Kaka Inyalo Bedo gi Chuny Mokuwe e Kinde ma Weche Tek

1. “Kuwe mar Nyasaye” en ang’o, to ere kaka kuweno konyowa? (Jo-Filipi 4:6, 7)

NITIE kuwe moro ma jopinyni ok ong’eyo. En “kuwe mar Nyasaye,” tiende ni kuwe ma wabedogo e chunywa nikech wang’eyo ni wan gi winjruok maber gi Wuonwa manie polo. Sama wan gi kuwe mar Nyasaye, onge gima miyowa luoro. (Som Jo-Filipi 4:6, 7.) Wabedo gi osiep motegno e kindwa gi joma ohere. Bende, wabedo gi winjruok machiegni ahinya gi “Nyasach kuwe.” (1 The. 5:23) Ka wang’eyo Wuonwa manie polo e yo maber, wagene, kendo wawinje, mano miyoga kuwe mare dwokonwa parruok chien sama weche tek.

2. Ang’o momiyo wanyalo bedo gadier ni bedo gi kuwe mar Nyasaye en gima nyalore?

² Be en gima nyalore mondo wabed gi kuwe mar Nyasaye e kinde ma weche tek, kuom ranyisi, sama nitie tuo moro momuoch ma landore, masira moro otimore apoya, ng’anyo, kata sand? Weche kaka mago nyalo kelonwa luoro. Kata kamano, Yesu nonyiso jolupne kama: “Kik chunyu chandre kendo kik chunyu nyosre nikech luoro.” (Joh. 14:27) Owetewa gi nyiminewa osebedo ka luwo kaka Yesu nowachono. Jehova osebedo ka konyogi mondo gibed gi chuny mokuwe kata sama gikalo e weche matekgo.

BED GI KUWE SAMA TUO MORO MA LANDORE OMUOCH

3. Ere kaka tuoche ma landore nyalo mayowa kuwe?

³ Tuo ma landore nyalo loko ngima ji apoya. Kuom ranyisi, par ane kaka tuo mar korona noloko ngima ji mang’eny. E nonro moro ma notim, kwan mohingo nus mar joma nowuogo nowacho ni nindo ne ok tergiga maber e kinde ma tuono ne landore ahinya. Tuono nomiyo ji omedo bedo gi kihondko, tuoche mag paro, madho kong’o asasa kod yedhe ma mero ji, lweny mag udi, kod deruok. Ka po ni tuo moro ma landore omuoch e alwora midakie, ang’o minyalo timo mondo kik ibed gi luoro mokalo tong’, to kar mano ibed gi kuwe mar Nyasaye?

4. Ere kaka ng’eyo weche ma Yesu nowacho e wi ndalo mag giko nyalo miyo wabed gi kuwe?

⁴ Yesu nowacho ni e ndalo mag giko, tuoche ma landore ne dhi betie “kamoro bang’ machielo.” (Luka 21:11) Ere kaka ng’eyo wachno nyalo miyo wabed gi kuwe? En nikech ok wahum ahinya sama waneno ka tuoche ma landore omuoch. Wang’eyo ni gik ma Yesu nowacho ni dhi timore e ma timorego. Mano miyo waluwo puonj ma Yesu nochiwo ne ji duto ma ne dhi dak e ndalo mag giko niya: “Kik uluor.”​—Mat. 24:6.

5. (a) Ka luwore gi Jo-Filipi 4:8, 9, en ang’o monego wakwa Jehova e lamo sama tuo moro ma landore omuoch? (b) Ere kaka winjo weche momaki mag Muma nyalo konyi?

⁵ Tuo ma landore nyalo kelo kibaji kod luoro. Mano e gima notimore ne nyaminwa moro ma nyinge Desi.b Ka ne wuon-gi moro, owadgi moro ma bathe, kod laktar ma ne thiedhega otho nikech korona, nobedo maluor ni en be nonyalo yudo tuono momiye min-gi ma koro hike ne ng’eny. Noluor bende ni tuono ne nyalo miyo olal tije, omiyo, nochako parore e wi kaka nodhi yudo chiemo kod pes chulo ot. Parruok ma kamago nochako mone nindo. Kata kamano, bang’e Desi nobedo gi kuwe kendo. Ang’o ma nokonye? Nolemo kokwayo Jehova achiel kachiel mondo okonye bedo gi chuny mokuwe kendo oket pache kuom gik mabeyo. (Som Jo-Filipi 4:8, 9.) Bende, nojawinjo weche momaki mag Muma, to e yo ma kamano, nowinjoga dwond Jehova. Owacho kama: “Dwol mayom mar josomogo nokueyo chunya kendo parona kaka Jehova kecha.”​—Zab. 94:19.

