Luw Ranyisi mar Malaike Momakore gi Jehova

1-2. (a) En pogruok mane mantie e kindwa gi malaike? (b) Gin yore mage ma wachalie gi malaike?

E KINDE ma Jehova noywayi e adiera, norwaki e ode mopong’ gi jotichne ma lame kendo moherore, moriwo nyaka malaike mang’eny momakore kode. (Dan. 7:9, 10) Sama waparo e wi malaike, ng’enyne waparoga kaka gipogore kodwa. Kuom ranyisi, malaike osedak higni mang’eny moloyowa. (Ayub 38:4, 7) Gin gi teko mang’eny moloyowa. Giler kendo gin joma kare moloyo dhano ma gin joma orem.—Luka 9:26.

² Kata obedo ni gipogore kodwa e yore moko, pod nitie yore moko ma wachalie kodgi. Kuom ranyisi, mana kaka malaike, wan bende wanyalo nyiso kido mabeyo ma Jehova nigo. Wan gi thuolo mar timo yiero mana kaka malaike kendo, mana kaka malaike, wan gi nyingewa, kido mopogore opogore, kod migepe mopogore opogore e tij Jehova. Bende, wan gi ting’ mar lamo Jehova mana kaka gin.​—1 Pet. 1:12.

3. Ang’o ma wanyalo puonjore e wi malaike momakore gi Jehova?

³ Nikech nitie yore mang’eny ma wachalie gi malaike, ranyisigi nyalo puonjowa gik mang’eny kendo jiwowa. E sulani, wabiro nono kido mabeyo ma malaike momakore gi Jehova nyiso kaka bolruok, hero ji, nano, kod kaka gitemo matek mondo girit kanyakla osik ka ler. Bende, wabiro neno kaka wanyalo luwo ranyisigi.

MALAIKE OBOLORE

4. (a) Ere kaka malaike nyiso kido mar bolruok? (b) Ang’o momiyo malaike obolore? (Zaburi 89:7)

⁴ Malaike momakore gi Jehova obolore. Kata obedo ni gin gi lony mang’eny, teko, kod rieko, pod giluwo chike Jehova. (Zab. 103:20) Sama gitimo migawo momigi, ok gipakrega kata ok ginyisre nikech teko ma gin-go. Gimor timo gimoro amora ma Jehova omiyogi kata obedo ni samoro ok wach nyingegi.a (Cha. 32:24, 29; 2 Ru. 19:35) Ok giyie yudo pak ma Jehova kende e ma owinjore yudo. Ang’o momiyo malaike obolore? En nikech gihero Jehova kendo gimiye luor ahinya.—Som Zaburi 89:7.

5. Ere kaka malaika moro nonyiso kido mar bolruok ka norieyo jaote Johana? (Ne picha bende.)

⁵ We wane ane ranyisi moro ma nyiso ni malaike obolore. E higa mar 96 B.K., malaika moro ma ok onyiswa nyinge nonyiso jaote Johana fweny moro makende ahinya. (Fwe. 1:1) Ang’o ma Johana notimo bang’ neno gik ma notimore e fwenyno? Notemo lamo malaikano. Kata kamano, malaikano nokwere mapiyo konyise kama: “Ooyo ngang’! Kik itim kamano! An mana misumba wadu kendo mar oweteni . . . Lam Nyasaye!” (Fwe. 19:10) To mano kaka dwokono nyiso kido mar bolruok! Malaikano ne ok dwar ni omiye duong’ kata opake. Nonyiso Johana mondo omi Jehova duong’. Malaikano bende ne ok ong’awore malo e wi Johana. Kata obedo ni malaikano nosebedo ka tiyo ne Jehova kuom higni mang’eny kendo ne en gi teko moloyo Johana, noneno Johana kaka misumba wadgi. Bende, kata obedo ni norieyo Johana, ne ok otimo kamano e yor gero. Nowuoyo kode e yo mang’won. Nyaka bed ni nofwenyo ni Johana ne mor ahinya nikech weche ma nonyise e fweny.

6. Ere kaka wanyalo luwo ranyisi mar malaike e nyiso bolruok?

⁶ Ere kaka wanyalo luwo ranyisi mar malaike e nyiso bolruok? Mana kaka malaike, wan bende ok onego wapakre sama watimo migawo moro maber. (1 Kor. 4:7) Bende, ok onego wane ni waber moloyo jomamoko nikech wasetiyo ne Jehova kuom higni mang’eny kata nikech migepe moko ma wan-go. Kaka wamedo yudo migepe e tij Jehova, e kaka onego wane ni jomamoko oloyowa gi ber. (Luka 9:48) Mana kaka malaike, wadwaro ni wakony jomamoko. Ok dwaher ting’ore malo e wi jowetewa.

7. Ere kaka wanyalo nyiso bolruok sama warieyo ng’ato?

⁷ Wanyalo nyiso kido mar bolruok sama warieyo ng’ato kata sama wachiwo siem, bed ni en Jakristo wadwa kata nyathiwa. Samoro, nyalo dwarore ni wachiw siem ma ok waluoro wang’ ng’ato. Kata kamano, mana kaka malaika ma norieyo Johana e yo mang’won, wan bende onego warie jomamoko e yo mang’won ma ok watiyo gi weche ma nyoso chunygi. Ka waneno ni jomamoko olowa gi ber, mano biro konyowa rieyogi ka watiyo gi Muma e yor luor kendo e yor hera.—Kol. 4:6.

