SULA MAR PUONJRUOK 7
WER 15 Pakuru Wuod Jehova Makayo!
Ber ma Wayudo Nikech Jehova Weyonwa Richowa
“Iweyo ne ji richogi gadier.”—ZAB. 130:4.
GIMA SULANI WUOYE
Wabiro nono weche kod ranyisi moko ma yudore e Muma ma nyiso yo makende ma Jehova weyonwago richowa. Bende, wabiro nono kaka wanyalo dhi nyime nyiso ni wagoyo ne Jehova erokamano kuom yo moweyonwago richowa.
1. Ang’o momiyo seche moko tekga ng’eyo ka ng’at ma wachwanyo oweyonwa kethowa gadier?
“AWEYONI RICHONI.” En adier ni inyalo winjo ka chunyi okuwe kiwinjo ka ng’ato onyisi wechego to ahinya-ahinya, king’eyo ni nitimo kata wacho gima nochwanye. Kata kamano, wechego tiendgi en ang’o? Be ng’at michwanyono neno ni winjruoku kode koro ber? Koso di bed ni ok odwar mana wuoyo e wi gima nitimoneno? Seche moko tekga ng’eyo ka ng’at ma wachwanyo oweyonwa kethowa gadier.
2. Ere kaka Ndiko lero yo ma Jehova weyonego ji richo? (Ne weche moler piny.)
2 Yo ma Jehova weyonwago richo opogore ahinya gi yo ma waweyonego jowetewa richogi. Jehova weyonwaga richo e yo makende ahinya. Jandik-zaburi nowacho kama e wi Jehova: “Nimar iweyo ne ji richogi gadier, mondo giluori.”a (Zab. 130:4) Ee, Jehova weyo ne ji “richogi gadier.” Oketonwa ranyisi maber mar weyo ne ji richo. Nitie kuonde moko e Muma ma noti gi wach moro ma yudore e dho Hibrania ma lero yo ma Jehova weyonego dhano richogi, to ok nyal ti gi wachno e lero kaka dhano weyonego dhano wetegi richogi.
3. Ere kaka yo ma Jehova weyonwago richowa opogore gi yo ma waweyonego jowetewa richogi? (Isaya 55:6, 7)
3 Sama Jehova oweyo ne ng’ato richo, orucho richono chuth. Kae to, wabedo gi winjruok maber kode kendo. Wadwoko ne Jehova erokamano nikech kinde ka kinde ka waketho, to oikorega weyonwa richowa.—Som Isaya 55:6, 7.
4. Ere kaka Jehova konyowa ng’eyo tiend weyo ne ji richo?
4 Ka yo ma Jehova weyonego ji richogi opogore gi yo ma waweyonego dhano wetewa richogi, kare ere kaka wan dhano morem wanyalo ng’eyo tiend weyo ne ng’ato richo gadier? Jehova tiyo gi ranyisi kod weche moko mondo okonywa ng’eyo okang’ ma oweyonwago richo. E sulani, wadwaro nono moko kuomgi. Ranyisigo kod wechego biro konyowa ng’eyo ni ka waloko chunywa ma waweyo richo, Jehova gologa richowago, kendo wabedo gi winjruok maber kode. Nono wechego biro miyo wamed hero Jehova, kendo goyone erokamano nikech ng’wono monyisowa sama oweyonwa richowa e okang’ malach.
JEHOVA GOLO RICHOWA
5. Ang’o ma Jehova timoga sama owacho ni owenwa richowa?
5 E Muma, ipimo richo gi osigo moro mapek ma turowa. Ruoth Daudi nowacho kama e wi richoge: “Kethona opong’o wiya, gitura ka osigo mapek.” (Zab. 38:4) Kata kamano, joma oloko chunygi gadier, Jehova weyonegiga richogi. (Zab. 25:18; 32:5) E dho Hibrania, wach molok ni “weyo ne ng’ato richone” tiende en “ting’one ng’ato richone.” Wanyalo neno Jehova kaka ng’at matek ahinya ma golo osigo moro mar richo e gokwa, kae to oting’onwago.
