka gichal. Ji nenoga joma ocha kaka joma richo ahinya ma nyalo kelo hinyruok, kata ka joma ok nyal lokore ma bed joma beyo. Inyalo nen-gi ka joma nono, kata joma nyalo kelo chandruok ne jomamoko. Nyalo bedo ni joma nigi sigu e chunygi notimnegi gimoro marach kata ma ok kare.

KAKA SIGU LANDOREGA

Ng’ato nyalo bedo gi sigu kata mana gi joma pok noromogago. Kuom ranyisi, ng’ato nyalo chako chayo jomoko mana nikech osiepene kata joodgi ochayo jogo. Omiyo, sigu mochakore gi ng’ato achiel nyalo landore ma mak alwora mangima.

Ng’eyo kaka sigu landore ahinya konyowa neno gimomiyo ji mang’eny nigi sigu. Kata kamano, mondo walo sigu, nyaka wang’e kaka sigu nochakore. Muma konyowa ng’eyo mano.

MUMA NYISOWA KAKA SIGU NOCHAKORE

Alama ariyo ma chalo gi asere lworore. Itiyo kodgi e nyiso kaka sigu landorega. 1. Miriambo ma ji yudo kuom osiepegi kata ogandagi, kuonde mitudruokie gi osiepe e intanet, kod gige fwambo gi keyo. 2. Gik ma ok ging’eyo e wi kaka jomoko nopon, ogendni moko, kod dinde moko. 3. Bedo gi luoro ni jomoko nyalo miyo ngimagi olokre, ginyalo lalo gigegi, kata ok ging’eyo gima nyalo timorenegi. 4. Sigu, moriwo buono ji, achaya, kod timbe gero.

DHANO OK E MA NOCHAKO SIGU. Sigu nochakore ka ne malaika moro ma nodak e polo miluongo ni Satan Jachien nong’anyo ne Nyasaye. Jachien “ne en janek a chakruok” mar ng’anyone. Nikech en “jamiriambo kendo wuon miriambo,” osedhi nyime siayo ji mondo gibed gi sigu kendo gitim timbe gero. (Johana 8:44; 1 Johana 3:11, 12) Muma wacho ni Satan en ng’at ma dwaroga mana hinyo ji, kendo en gi mirima mager.—Ayub 2:7; Fweny 12:9, 12, 17.

YOT AHINYA MONDO DHANO MOREM OCHAK BEDO GI SIGU. Dhano mokwongo ma en Adam, nodonjo e richo mana kaka Satan. Mano nomiyo dhano duto oyudo richo kendo ne gibedo joma orem. (Jo-Rumi 5:12) Wuod Adam mokwongo ma niluongo ni Kain, nonego Habil owadgi nikech sigu. (1 Johana 3:12) En adier ni nitie ji mang’eny ma nyiso hera kendo gikecho jowetegi. Kata kamano, richo ma ne wayudo kuom Adam osemiyo thoth ji obedo joma oherore giwegi, igi lit, kendo gin gi sunga, ma gin kido ma kelo mana sigu.—2 Timotheo 3:1-5.

YOT MONDO JOMA OK RWAK PACH JOWETEGI OBED GI SIGU. Pinyni jiwo ji mondo obed gi timbe ma kelo sigu. Kuom ranyisi, ijiwo ji mondo gitim timbe maricho kar mondo gidewre. Ji ok rwakga pach jowetegi, gibuono ji, giyenyo, gisando jowetegi kendo giketho gige jowetegi. To mago duto timore nikech “piny duto ni e teko mar ng’at marach,” ma en Satan Jachien.—1 Johana 5:19.

Kata kamano, Muma ok nyiswa anyisa kaka sigu nochakore, to onyisowa bende kaka sigu biro rumo.