Penjo Moa Kuom Josombwa

Tiend weche ma Yesu nowacho ni, “Kik upar ni ne abiro kelo kuwe e piny,” gin ang’o?

Yesu ne landoga ote mar kuwe ka ne en e piny kae. Kata kamano, kinde moro nonyiso jootene niya: “Kik upar ni ne abiro kelo kuwe e piny; ne abiro kelo ligangla, to ok kuwe. Nimar ne abiro kelo pogruok e kind ng’ato gi wuon-gi, e kind nyako gi min-gi, kendo e kind chi wuoyi gi min chwore.” (Mat. 10:34, 35) Tiend wechego gin ang’o?

Yesu ne ok dwar pogo ng’ato gi joodgi. Kata kamano, nong’eyo ni puonjge ne dhi kelo pogruok e ute moko. Kuom mano, dwarore ni joma diher bedo jopuonjre Yesu ong’e gima yierogino nyalo kelonegi. Ka po ni ng’ato nyalo yudo akwede kowuok kuom ng’at ma gikendorego ma ok nie yie kata joodgi mamoko, mano nyalo miyo obedne matek makore gi puonj mag Kristo.

Muma jiwo Jokristo ni ‘gitem matek mondo gidag gi kuwe gi ji duto.’ (Rumi 12:18) Kata kamano, puonj mag Yesu nyalo bedo kaka “ligangla” ma chwopo malit ne joot moko. Mano gima jatimorega sama achiel kuom joot luwo puonj mag Yesu, to jomamoko e odgi kwedo puonjgo. E kinde kaka mago, wede ma kwedo adierago bedoga “wasik” ng’at ma puonjore adiera.​—Mat. 10:36.

Jopuonjre Yesu modak e udi ma ji nie gi yie mopogore opogore romoga gi weche moko ma nyalo temo hera ma giherogo Jehova kod Yesu. Kuom ranyisi, wedegigo nyalo temo chunogi mondo gitim nyasi moko ma Muma okwero. Sama giromo gi tem ma kamano, ng’ano ma onego giwinji? Yesu nowacho kama: “Ng’at mohero wuon kata min moloya, ok owinjore koda.” (Mat. 10:37) En adier ni Yesu ne ok wach ni sama ng’ato ochako puonjore adiera to koro hera ma noherogo jonyuolne onego odog chien. Kar mano, notemo mana jiwogi mondo ging’e gik monego giket mokwongo e ngimagi. Sama wedewa ma ok gin Joneno kwedo kinda ma watimo mar lamo Jehova, pod wabiro dhi nyime herogi. Kata kamano, hera ma waherogo Jehova e monego obed mokwongo e ngimawa.

Onge kiawa ni akwede moa kuom joot nyaloga bedo malit ahinya. Kata kamano, jopuonjre Yesu paroga weche ma Yesu nowachogi: “Ng’at ma ok oyie ting’o yadh-sandne kendo luwa ok owinjore koda.” (Mat. 10:38) E yo machielo, wanyalo wacho ni Jokristo nenoga akwede mowuok kuom joodgi kaka achiel kuom sand ma jopuonjre Yesu ne dhi romogo. Gie kindego bende, gigenoga ni timbegi mabeyo nyalo miyo joodgi ma kwedogigo owe kwedogi, kendo gichak puonjore Muma.​—1 Pet. 3:1, 2.