“Iweyona richona” (Zab. 32:5)
6. Jehova teroga richowa mabor kodwa e okang’ ma romo nade?
6 Jehova tiyo gi ranyisi moro e Muma mondo okonywa ng’eyo kaka ogolo richowa kendo oterogi mabor kodwa. Zaburi 103:12 wacho kama: “Osewito kethowa mabor kodwa, mana kaka wuok chieng’ bor gi podho chieng’.” En adier ni wuok chieng’ bor ahinya gi podho chieng’ kendo onge chieng’ ma giromoega. Mano nyiso ni Jehova teroga richowa mabor ahinya kodwa. Donge mano miyo wabedo gadier ni Jehova weyonwaga richowa chuth?
“Mana kaka wuok chieng’ bor gi podho chieng’ ” (Zab. 103:12)
7. Ere kaka Muma lero gima Jehova timoga gi richowa? (Mika 7:18, 19)
7 Sama Jehova okawo richowa moterogi mabor kodwa, be pod osiko koparogi? Ooyo. Ruoth Hezekia nondiko kama e wi Jehova: “Isewito richona duto e ng’eyi.” (Isa. 38:9, 17) Weche motigo e ndikono nyiso ni Jehova kawoga richo mag joma oloko chunygi gadier, kae to owitogi mabor kode. Weche manie ndikono bende inyalo lok kama: “Isemiyo [richona] obedo ka gima pok natimogi nyaka nene.” Muma medo lero wachno kotiyo gi weche mamoko ma yudore e Mika 7:18, 19. (Som.) Ndikono wacho ni Jehova wito richowa duto e bwo nam. E kinde machon, ne ok en gima yot mondo ng’ato oyud gima nosewit e bwo nam.
“Isewito richona duto e ng’eyi” (Isa. 38:17)
“Ibiro wito richogi duto e bwo nam” (Mika 7:19)
8. En ang’o ma wasepuonjore chop sani?
8 Ranyisi ma wasenonogo konyowa ng’eyo ni sama Jehova oweyonwa richowa, to oweyonwa chuth kendo chunywa ok onego ochandre nikech richogo. En adier ni mana kaka Daudi nowacho, “jo mamor gin jo mowenegi timbegi ma ok kare kendo ma owenegi richogi; ng’at mamor en jalo ma Jehova ok bi kwano kaka jaricho.” (Rumi 4:7, 8) Mano e tiend weyo ne ng’ato richo gadier.
JEHOVA RUCHO RICHOWA
9. En ranyisi mane ma yudore e Muma ma konyowa ng’eyo ni Jehova weyonwa richowa gadier?
9 Jehova tiyo gi ranyisi moro machielo e konyowa ng’eyo kaka orucho richo mag joma oloko chunygi gadier kotiyo gi misango mar rawar. Jehova lwoko richowa kendo opwodhogi e yor ranyisi. Mano miyo gibedo maler. (Zab. 51:7; Isa. 4:4; Jer. 33:8) Jehova leronwa wachno kama: “Kata obedo ni richou kwar ka remo, ginibed ma rachar ka pe, kata gikwar ka otamba makwar, ginibed ma rachar ka yie rombe.” (Isa. 1:18) Ok yot lwoko law ma rachar ma nigi chilo moro ma kwar mobed maler. Jehova tiyo gi ranyisino e konyowa bedo gadier ni inyalo lwok richowa ma wabed maler.
“Kata obedo ni richou kwar ka remo, ginibed ma rachar ka pe” (Isa. 1:18)
10. En ranyisi mane machielo ma Jehova tiyogo e nyiso okang’ ma oweyonwago richowa?
10 E sula mokalo, ne waneno ni richo ipimo gi ‘gowi.’ (Mat. 6:12; Luka 11:4) Omiyo, sa asaya ma watimo richo, wachalo joma gopgi medore ameda. Wabedo gi gop Jehova maduong’ ahinya. Kuom mano, sama Jehova oweyonwa richowa, chal ka gima orucho gopewa. Ok odwar ni wachul gowi ma osewenwa. To mano doko ranyisi ma jaber ma nyiso kaka wawinjoga sama Jehova oweyonwa richo!
