Kaka Lwenje kod Ywaruok Biro Rumo

NYASAYE BIRO TIEKO SIRKENDE MAG DHANO

Nyasaye biro tieko sirkende mag dhano e lweny ma Muma luongo ni Har–​Magedon.a (Fweny 16:16) E kindego, ibiro chok “ruodhi mag piny mangima” ne “lweny mar odiechieng’ maduong’ mar Nyasaye Manyalo Duto.” (Fweny 16:14) Har–​Magedon en lweny ma Nyasaye biro tiekogo lwenje duto.

Pinyruodh Nyasaye manie polo biro kawo kar sirkende mag dhano kendo obiro locho nyaka chieng’. (Daniel 2:44) Nyasaye oseyiero Wuode ma Yesu Kristo mondo obed Ruodh Pinyruodhno. (Isaya 9:​6, 7; Mathayo 28:18) Pinyruodhnob e sirkal ma Yesu nopuonjo jopuonjrene ni gikwa e lamo. (Mathayo 6:​9, 10) Piny mangima biro bedo gi sirkal achiel kende ma Yesu e ma biro lochoe kaka Ruoth.

Yesu ok bi tiyo gi tekone e timo gik ma konye owuon kaka joloch mag pinyni timoga. Nikech otimo gik moko e yo makare kendo ok obuon ji, onge ng’at ma ibiro timne gik ma ok kare mana nikech oganda moaye, pien dende, kata dhok mowacho. (Isaya 11:​3, 4) Ok bi chuno ni ji oked ne ratichgi. Nikech ang’o? En nikech Yesu biro chopo dwach ng’ato ka ng’ato. “Obiro reso jachan ma ywakne, bende, obiro reso ng’at ma sandore ma onge ng’at ma dikonye. . . . Obiro golonegi gik ma diyogi kaachiel gi timbe mahundu.”—Zaburi 72:​12-14.

Pinyruodh Nyasaye biro tieko gige lweny duto e piny. (Mika 4:3) Bende, obiro tieko jo maricho mohero dhawo kata ma miyo ji ok dag gi kuwe. (Zaburi 37:​9, 10) Ng’ato ka ng’ato biro bedo gi arita maber e piny duto.—Ezekiel 34:28.

Ji biro dak e ngima maber ahinya ka Pinyruodh Nyasaye locho. Obiro tieko chandruoge ma miyoga ji dhi e lweny kaka dhier, kech, kod nok mar kuonde dak. Ji duto biro yudo chiemo moromo kod ute mabeyo ma ginyalo dakie.—Zaburi 72:16; Isaya 65:​21-23.

Pinyruodh Nyasaye biro tieko chandruoge duto ma lweny osekelo. Mano oriwo lit kod hinyruok ma lwenje osekelo ne dhano, gibed hinyruok mag del, paro, kata chandruoge mamoko. Kata mana jomotho ibiro chier mondo gibed mangima kendo e piny. (Isaya 25:8; 26:19; 35:​5, 6) Joot biro yudo thuolo mar dak kanyachiel, kendo ok gibi paro gik maricho ma lweny nokelo nikech gigo nobed ‘gik machon mosekadho.’—Fweny 21:4.

NYASAYE BIRO TIEKO RICHO

Pinyruodh Nyasaye biro miyo dhano duto olam Nyasaye madier ma en Jehovac, “Nyasach hera kod kuwe.” (2 Jo-Korintho 13:11) Dhano biro puonjore dak gi kuwe gi jowetegi. (Isaya 2:​3, 4; 11:9) Ji duto ma luwo gik ma ipuonjogi ibiro gony mondo gia e tuech mar richo.—Jo-Rumi 8:​20, 21.

NYASAYE BIRO TIEKO SATAN KOD JOCHIENDENE

Pinyruodh Nyasaye biro golo joma miyoga dhano gore, ma gin Satan kod jochiendene. (Fweny 20:​1-3, 10) Nikech koro gibiro bedo ma onge, “kuwe biro bedo mogundho.”—Zaburi 72:7.

Inyalo bedo gadier ni singo mar Nyasaye mar tieko lwenje kod ywaruok biro chopo kare. En gi nyalo kod gombo mar tieko lwenje.

• Nyasaye nigi rieko kod teko mar tieko lweny kod mahundu. (Ayub 9:4) Onge gima nyalo tame timo.—Ayub 42:2.

• Nyasaye winjoga marach sama oneno ka dhano chandore. (Isaya 63:9) Bende, “osin gi ng’ato ang’ata mohero timbe gero.”—Zaburi 11:5.

• Kinde duto Nyasaye chopoga singoge, kendo ok onyal riambo.—Isaya 55:​10, 11; Tito 1:2.