Bed Gadier ni Jehova Oseweyoni Richoni

1-2. Wawinjoga nade sama wang’eyo ni Jehova oikore weyonwa richowa? (Ne picha manie gaset.)

RUOTH Daudi nong’eyo maber kaka chunywa nyalo chandowa sama watimo richo. (Zab. 40:12; 51:3; weche manie chak sula) Notimo richo moko madongo e ngimane. Kata kamano, noloko chunye gadier mi Jehova ong’wonone. (2 Sa. 12:13) Daudi nong’eyo kaka ng’ato winjoga maber bang’ ka Jehova oseweyone richo.—Zab. 32:1.

² Mana kaka Daudi, wan bende wanyalo bedo mamor ka wang’eyo ni Jehova osenyisowa ng’wonone mi oweyonwa richowa. To mano kaka wamor ng’eyo ni ka waloko chunywa gadier kendo timo duto ma wanyalo mondo kik wanwo richo, Jehova oikore weyonwa richowa, kata gibed mana richo madongo manade! (Nge. 28:13; Tich 26:20; 1 Joh. 1:9) E wi mano, wabedoga gi chuny mokuwe sama wang’eyo ni Jehova oikore weyonwa richo chuth mana ka gima pok ne watimoga richogo!—Eze. 33:16.

3-4. Nyaminwa moro ne winjo nade bang’ ka nosebatise, to ang’o ma wabiro nono e sulani?

³ Nitie sama jomoko nyalo yudo ka ok yotnegi yie ni Jehova nyalo weyonegi richogi. Ne ane ranyisi mar Jennifer, ma ne opon e adiera. Ka ne pod en rawera, nochako timo timbe moko maricho ma ok winjre gi puonj mag Muma. Bang’ higni moko, noduogo ir Jehova mochiworene, kae to obatise. Owacho kama: “Nadak e ngima marach nikech nahero gige ringruok, timbe mag terruok, metho asasa, kendo ne an ja mirima ahinya. Nang’eyo maber ni naseweyo timbego mi aloko chunya gadier, kendo ni Jehova ne oseweyona. Kata kamano, ne ok yotna yie gi wachno.”

⁴ Be iyudoga ka seche moko ok yotni yie ni Jehova oseweyoni richoni machon? Jehova dwaro ni wabed gadier ni oseweyonwa richowa mana kaka Daudi. E sulani, wadwaro neno gimomiyo onego wabed gadier ni Jehova oseweyonwa richowa kod gima nyalo konyowa timo kamano.

ANG’O MOMIYO DWARORE NI WABED GADIER NI JEHOVA OSEWEYONWA RICHOWA?

5. En miriambo mane ma Satan dwaro ni wayiego? Chiw ane ranyisi.

⁵ Ka wan gadier ni Jehova oseweyonwa richowa, ok wabi yie gi miriambo ma Satan osebedo ka wacho. Par ni Satan diher timo duto monyalo mondo wawe tiyo ne Jehova. Kuom ranyisi, Satan dwaro ni wayie ni Jehova ok nyal weyonwa richowa. Ne ane ranyisi mar ng’at moro ma ne nie kanyakla ma Korintho ma ne ogol e kanyakla nikech timbe mag terruok. (1 Kor. 5:​1, 5, 13) Bang’ ka ng’atno noseloko chunye moweyo richone, Satan ne dwaro ni joma nie kanyakla kik ng’wonne kata rwake e kanyakla kendo. Bende, Satan ne dwaro ni ng’atno opar ni pok ong’wonne ‘mondo obed gi kuyo mokadho’ kae to owe tiyo ne Jehova. Satan pok oweyo tiyo gi miriambo ma kamano. Kata kamano, “waseng’eyo riekni motiyogo.”—2 Kor. 2:​5-11.

6. Ang’o ma wanyalo timo mondo chunywa kik dhi nyime chandowa bang’ ka Jehova oseweyonwa richowa?

⁶ Ka wan gadier ni Jehova oseweyonwa richowa, wabedo gi chuny mokuwe. Sama watimo richo, chunywa chandowaga ahinya. (Zab. 51:17) To mano en gima ber nikech onyalo chwalowa mondo watim lokruoge ma dwarore. (2 Kor. 7:​10, 11) Kata kamano, wanyalo ol ka po ni chunywa pod chandowa bang’ loko chunywa gadier. To ka wayie ni Jehova oseyonwa richowa, mano biro miyo wabed gi chuny mokuwe. Mano biro konyowa tiyo ne Jehova ka wamor kendo ka wan gi chuny maler. (Kol. 1:​10, 11; 2 Tim. 1:3) Ang’o ma wanyalo timo mondo wabed gadier ni Jehova oseng’wononwa?

ANG’O MA NYALO KONYOWA BEDO GADIER NI JEHOVA OSEWEYONWA RICHOWA?

