“Sikuru ka Urito Pachu, Kendo Nenuru!”

1. En ang’o ma Yesu nonyiso jopuonjrene e wi giko, to nonyisogi ni gitim ang’o?

KODONG’ ndalo matin to Yesu tho, jopuonjrene moko ang’wen nopenje niya: “En ranyisi mane ma biro nyiso ni . . . giko mar ndalo okayo machiegni?” (Mat. 24:3) Nenore ni jopuonjrene ne dwaro ng’eyo gima ne dhi konyogi fwenyo kinde ma ne idhi kethie Jerusalem kod hekalu. Yesu ne ok owuoyo kodgi mana e wi kethruok mar Jerusalem kod hekalu, to nowuoyo kodgi bende e wi “giko mar ndalo” ma gin kinde ma wadakiegi. Ka ne Yesu wuoyo e wi giko, nowacho kama: “Kuom wach chieng’no kata sano, onge ng’at mong’eyo, kata malaike manie polo, kata Wuod Nyasaye, to mana Wuora.” Kae to nonyiso jopuonjrene duto niya: “Sikuru ka utang’” kendo ni “sikuru ka uneno.”​—Mar. 13:32-37.

2. Ang’o momiyo ne dwarore ni Jo-Yahudi ma nodak Jerusalem osik ka gineno?

² Jokristo ma Jo-Yahudi ne nyaka sik ka gineno nikech mano ne dhi miyo gires ngimagi. Yesu nonyiso jopuonjrene ranyisi ma ne dhi konyogi fwenyo ni ne ochiegni keth Jerusalem kod hekalu. Nonyisogi niya: “Ka uneno jolweny ka ogoyo kambi kendo gilworo Jerusalem, eka ng’euru ni kethruok mare osekayo machiegni.” Mago e kinde ma nonego gitim gima Yesu nowachonegi ni, ‘giring ka gidhi e gode.’ (Luka 21:20, 21) Joma noluwo chikno notony ka ne Jo-Rumi omonjo Jerusalem.

3. Ang’o ma wabiro nono e sulani?

³ E kindegi, wadak e giko mar ndalo mag giko. Omiyo, wan bende dwarore ni wasik ka watang’ kendo wasik ka waneno. E sulani, wabiro nono kaka wanyalo siko ka warito pachwa sama waneno ka gik ma nokor chopo, kaka wanyalo siko ka watang’, kod kaka wanyalo tiyo maber gi thuolo modong’ ka pok oketh pinyni.

RIT PACHI SAMA INENO KA GIK MA NOKOR CHOPO

4. Ang’o momiyo wagomboga ng’eyo kaka gik ma timore e piny chopo weche ma nokor e Muma?

⁴ Nitie gik momiyo wagomboga neno kaka gik ma nokor e Muma chopo e kindegi. Kuom ranyisi, Yesu nonyisowa gik ma ne dhi timore ma ne dhi konyowa ng’eyo ni giko mar piny Satanni okayo machiegni. (Mat. 24:3-14) Jaote Petro nojiwowa ni waket pachwa ahinya kuom weche ma nokor mondo yiewa osik kotegno. (2 Pet. 1:19-21) Buk mogik mar Muma chako gi wechegi: “Mae en fweny mar Yesu Kristo ma Nyasaye nomiye mondo onyis wasumbnine gik ma nyaka timre e kinde mokayo machiegni.” (Fwe. 1:1) Omiyo, wagomboga ahinya ng’eyo kaka gik ma timore e piny e kindegi chopo weche ma nokor e Muma. Bende, wanyalo bedo gi siso mar wuoyo gi jowetewa e wi gik ma timorego.

5. En ang’o monego watang’go, to ang’o monego watim? (Ne pichni bende.)

⁵ Sama wanono weche ma nokor e Muma, ok onego wachak pong’o gi wiwa kaka gichopoga. Nikech ang’o? En nikech ok wadwar wacho gimoro amora ma nyalo ketho kuwe mar kanyakla. Kuom ranyisi, wanyalo winjo ka jotelo mag pinyni wacho kaka gidwaro tieko chandruok moro mondo ji odag gi kuwe kendo gibed gi ngima maber. Kar chako paro ni wechego nyalo bedo ni chopo weche ma nokor e 1 Jo-Thesalonika 5:3, dwarore ni wadhi riat gi yo manyien mileronwago kaka weche mokor chopo. Ka watimo nonro ka watiyo gi buge ma riwruok mar oganda Jehova omiyowa, wakonyo kanyakla mondo osik ka nigi “paro kod dwaro achiel.”​—1 Kor. 1:10; 4:6.