6. Ere kaka puonjruok Muma iwuon kod dhi e chokruoge biro konyi?

⁶ Sama tuo moro ma landore omuoch, mano nyalo chocho dijeni moko, kata kamano, kik iyie ochoch chenroni mar puonjruok Muma iwuon kod mar dhi e chokruoge. Ranyisi mang’eny mag owetewa gi nyiminewa miwuoye e bugewa kod vidiowa moko biro paroni ni Jokristo weteni bende kedo matek ne yiegi kata obedo ni gikalo e weche matek. (1 Pet. 5:9) Chokruoge biro paroni puonj mabeyo manie Muma ma nyalo tego yieni. Bende, chokruoge biro miyi thuolo mar jiwo jomamoko, to gin be gijiwi. (Rumi 1:11, 12) Sama iparo kuom yo ma Jehova osebedo ka sirogo jotichne sama gituo, sama gin gi luoro moko, kata sama giwinjo ni gin kendgi, yieni biro medo bedo motegno, kendo ibiro bedo gadier ni in be onyalo siri.

7. Ranyisi mar jaote Johana nyalo puonji ang’o?

⁷ Tem matek mondo itudri gi Jokristo weteni. Sama tuo moro marach landore, nyalo dwarore ni wabed mabor gi Jokristo wetewa kata mana sama wan kodgi kanyachiel. E seche kaka mago, inyalo winjo e chunyi kaka jaote Johana nowinjo. Nogombo ahinya neno Gayo wang’ gi wang’. (3 Joh. 13, 14) Kata kamano, nofwenyo ni kuom kinde, mano ne ok dhi nyalore. Omiyo, notimo gimoro machielo ma ne nyalo konye. Nondiko ne Gayo barua. Ka ok inyal limo oweteni gi nyimineni, tem goyonegi simu, tudri kodgi e yor vidio, kata iornegi ote moko machuok. Sama itemo matek mondo itudri gi Jokristo weteni, luoro ma in-go biro dok chien, kendo ibiro bedo gi kuwe e chunyi. Sama iwinjo ka in gi kibaji, wuo gi jodong-kanyakla kendo irwak kony ma gimiyi.​—Isa. 32:1, 2.

BED GI KUWE SAMA MASIRA MORO OTIMORE APOYA

8. Ere kaka masira motimore apoya nyalo mayi kuwe?

⁸ Ka po ni isegayudo masira mar ataro, yiengni piny, kata mach, nyaka bed ni nidong’ ka in gi parruok kata mana bang’ ndalo mang’eny. Ka watni moro notho e masirano kata nilalo mwanduni, nyaka bed ni nidong’ kikuyo, ka piny otari, kendo samoro ne in kata gi mirima mang’eny. Mano ok nyis ni ihero mwandu kata ni ionge gi yie. Gima timore en ni nikalo e tembe madongo, kendo jomamoko bende ong’eyo ni gima kamano nyalo miyo iwinj marach. (Ayub 1:11) Kata kamano, e weche matekgo duto, pod inyalo bedo gi kuwe e chunyi. E yo mane?

9. Ere kaka Yesu noikowa ne masiche ma timore apoya?

⁹ Par gik ma Yesu nowacho ni ne dhi timore. Mopogore gi ji mang’eny e pinyni ma paro ni gin masiche ma timore apoya ok nyal yudogi achiel kachiel, wan to wang’eyo ni masiche madongo ne dhi medore, kendo ni ginyalo mulo ngimawa. Yesu nonyiso jolupne ni “yiengni madongo mag piny” kod masiche mamoko ne dhi betie ka giko pok ochopo. (Luka 21:11) Nowacho bende ni ‘timbe maricho ne dhi medore,’ to mano e momiyo sani mahundu, njore, kod timbe gero ng’eny. (Mat. 24:12) Yesu ne ok owacho ni joma Nyasaye ojwang’o e ma ne dhi yudo masichego. Nitie jotich Jehova mang’eny ma bende oseyudo chandruok nikech masichego. (Isa. 57:1; 2 Kor. 11:25) Jehova ok bi geng’onwa masiche duto e yor hono. Kata kamano, obiro miyowa gik moko duto ma dwarore mondo wasik ka wan gi kuwe e chunywa.