7-8. Jehova nonyiso Musa ni en Nyasaye ma chalo nade, to mano miyo wabedo gadier gi wach mane? (Wuok 34:​6, 7)

⁷ Par matut e wi weche ma Jehova osewacho kuome owuon. Kuom ranyisi, par ane gima Jehova nonyiso Musa ka ne en e Got Sinai.a (Som Wuok 34:​6, 7.) Kata obedo ni Jehova nigi kido mang’eny mabeyo, noyiero nyiso Musa ni en “Nyasaye mang’won kendo ma kecho ji.” Be Nyasaye ma nigi kido mabeyo kamano nyalo tamore ng’wono ne jatichne moloko chunye gadier? Ok nyalre kata matin! Kotamore weyo ne jotichne richogi, mano biro nyiso ni en Nyasaye ma ok ng’won kendo ma ok dew jotichne.

⁸ Wanyalo bedo gadier ni sama Jehova owacho ni en Nyasaye mang’won, ok oriambi. (Zab. 31:5) Wageno gik moko duto monyisowa. Ka chunyi pod chandi nikech richo ma Jehova oseweyoni, inyalo penjori niya: ‘Be an gadier ni Jehova en Nyasaye mang’won kendo ni onyalo kecho jaricho moro amora moloko chunye gadier? Ka ayie gi wachno, donge onego abed gadier ni oseweyona richona?’

9. Ndiko mar Zaburi 32:5 puonjowa ang’o e wi yo ma Jehova weyogo richo?

⁹ Par matut e wi weche ma Jehova notayo jondik Muma mondo ondik e wi ng’wonone. Kuom ranyisi, par ane weche ma Daudi nowacho e wi yo ma Jehova weyonwago richowa. (Som Zaburi 32:5.) Nowacho kama: “Ne iweyona richona.” E dho Hibrania, wach molok ni “weyo” tiende nyalo bedo “ting’o malo,” kata “golo.” Kuom mano, ka ne Jehova oweyo ne Daudi richo, ne chalo ka gima oting’o richogo mowitogi mabor gi Daudi, kendo mano nomiyo Daudi obedo mamor nikech nogolne osigo ma nosebedo ka ture. (Zab. 32:​2-4) Mano bende e gima nyalo timorenwa. Ka waseloko chunywa gadier, chunywa ok onego odhi nyime chandowa nikech richo ma Jehova oseweyonwa.

10-11. Weche motigo e Zaburi 86:5 ni “iikori weyo ne ji richogi,” puonjowa ang’o e wi Jehova?

¹⁰ Som Zaburi 86:5. Daudi nowacho ni Jehova ‘oikore weyo ne ji richogi.’ Buk moro ma lero wechego nowacho kama e wi Jehova: “Oikore weyo ne ji richogi nikech mano e kite.” Ang’o momiyo wanyalo wacho ni mano e kite? Zaburino dhi nyime wacho niya: “Ihero ji duto ma luongi.” Mana kaka ne wapuonjore e sula mokalo, hera mosiko ma Jehova nigo e ma chwalega mondo omak osiep motegno gi jotichne mohere. Herano e ma chwale mondo ong’won ne joricho moloko chunygi gadier. (Isa. 55:​7, weche moler piny.) Ka tekni yie ni Jehova oseweyoni richoni, inyalo penjori niya: ‘Be an gadier ni Jehova oikore ng’wono ne ji duto moloko chunygi gadier? Donge mano onego omi abed gadier ni noweyona richona ka ne aywakne mondo owena?’

¹¹ Muma nyiso ni Jehova ong’eyo ni wan mana buru kendo ni onyuolwa e richo. To mano en gima hoyowa ahinya. (Zab. 139:​1, 2) Wachno nenore maler e zaburi mamoko ma Daudi nondiko ma bende konyowa bedo gadier ni Jehova nyalo weyonwa richowa.

KIK WIYI WIL GI GIMA JEHOVA PARO

12-13. Ka luwore gi Zaburi 103:​14, Jehova ong’eyo wach mane kuomwa, to mano chwale timo ang’o?

¹² Som Zaburi 103:14. Daudi nowacho ni Jehova “ong’eyo maler ni wan mana buru.” Wechego nyiso achiel kuom gik momiyo Jehova oikore weyo ne joricho moloko chunygi gadier, ma en ni kinde duto oparoga ni onyuolwa e richo. Wanon ane matut tiend weche ma Daudi nowachogo.

¹³ Daudi nowacho ni Jehova “ong’eyo maler ni wan mana buru.” Muma wacho ni Nyasaye “nokawo lowo mochueyogo” Adam. Mano nyiso ni ong’eyowa e yo maber kod gik ma wadwaro kaka chiemo, nindo, kod muya. Kata mana dhano makare chuth dwaro gigo. (Cha. 2:7) Kata kamano, ka ne Adam gi Hawa otimo richo, dhano nobedo buru e yo machielo. Nikech wan nyikwagi, onyuolwa ka wan joricho kendo nyaka waked matek mondo watim gik makare. Jehova ong’eyo wachno maler. Ka ne Daudi owacho ni wan mana buru, notemo wacho ni Jehova paro ni warem, kendo mano e momiyo okechowaga kinde duto. E yo machuok, wanyalo keto weche ma Daudi nowachogo niya: Jehova ong’eyo ni seche moko wakierga, to ka waloko chunywa gadier okechowa kendo oweyonwa.—Zab. 78:​38, 39.