“Iwenwa gopewa” (Mat. 6:12)
11. Sama Muma wacho ni Jehova ‘rucho’ richowa, mano tiende en ang’o? (Tich Joote 3:19)
11 Jehova ok wenwa mana gopewa kata richowa kende, to oruchogi. (Som Tich Joote 3:19.) Sama owe ne ng’ato gowi, inyalo go alama mar X e otas mondikie gowi ma en-go. Kata kamano, kwan mar gowi manie otasno to pod nyalo neno. Rucho gimoro to opogore. Mondo wang’e tiend wachno, ber ng’eyo ni wino ma ne itiyogo chon ne inyalo ywe ma yot kitiyo gi pi. Ng’ato ne nyalo kawo sponj mang’ich kae to oyweyogo weche mondiki ma gilal. Kamano bende, sama “oruch” gopewa kata richowa, gilalga. Ng’ato ne ok nyal neno weche mondik bang’ ka oseruchgi. Kama nondike wechego ne bedo maler ma chal ka gima ne pok ondikie gimoro amora. Donge en gima morowa ng’eyo ni Jehova ok wenwa mana richowa, to oruchogi ma ok ochak opargi kendo?—Zab. 51:9.
“Eka richou oruch” (Tich 3:19)
12. Ere kaka Jehova umo richowa gi bor polo?
12 Nitie weche mamoko ma Jehova tiyogo e lero kaka orucho richowa. Owacho kama: “Abiro umo kethou gi bor polo, abiro umo richou gi bor polo motuere.” (Isa. 44:22) Sama Jehova oweyonwa richowa, chal ka gima otiyo gi bor polo motuere ti mondo oum-go richono ma ok wanyal nene kendo.
“Abiro umo kethou gi bor polo” (Isa. 44:22)
13. Wawinjoga nade sama Jehova oweyonwa richowa?
13 Weche ma Jehova nowachogo puonjowa ang’o? Sama Jehova oweyonwa richowa, ok onego wasik ka waparore e wi richogo. Kokalo kuom remb Yesu Kristo, Jehova rucho kata weyonwa richowa chuth kendo wabedo ka joma ne pok otimo richo nyaka nene. Mano e okang’ ma Jehova weyonwago richowa ka waloko chunywa gadier.
JEHOVA DWOKO WINJRUOK MABER MA NE WAN-GO KODE
Nikech Wuonwa weyonwa richowa, mano miyo wabedo gi winjruok maber kode (Ne paragraf mar 14)
14. Ang’o momiyo onego wabed gadier ni Jehova biro weyonwa richowa? (Ne pichni bende.)
14 Ka Jehova oweyonwa richowa gadier, wabedo gi winjruok maber kode kendo. Mano konyowa mondo kik waparre e wi richo ma ne watimo. Ok onego wapar ni Jehova pod biro sin kodwa bang’ weyonwa richowa. Sama Jehova owacho ni oweyonwa richowa, otimo kamano ma onge kiawa. Janabi Jeremia nondiko weche moko ma Jehova nowacho niya: “Abiro weyonegi kethogi, ok anapar richogi ngang’.” (Jer. 31:34) Jaote Paulo bende notiyo gi wechego kowuoyo e wi Jehova. Nondiko kama: “Ok anapar richogi ngang’.” (Hib. 8:12) Mano tiende en ang’o?
“Ok anapar richogi ngang’” (Jer. 31:34)
15. Sama Jehova wacho ni ok obi paro richowa kendo, mano nyiso ang’o?
15 E Muma, wach motigo ni ‘paro’ ok nyis ni kinde duto ng’ato siko ka oketo pache kuom wach moro ma notimore. Kar mano, oriwo okang’ ma ng’ato nyalo kawo ka luwore gi gima otimoreno. Achiel kuom joricho ma nogur e bath Yesu nokwaye kama: “Iparae e kinde midonjo e Pinyruodhi.” (Luka 23:42, 43) Ne ok okwa Yesu mondo opare mana gie sechego. Dwoko ma Yesu nomiye nonyiso ni nodhi kawo okang’ mar chiero jarichono bang’e. Omiyo, sama Jehova wacho ni ok obi paro richowa kendo, mano nyiso ni ok obi kawonwa okang’ moro amora ka luwore gi richo ma ne watimono. Ok obi kumowa nikech richo ma noseweyonwa.