6. Gin puonj mage ma wayudo e 2 Petro 3:11-13?

⁶ Som 2 Petro 3:11-13. Jaote Petro nokonyowa bedo gi paro mowinjore sama wanono wach moro ma nokor e Muma. Nojiwowa ni ‘waket pachwa kuom kinde ma biro yudo ka koro odiechieng Jehova nitie.’ Nikech ang’o? Ok watim kamano mana nikech dwaher ng’eyo ‘odiechieng’ kod sa’ ma Jehova biro keloe Har-Magedon, to watimo kamano nikech dwaher tiyo gi thuolo ma wadong’go e ‘timo timbe maler kod timbe ma nyiso ni waluoro Nyasaye.’ (Mat. 24:36; Luka 12:40) E yo machielo, dwaher siko ka wan gi timbe makare kendo neno ni kinda ma watimo e tij Jehova nyiso okang’ ma waherego. Mondo watim kamano, nyaka wasik ka watang’ kendo warit pachwa.

TIEND BEDO MOTANG’ EN ANG’O?

7. Ere kaka wanyisoga ni watang’? (Luka 21:34)

⁷ Yesu nonyiso jopuonjrene ni gibed motang’. Siem ma Yesu nomiyogino yudore e Luka 21:34. (Som.) Yesu nowacho kama: “Tang’uru ahinya.” Ng’at motang’ en ng’at moritore ne gimoro amora ma nyalo ketho winjruokne gi Jehova kendo otemoga matek mondo okwed gik ma kamago. Kuom timo kamano, oritore e hera mar Nyasaye.​—Nge. 22:3; Juda 20, 21.

8. En jip mane ma jaote Paulo nomiyo Jokristo?

⁸ Jaote Paulo nojiwo Jokristo ni gibed motang’. Kuom ranyisi, nonyiso Jokristo ma ne ni Efeso niya: “Beduru motang’ ahinya mondo kik uwuoth ka jo ma onge rieko, to uwuoth ka jo mariek.” (Efe. 5:15, 16) Kinde duto, gik ma nyalo ketho winjruokwa gi Nyasaye olworowa koni gi koni. Mano e momiyo Muma nyisowa ni ‘wadhi nyime yango dwach Jehova’ ka wadwaro kedo maber gi gik ma kamago.​—Efe. 5:17.

9. Ere kaka wanyalo yango dwach Jehova?

⁹ Muma ok nyiswaga gik moko duto ma nyalo ketho winjruokwa gi Jehova. Kinde ka kinde, nyalo dwarore ni watim yiero moko ma Muma ok wuoye achiel kachiel. Mondo watim yiero mabeyo kendo ma nyiso rieko, dwarore ni ‘wayang dwach Jehova.’ Wanyalo timo mano kuom puonjruok Wach Nyasaye ma ok wabare kendo paro matut kuom gik ma wapuonjore. Kaka wamedo yango dwach Jehova, kendo temo bedo gi “pach Kristo,” e kaka wabiro medo wuotho ka joma riek kata sama onge chike sie ma nyisowa gima onego watim. (1 Kor. 2:14-16) Nitie gik ma nyalo ketho winjruokwa gi Jehova ma wanyalo fwenyo mayot, moko to ok yotga fwenyo.

10. Moko kuom gik ma nyaka watang’go gin mage?

¹⁰ Moko kuom gik ma nyaka watang’go oriwo mila mag kisera gi ng’at ma ok wakendorego, madho kong’o mokalo tong’, chiemo mokalo tong’, wacho weche ma chwoyo jomamoko, kaachiel gi neno programbe ma nyiso timbe gero, ponografi, kod gik ma kamago. (Zab. 101:3) Jachien ma en jasikwa manyoga thuolo moro amora mondo omi waketh winjruokwa gi Jehova. (1 Pet. 5:8) Ka ok watang’, Satan nyalo pidho kido maricho e chunywa kata e pachwa. Kidogo gin kaka nyiego, miriambo, ich-lach, sigu, wich-teko, kod sadha. (Gal. 5:19-21) Mokwongo okwongo, kido marichogo samoro ok nyal chikowa, kata kamano, ka ok wagologi mapiyo ginyalo dongo ma gibed kaka buya ma nigi sum, mi gikone girwakwa e chandruok.​—Jak. 1:14, 15.