14. (a) Ere kaka Daudi nolero yo ma Jehova weyogo richo? (Zaburi 103:12) (b) Ranyisi ma Daudi notiyogo puonjowa ang’o e wi yo ma Jehova weyonwago richo? (Ne sanduk ma wacho ni, “Kaka Jehova Weyoga Richo Chuth.”)

¹⁴ Ang’o machielo ma nyalo konyowa bedo gadier ni Jehova oseweyonwa richowa? (Som Zaburi 103:12.) Daudi nowacho ni sama Jehova oweyonwa richo, oketoga richogo mabor “mana kaka wuok chieng’ bor gi podho chieng’.” E yo machielo, yo wuok chieng’ kod yo podho chieng’ ok nyal romo ngang’. Mano nyiso ang’o e wi richo ma Jehova oseweyonwa? Buk moro lero ndikono niya: “Ka oket richowa mabor kodwa kamano, wanyalo bedo gadier ni owenwa richono chuth, kendo kata mana tikne ok nyal winjore.” Nitie sama tik moro nyalo paronwa gimoro ma notimore kinde mokalo. Kata kamano, sama Jehova oweyonwa richowa, onge tik moro amora ma dong’ga ma nyalo miyo opar wachno, kata kumowa kendo nikech richo moseweyonwano.—Eze. 18:​21, 22; Tich 3:19.

15. Ang’o ma nyalo konyowa sama chunywa chandowa nikech richo ma ne watimo e kinde mokalo?

¹⁵ Ere kaka weche ma Daudi nowacho e Zaburi 103 nyalo konyowa bedo gadier ni Jehova oikore weyonwa richowa? Ka po ni chunywa pod chandore nikech richo ma ne watimo chon, wanyalo penjore niya: ‘Dibed ni wiya osewil gi gima Jehova paro, ma en ni ong’eyo ni an jaricho kendo ni oikore weyona richona ka aloko chunya gadier? E wi mano, dibed ni aparoga gik ma wi Jehova osewilgo, ma gin richo ma noseweyona chuth?’ Jehova ok ketga pache kuom richo ma noseweyonwa. Wan bende ok onego wapargi. (Zab. 130:3) Ka wan gadier ni Jehova oseweyonwa richowa, chunywa ok bi siko ka chandowa kendo wabiro tiyone ka wamor.

16. Chiw ane ranyisi ma nyiso kaka keto pachwa kuom richo ma ne watimo chon nyalo hinyowa. (Ne picha bende.)

¹⁶ Ne ane ranyisi ma luwoni. Sama wayie mondo richo mosewenwa ochand chunywa, inyalo pimwa gi dereva ma riembo mtoka to oketo pache kuom kio ma nyiso gik ma timore chien. Ok rach ng’iyo kiono kinde ka kinde nikech mano nyalo konye geng’o gik ma nyalo hinye. Kata kamano, ka odwaro chopo kuma odhiye, nyaka oket pache nyime. E yo ma chalo kamano, kinde ka kinde wanyalo paro richowa machon nikech ginyalo puonjowa gimoro kata konyowa kawo okenge ma dwarore mondo kik wanwogi. Kata kamano, ka waketo pachwa duto kuom richowa machon, chunywa nyalo chandowa ma wawe tiyo ne Jehova. Kar mano, dwarore ni waket pachwa duto e yo ma terowa e ngima. Wan e yo ma terowa e piny manyien ma Nyasaye osingo kama “ji ok nopar gik machon” maricho.—Isa. 65:17; Nge. 4:25.

DHI NYIME BEDO GADIER NI JEHOVA OSEWEYONI RICHONI

17. Ang’o momiyo dwarore ni wadhi nyime bedo gadier ni Jehova oherowa kendo oikore weyonwa richowa?

¹⁷ Dwarore ni wadhi nyime bedo gadier ni Jehova oherowa kendo oikore weyonwa richowa. (1 Joh. 3:​19, weche moler piny.) Nikech ang’o? Satan dwaro ni wapar ni Jehova ok oherowa kendo ok onyal weyonwa richowa. Dwache maduong’ en ni wawe tiyo ne Jehova. Wanyalo bedo gadier ni Satan biro dhi nyime timo kinda nikech ong’eyo ni odong’ mana gi kinde manok. (Fwe. 12:12) Ok wabi yiene mondo oketwa mabor gi Jehova!

18. Ang’o minyalo timo mondo imed bedo gadier ni Jehova oheri kendo oikore weyoni richoni?

¹⁸ Mondo imed bedo gadier ni Jehova oheri, ti gi paro ma nochiw e sula mokalo. Bende, par weche ma Jehova wacho kuome owuon mondo imed bedo gadier ni oseweyoni richoni. Par matut kuom yo ma Muma lerogo ng’wonone. Kik wiyi wil ni Jehova ong’eyo ni in ng’at morem kendo obiro ng’wononi. Par bende ni sama oweyoni richo, ok ochak opargi kendo. Kitimo kamano, to in bende ibiro bedo mamor mana kaka Daudi kendo ibiro wacho niya: “Erokamano Jehova kuom ‘weyona richona’!”—Zab. 32:5.