16. Sama Jehova oweyonwa richowa, wabedo kaka ng’a?
16 Muma tiyo gi ranyisi moro machielo e konyowa ng’eyo okang’ ma Jehova weyonwago richowa gadier. Nikech onyuolwa e richo mano miyo wabedo “wasumbni mag richo.” Kata kamano, nikech Jehova weyonwa richo, wabedo “wasumbni mosegony e richo.” (Rumi 6:17, 18; Fwe. 1:5) Kuom adier, sama Jehova oweyonwa richowa, wabedo kaka misumba moket thuolo.
“Ne ogonyu e richo” (Rumi 6:18)
17. Ere kaka wachangoga e yor ranyisi bang’ ka osewenwa richowa? (Isaya 53:5)
17 Som Isaya 53:5. Nitie ranyisi machielo mogik ma Jehova tiyogo e lero kaka oweyonwa richowa. Opimowa gi ng’at ma nigi tuo moro marach. Nikech rawar ma Jehova chiwo kokalo kuom Wuode, ochangowa e yor ranyisi. (1 Pet. 2:24) Sama watimo richo, waketho winjruok ma wan-go gi Jehova. Kata kamano, nikech misango mar rawar, Jehova weyonwa richowa kendo wabedo gi winjruok maber kode. Mana kaka ng’ato nyalo winjo komor sama ochango kuom tuo moro mosebedo ka chande, e kaka wan bende wawinjoga ka wamor sama ochangwa e yor chuny kendo wabedo osiepe Jehova bang’ ka osewenwa richowa.
“Adhondene nomiyo wachango” (Isa. 53:5)
BER MA WAYUDO NIKECH IWEYONWA RICHOWA
18. Ang’o ma wapuonjore bang’ nono weche kod ranyisi moko ma yudore e Muma ma nyiso okang’ ma Jehova weyonwago richowa? (Ne bende sanduk ma wiye wacho ni, “Okang’ ma Jehova Weyonwago Richowa.”)
18 Ang’o ma wasepuonjore bang’ nono weche kod ranyisi mopogore opogore ma Jehova tiyogo e nyiso okang’ ma oweyonwago richowa? Wapuonjore ni ka oweyonwa richowa, to owenwa chuth ma ok ochak opar richowago kendo. Mano miyo wabedo gi winjruok maber gi Wuonwa manie polo. Bende, onego wapar ni sama Jehova oweyonwa richowa, chal ka gima omiyowa mich. Omiyowa michno nikech oherowa kendo ong’won kodwa, to ok nikech wan gi ratiro mar yude.—Rumi 3:24.
19. (a) Ang’o monego omi wabed mamor? (Jo-Rumi 4:8) (b) Ang’o ma wabiro nono e sula ma luwo?
19 Som Jo-Rumi 4:8. To mano kaka wamor ni Jehova en Nyasaye ma “[weyo] ne ji richogi gadier.” (Zab. 130:4) Nitie gima dwarore ni watim mondo wan bende owenwa richowa. Yesu nowacho kama: “Ka ok uwe ne ji kethogi, Wuonu bende ok bi weyonu kethou.” (Mat. 6:14, 15) Omiyo, en gima dwarore ni waluw ranyisi mar Jehova e weyo ne ji kethogi. To ere kaka wanyalo timo mano? Sula ma luwo biro konyowa dwoko penjono.
WER 46 Erokamano Jehova
a Weche motigo e dho Hibrania kiwuoyo kuom kaka Jehova weyonego ji richo, itiyogo mana kuome kende, to ok kuom yo ma dhano weyonego jowetegi richogi. Ginyiso kaka Jehova weyo ne ji richogi gadier kata obedo ni nitie yore mopogore opogore ma dhano bende timogo kamano. Loko mag Mumbni mang’eny to ok nyis pogruokno. Kata kamano, Loko mar Piny Manyien to lere e yo maber, to mano miyo ndiko mar Zaburi 130:4 bedo ndiko makende ahinya.