Ang’o Momiyo Tinde Sigu Ng’eny Ahinya?—Ang’o ma Muma Wacho?

Gige fwambo gi keyo opong’ mana gi weche sigu, mahundu, dhoudi ma kedo, kod lwenje.

• “Nikech ywaruok ma dhi nyime e kind Israel gi Gaza, joma chwalo lwenyno tiyo gi weche mag sigu ahinya kuonde mitudruokie e intanet.”​—The New York Times, Novemba 15, 2023.

• “Chakre Oktoba 7, weche mag sigu kod mahundu osemedore ahinya.”​—Dennis Francis, president mar United Nations General Assembly, Novemba 3, 2023.

Sigu, mahundu, kod lwenje, gin gik mosebedo ka timore. Muma wuoyo kuom joma nodak e kinde machon ma ‘ne bayo weche mager mana ka aserni,’ kendo ma nohero gero kod lweny. (Zaburi 64:3; 120:7; 140:1) Kata kamano, Muma lero gimomiyo sigu ng’eny ahinya e kindegi.

Sigu​—Ranyisi mar kindewagi

Muma nyiso gimomiyo sigu ng’eny ahinya e kindegi.

1. 1. Muma nokoro kinde ma“hera mar ji mang’eny nobed mang’ich.” (Mathayo 24:12) Kar nyiso hera, ji mang’eny ne dhi bedo gi kido ma jiwo mana sigu.​—2 Timotheo 3:1-5.

2. 2. Sigu siko medore e kindegi nikech Satan Jachien ma en ng’at marach e ma chiko pinyni. Muma wacho ni “piny duto ni e teko mar ng’at marach.”​—1 Johana 5:19; Fweny 12:9, 12.

Kata kamano, Muma nyiso ni machiegnini Nyasaye biro tieko gik moko duto ma kelo sigu. E wi mano, obiro golo chandruoge duto ma sigu osekelo. Muma singo niya:

• Nyasaye biro “yweyo pi wengegi duto, mi tho ok nobedie kendo, kata kuyo, kata ywak, kata rem ok nobedie kendo. Gik machon osekadho.”​—Fweny 21:4.