Penjo Moa Kuom Josombwa

Ka po ni Jakristo moro oketho kend gi chiege chuth nikech wach moro ma Muma ok osiro, mi odonjo e kend gi ng’at machielo, ere kaka kanyakla onego one kendne machoncha kod kend manyienno?

Kanyakla biro neno kend machoncha ka kend ma noserumo nikech ng’at ma kamano nodonjo e kend manyien. Bende, kanyakla ok onego one kend manyienno ka kend ma ok owinjore. Mondo wang’e gimomiyo wawacho kamano, we wanon gima Yesu nowacho e wi ng’ama ketho kend chuth mi odonj e kend machielo.

Ka luwore gi Mathayo 19:9, Yesu nowacho gimoro achiel kende ma kotimore, to Ndiko oyie ne ng’ato oketh kend mare chuth. Nowacho kama: “Ng’at ma ketho kend gi chiege mak mana nikech terruok, mi okendo machielo, ochodo.” Weche ma Yesu nowachogo puonjowa gik moko ariyo: (1) Ndiko oyie ne ng’ato ketho kend mare chuth ka po ni nyawadgi oterore, kendo ni (2) dichwo ma ketho kendne nikech weche ma Muma ok osiro kae to okendo dhako machielo, ochodo.a

Be weche ma Yesu nowachogo nyiso ni dichwo moterore nyalo ketho kend gi jaode chuth, mobed thuolo kendore gi dhako machielo ka luwore gi Ndiko? Ok ochuno ni weche obed kamano. Ka dichwo ochodo, jaode ma onge ketho nyalo yiero ka be obiro ng’wono ne chworeno mi odhi nyime dak kode, kata ooyo. Ka dhako otamore ng’wono ne chworeno, mi giyudo barup ketho kend chuth, ng’ato ka ng’ato kuomgi ni thuolo donjo e kend gi ng’ama chielo.

To komachielo, dhako ma onge kethono nyalo yiero ni obiro ng’wono ne chwore mondo girit kend margi. To nade ka dichwono otamore rwako ng’wono ma chiege onyise, kendo odhi nyime mi omanyo barup ketho kend? Nikech chiegeno noyie ng’wonone to en e ma notamore, dichwono ok ni thuolo donjo e kend machielo ka luwore gi Ndiko. Ka po ni dichwono oramo arama ni odwaro ketho kendno, kendo donjo e kend machielo, mano nyiso ni ochodo, kendo mano biro miyo komiti mar ng’ado bura oyale.​—1 Kor. 5:1, 2; 6:9, 10.

Ka dichwo ma Ndiko ok oyiene donjo e kend machielo okendo, kanyakla biro neno nade kendne machoncha kod kendne manyienno? Ka luwore gi Ndiko, be pod inyalo wach ni kendne machoncha dhi nyime? Be pod jaode machoncha nigi thuolo mar yiero ng’wonone mi orwake kendo, kata mar tamore weyone? Be kanyakla biro neno joma ni e kend manyienno ka joma chodo?

Chon, kanyakla ne nenoga joma ni e kend ma kamago kaka joma chodo ka di po ni ng’at ma nokethgo kend ne pod ngima, kata ne pok odonjo e kend machielo, kata ok oterore. Kata kamano, sama Yesu nowuoyo kuom ketho kend chuth kendo donjo e kend machielo, ne ok owuoyo e wi ng’at ma jaode e mochodo. Kar mano, nowacho ni dichwo ma ketho kendne chuth nikech weche ma Ndiko ok osiro, kae to okendo dhako machielo, ochodo. Ketho kend e yo ma kamano, kendo donjo e kend machielo ma Yesu nopimo gi chodo, ne miyo kend mokwongocha rumo.

Ka dichwo oketho kend gi chiege chuth, mi okendo dhako machielo, koro onge kaka chiege ma ne owerego ma ne onge kethono nyalo wacho ni pod en gi thuolo mar ng’wono ne chworeno mondo gichak gidag kendo, kata mar tamore ng’wonone. Kuom mano, chunye ok onego ochande, nikech chwore e motimo yiero ma kamano, to ok en. Bende, bed ni dhako ma ne onge kethocha otho, kata odonjo e kend machielo, kata odonjo e terruok, mano ok bi loko yo ma kanyakla nenogo kend manyienno.b

E ranyisi ma watiyogo malo kanyono, dichwo e ma nochodo kendo mano nomiyo kend margi okethore chuth. To nade ka dichwono ne ok ochodo, to kata kamano ne omanyo barup ketho kend mi okendo dhako machielo? Kata, nade ka po ni dichwono ne oterore bang’ yudo barup ketho kend, mi okendo dhako machielo kata obedo ni chiege to noyie ng’wonone mondo girit kend margi? E wang’ sirkal, kend margino pod owinjore. Gaset mar The Watchtower ma Novemba 15, 1979, ite mar 32, nowacho kama: “Nikech koro osedonjo e kend manyien, dichwono ok nyal dok ne chiege ma noweyocha. Kend machonno norumo ka ne giyudo barup ketho kend, kata ka ne achiel kuomgi oterore kae to okendo kendo.”

Lokruogni ok nyis ni koro waweyo neno kend kaka gima ler, kata ni wambeko chike e weche mag chode. Ka dichwo oketho kend gi chiege nikech wach moro amora ma Ndiko ok osiro, kae to okendo dhako machielo ka pod ok en thuolo donjo e kend ka luwore gi Ndiko, biro dwarore ni komiti mar ng’ado bura oyale nikech ochodo. (Ka po ni chiege manyienno en Jakristo, en bende ibiro yale gi komiti mar ng’ado bura nikech en bende ochodo.) Kata obedo ni joma okendorego ok bi ne ka jochode, dichwono ok bi yudo migawo moro amora makende e kanyakla kuom higni mang’eny, nyaka chop kinde ma joma nong’eyo wachno, kata ma nochwanyore nikech wachno, ochak miye luor kendo. Bende, ka pok jodongo ochako miyo ng’at ma kamano migepe, onego giket e paro kaka chiege ma ne ondhogo winjo kod nyithindo ma nyalo bedo ni nojwang’o.​—Mal. 2:14-16.

Nikech lit mang’eny ma betiega ka ng’ato oketho kend mare ne weche ma Ndiko ok osiro, mi okendo dhako machielo, Jokristo nyisoga rieko kuom bedo gi paro ma chal gi mar Jehova e wach kend.​—Ekl. 5:4, 5; Hib. 13:4.