10. Ang’o momiyo ikruok ne masiche ma nyalo timore apoya nyiso ni wan gi yie kuom Jehova? (Ngeche 22:3)

¹⁰ Achiel kuom gik ma biro kelonwa yot sama masira moro otimore apoya en ikruok chon. To be ikruok ne masira nyiso ni waonge yie kuom Jehova? Ooyo. Kuom adier, ikruok ne masira nyiso ni wan gi yie ni Jehova biro ritowa. E yo mane? Wach Nyasaye nyisowa ni waikrega ne masiche ma nyalo timore apoya. (Som Ngeche 22:3.) Bende, kokalo kuom gasedewa, chokruogewa mag kanyakla, kod lendo mimiyowaga, riwruok mar oganda Jehova osebedo ka jiwowa ni waikre ne masiche ma nyalo timore apoya.c Be wan gi yie kuom Jehova? Ka en kamano, wabiro luwo puonj mimiyowago sani ka pok masira otimore.

11. Ranyisi mar Margaret puonji ang’o?

¹¹ Ne ane ranyisi mar nyaminwa moro ma nyinge Margaret. Sirkal nonyise ni odar owuog e ode nikech mach ne dhi muoch e bunge manie alwora modakie. Nikech ji mang’eny ne ringo riat mondo gitony, jam mapek nobet e ndara. Iro ma rateng’ ti nopong’o koro lwasi, kendo mano nochuno Margaret mondo kik wuog e mtoke kuom seche moko. Kata kamano, ikruok maber ma notimo nomiyo otony. E kibetine, ne en gi map ma ne nyalo konye chopo kuma nodhiye. Ka ne pok masirano otimore, nosegariembo e ndarano, omiyo, ne yotne ng’eyo kuonde ma nonyalo luwo ka masira otimore. Ikruok maber kamano nokonye.

12. Ang’o momiyo waluwoga weche minyisowa ma nyalo reso ngimawa sama masira otimore?

¹² Sama nitie masira moro, sirkal nyalo dwaro ni kik wawuog e ot, wadar, kata wakaw okenge moko sie ma nyalo reso ngimawa. Nitie jomoko ma gidigniga kawo okang’ nikech giluor ni ginyalo lalo mwandugi. Jokristo madier to timoga nang’o? Muma nyisowa kama: “Nikech Ruoth, bolreuru ne jotelo moketi. Bed ni en ruoth ma nigi teko e wi ji duto kata en gavana ma ruodhno ooro.” (1 Pet. 2:13, 14) Riwruok mar oganda Jehova bende nyisowaga weche moko ma ka watimo to nyalo reso ngimawa. Kuom ranyisi, ojaparnwaga ni wanyis jodongo yore ma ginyalo tudorego kodwa sama masira otimore. Be isetimo kamano? Seche moko inyalo nyiswa ni kik wawuog e ot kuom kinde, wadar waa e alwora moro, kata wabed gi chiemo moko ma ok kethre piyo ma nyalo konyowa kuom kinde. Bende, inyalo nyiswa kaka wanyalo konyo jowetewa kod sama onego wakonygie. Ka ok waluwo kaka ichikowa, wanyalo keto ngimawa wawegi kama rach, kaachiel gi ngima jodongo. Ng’e ni owetego temo mana ritowa. (Hib. 13:17) Margaret nowacho kama: “An gadier chuth ni luwo kaka jodong-kanyakla kod riwruok mar oganda Jehova tayowa e ma noreso ngimana.”

13. Ang’o mosekonyo Jokristo ma masiche odaro e miechgi mondo gibed gi kuwe kod mor e chunygi?

¹³ Owete gi nyimine moko ma masiche, lwenje, kata ng’anyo osemiyo gidar, osetemo matek ma ging’iyo gi ngimagi manyien kendo dok e chenrogi mag lamo. Mana kaka Jokristo mokwongo ma nokere e alwora mopogore opogore nikech sand, gidhi nyime ‘lando wach maber mar Nyasaye.’ (Tich 8:4) Lendo konyogi keto pachgi kuom Pinyruoth kar keto pachgi kuom pek ma gikaloe. Mano miyo gisiko ka gin gi mor kod kuwe e chunygi.

BED GI KUWE SAMA ISANDOWA

14. Ere kaka sand nyalo mayowa kuwe?

¹⁴ Sand nyalo mayowa gik mang’eny ma kelonwaga kuwe. Wamorga ahinya sama wanyalo chokore kanyachiel ka wan thuolo, walendo ayanga, kata sama watimo dijewa ma pile ma ok waluor ni inyalo makwa. Sama omawa thuolo ma kamago, wanyalo chako bedo gi parruok nikech ok wang’eyo gima nyalo timorenwa bang’e. Winjo kamano e chunywa ok rach. Kata kamano, dwarore ni watang’. Yesu nowacho ni sand ne nyalo miyo jolupne ochwanyre. (Joh. 16:1, 2) Omiyo, ang’o ma wanyalo timo mondo wasik ka wan gi kuwe e chunywa sama isandowa?