11. Achiel kuom gik ma ok yot fwenyo ma nyaka watang’go en mane, to nikech ang’o?

¹¹ Achiel kuom gik ma ok yot fwenyo ma nyaka watang’go en mako osiep gi joma richo. Par ane ranyisini: Wawach ni itiyo gi ng’at moro ma ok en Janeno wadu. Diher ni ng’atno one kido mabeyo ma Joneno mag Jehova nigo, kuom mano itemo bedo mang’won kode. Kinde ka kinde, samoro idhiga lanj kode. Chopo kama koro ichako dhi kode lanj nyading’eny. Mosmos, mbaka mochido ma ne ok igoga chon e ma koro ugoyo kode. Ichako ng’iyo gi mbaka mochidogo ma chop kama ok ine rachgi. Kae to chieng’ moro, ng’atno gweli mondo udhi umeth kode bang’ tich, kendo iyie gi wachno. Gikone, chopo kama ichako yie gi thoth gik mowacho. Iparo ni biro kawo kinde marom nade ka pok ichako timo gik motimoga? En adier ni wadwaro bedo mang’won kendo miyo ji duto luor, kata kamano, nyaka wapar ni timbe joma wan-go machiegni ahinya nyalo chikowa. (1 Kor. 15:33) Ka wabedo motang’ kendo waritore kaka Yesu nochikowa, ok wabi mako osiep ma ok ochuno gi joma ok luw chike Jehova. (2 Kor. 6:15) Wabiro neno rach ma nyalo betie kendo pondo.

TI MABER GI THUOLO MA IN-GO

12. En tich mane ma jopuonjre Yesu nonego otim sama girito giko mar ndalo?

¹² Jopuonjre Yesu ne ok onego obed abeda ka girito giko mar ndalo. Yesu nomiyogi tich ma nonego gitim. Nonyisogi ni gidhi giyal wach maber “e Jerusalem, kod Judea duto, gi Samaria, nyaka kuonde maboyo mogik e tung’ piny.” (Tich 1:6-8) To mano doko migawo maduong’ ma Yesu nomiyo jolupne! Ne ginyiso ni gitiyo gi thuologi e yo maber kuom timo duto ma ne ginyalo e chopo migawono.

13. Ang’o momiyo dwarore ni wati maber gi kinde ma wan-go? (Jo-Kolosai 4:5)

¹³ Som Jo-Kolosai 4:5. Mondo wanyis ni watang’, dwarore ni wanon kaka watiyo gi thuolowa. ‘Weche ma timore apoya’ nyalo yudo ng’ato ang’ata. (Ekl. 9:11) Wanyalo tho sa asaya.

14-15. Ere kaka wanyalo tiyo maber gi thuolo ma wan-go? (Jo-Hibrania 6:11, 12) (Ne picha bende.)

¹⁴ Wanyalo tiyo maber gi thuolo ma wan-go e timo dwach Jehova kendo tego winjruokwa kode. (Joh. 14:21) Dwarore ni ‘wachung’ motegno ma ok wayiengni, ka kinde duto wabedo modich e tij Ruoth.’ (1 Kor. 15:58) Kae to ka giko ochopo​—bed ni en giko mar ngimawa kata giko mar piny marachni​—ok wabi ywago ang’e.​—Mat. 24:13; Rumi 14:8.

¹⁵ E kindegi, Yesu pod dhi nyime tayo jopuonjrene mondo giland Pinyruodh Nyasaye e piny mangima. Osebedo kotimo mana kaka nosingo. Kokalo kuom riwruok mar oganda Jehova, Yesu osebedo ka tiegowa kaka onego waland wach maber, kendo osemiyowa nyaka gige tich ma konyowa e tijno. (Mat. 28:18-20) Wan bende watimo karwa kuom bedo jokinda e tij lendo kod puonjo ji, kendo siko ka waneno sama warito kinde ma Jehova biro kethoe piny marachni. Ka waluwo puonj ma yudore e Jo-Hibrania 6:11, 12, wabiro mako genowa motegno “nyaka giko.”​—Som.

16. Ang’o ma wang’ado e chunywa ni wabiro siko ka watimo?

¹⁶ Jehova oseketo odiechieng’ kod sa ma obiro tiekoe piny Satanni. Ka odiechiengno ochopo, Jehova biro chopo weche duto ma nokoro e Wachne. E kindegi, nyalo nenore ka gima giko mar piny odwa deko ahinya. Kata kamano, odiechieng Jehova “biro chopo mana e kindene!” (Hab. 2:3) Omiyo, wang’aduru e chunywa ni wabiro siko ka ‘wachomo wang’wa kuom Jehova, kendo hore ka warito Nyasach warruokwa.’​—Mika 7:7.