15. Ang’o momiyo ok onego waluor sand? (Johana 15:20; 16:33)

¹⁵ Wach Nyasaye wacho niya: “Ji duto ma dwaro chiwore chuth ne Nyasaye gi ngimagi ka gin e winjruok achiel gi Kristo Yesu, bende ibiro sand.” (2 Tim. 3:12) Ka nogo tijwa marfuk e piny ma owadwa moro miluongo ni Andrei ne nitie, ne tekne ahinya yie ni ne idhi sand jotich Jehova duto. Nowacho e chunye ni: ‘Joneno mag Jehova ng’eny e pinywa kae ahinya. Be nyalore adier mondo gimak ng’ato ka ng’ato kuomwa?’ Paro ma kamano ne ok okelo ne Andrei kuwe e chunye, to kar mano, nomedo mana bedo gi kibaji. Owete mamoko to noweyo aweya weche e lwet Jehova ma ok gitemo paro kata matin ni samoro gin ne ok nyal makgi. Ne ging’eyo ni mak to ne inyalo makgi, en mana ni ne ok gin gi parruok kaka Andrei. Omiyo, Andrei bende nochako bedo gi paro kaka mar owete mamokogo, kendo weyo weche duto e lwet Jehova. Mapiyo nono, nochako bedo gi kuwe e chunye kendo sani omor kata obedo ni pekgo to pok orumo. Wan bende wanyalo bedo gi kuwe ma kamano. Kata obedo ni Yesu nowacho ni ne idhi sandwa, nowacho bende ni wanyalo nano e sand ka wan gi kuwe.​—Som Johana 15:20; 16:33.

16. Gin weche mage monego waluw sama isandowa?

¹⁶ Sama ogo tijwa marfuk kata sirkal oketo chike moko ma monowa lamo ka wan thuolo, wanyalo yudo weche moko ma tayowa kowuok e bad ofis kata kuom jodong-kanyakla. Wechego imiyowa mondo one ni oritwa maber, wayudo chiemb chuny moromo, kendo wadhi nyime yalo wach maber e okang’ ma nyalore. Tim duto minyalo mondo iluw kaka ichikowa, kata ka seche moko ok ing’eyo maber gimomiyo inyisowa ni watim gimoro e yo moro. (Jak. 3:17) Bende, kik iel weche mag owetewa kata mag kanyakla ne joma onge gi ratiro mar ng’eyo wechego.​—Ekl. 3:7.

17. Mana kaka joote e kinde Jokristo mokwongo, ang’o ma wang’ado e chunywa ni wabiro timo?

¹⁷ Achiel kuom weche madongo momiyo Satan kedo gi jo Nyasaye en nikech gitiyo “tij chiwo neno e wi Yesu.” (Fwe. 12:17) Kik iyie mondo Satan gi pinyeni omiyi luoro. Ng’e ni tij yalo kod puonjo miyowa mor kod kuwe. E kinde Jokristo mokwongo, ka ne Jo-Yahudi ogolo chik ni joote kik yal wach maber, ne giwacho ni ne gidhi mana winjo Nyasaye kende. Ne gidhi nyime gi tij lendo kendo mano momiyo gibedo mamor ahinya. (Tich 5:27-29, 41, 42) En adier ni sama ogo tijwa marfuk kata nitie chike moko ma monowa lamo Jehova ka wan thuolo, nyaka wabed motang’ ahinya sama walendo. (Mat. 10:16) To ka watimo duto ma wanyalo, wabiro bedo gi kuwe e chunywa nikech wang’eyo ni wamoro Jehova kendo wanyiso ji wach maber ma nyalo reso ngimagi.

“NYASACH KUWE NOBED KODU”

18. En ng’a kende ma nyalo miyowa kuwe madier?

¹⁸ Bed gadier chuth ni kata sama wakalo e weche matek, pod wanyalo dhi nyime bedo gi kuwe. E seche kaka mago, onego wapar kinde duto ni kuwe ma wadwaro en kuwe mar Nyasaye, tiende ni kuwe ma Jehova kende e ma chiwo. Gen kuome chuth sama tuo moro ma landore omuoch, sama masira moro otimore apoya, kata sama isandowa. Makri motegno gi riwruok mar ogandane. Ket pachi kuom ngima maber ma biro. Sama itimo kamano, ‘Nyasach kuwe nobed kodi.’ (Fil. 4:9) E sula ma luwo, wabiro nono yore ma wanyalo konyogo Jokristo wetewa ma kalo e masira mondo gisik ka gin gi kuwe mar Nyasaye.