MALAIKE OHERO JI

8. (a) Ka luwore gi Luka 15:10, ere kaka malaike nyiso ni gihero dhano? (b) Ere kaka malaike konyowa e tij lendo? (Ne picha bende.)

⁸ Malaike ok buon dhano. Giherogi. Gibedoga mamor sama jaricho oloko chunye, tiende ni, sama rombo molal oduogo ir Jehova kata sama ng’ato oloko yorene mobiro e adiera. (Som Luka 15:10.) Bende, malaike odich ahinya e tij lando wach maber mar Pinyruoth. (Fwe. 14:6) Kata obedo ni ok gilend ne ji achiel kachiel, ginyalo tayowa ir ng’at ma dwaro puonjre e wi Jehova sama wan e tij lendo. Mano ok nyis ni kinde duto Jehova tiyoga gi malaike e tayowa ir joma gombo winjo wach maber. Onyalo tiyo gi yore mamoko e konyo joge kata tayogi. Kuom ranyisi, onyalo tiyo gi rohone maler. (Tich 16:6, 7) Kata kamano, pod otiyo gi malaike e okang’ malach sama wan e tij lendo. Omiyo, sama walando wach maber, onego wabed gadier ni malaike ni kodwa kendo gikonyowa.—Ne sanduk ma wiye wacho ni, “Nodwok Lamogi.”b

9. Ere kaka wanyalo luwo ranyisi mar malaike e nyiso ji hera?

⁹ Ere kaka wanyalo luwo ranyisi mar malaike e nyiso ji hera? Mana kaka malaike, wan bende onego wabed mamor sama odwok ng’ato e kanyakla. Wanyalo rwako Jakristo wadwa modwok e kanyakla gi mor kendo nyiso ni wahere ahinya. (Luka 15:4-7; 2 Kor. 2:6-8) Bende, wanyalo luwo ranyisi mar malaike kuom timo duto ma wanyalo e tij lendo. (Ekl. 11:6) Mana kaka malaike konyowaga sama walando wach maber, wan bende sama wan e tij lendo, onego wamany yore ma wanyalo konyogo owete gi nyimine. Kuom ranyisi, wanyalo timo chenro mondo walend gi jalendo manyien. Kata, wanyalo konyo owete gi nyimine ma hikgi ng’eny kata ma tuore mondo gin bende giyud thuolo mar dhi e tij lendo.

10. Ranyisi mar Sara puonjowa ang’o?

¹⁰ To nade ka chalwa monowa timo duto ma dwaher e tij Jehova? Pod wanyalo manyo yore mamoko ma wanyalo tiyogo kanyachiel gi malaike e tij lendo. We wane ane ranyisi mar nyaminwa miluongo ni Sarac modak e piny India. Bang’ bedo painia kuom higni 20, Sara nobedo ma tuo ma ne ok onyal wuotho kata wuok e otanda. Mano nonyoso chunye ahinya. Kata kamano, gima nokonye bedo mamor kendo e tij lendo en kony ma noyudo kowuok kuom owete gi nyimine ma ne nie kanyaklagi kod somo Muma pile. En adier ni nyaka nong’i gi yore manyien ma nochako tiyogo e tij lendo nikech chal ma koro ne entie. Nikech ne ok onyal bet mondo ondik barupe, nochune lendo kotiyo gi simu. Nogochoga ne joma nodok limo, kae to jogo ne nyise jomamoko ma bende ne gombo puonjore Muma. Mano nokelone ber mage? Bang’ dweche moko, Sara noyudo jopuonjre mag Muma 70 kendo ne ok onyal tayo jopuonjrego duto kende. Omiyo, nopogo ne jolendo mamoko manie kanyaklagi jopuonjrego. Thoth jopuonjrego biro e chokruogewa. Donge malaike mor tiyo kanyachiel gi owete gi nyimine ma tiyo matek kaka Sara kendo ma timo duto ma ginyalo e tij lendo?

MALAIKE NANO

11. Ere kaka malaike momakore gi Jehova osenyiso kido mar nano e okang’ malach?

¹¹ Malaike momakore gi Jehova ketonwa ranyisi maber mar nano. Kuom higni mathoth, gisebedo ka ginano nikech timbe ma ok kare. Ne gineno ka Satan kod malaike moko ma ne gitiyonego Jehova ng’anyo ne Jehova. (Cha. 3:1; 6:1, 2; Juda 6) Muma nyisowa e wi malaika moro ma nomakore gi Jehova ka ne Jachien oteme achiel kachiel. (Dan. 10:13) E wi mano, kuom kinde duto ma dhano osedakgo e piny, malaike oseneno ka ji matin kende e ma yiero lamo Jehova. Kata obedo ni malaike oseneno mago duto, pod gidhi nyime tiyo ne Jehova gi kinda kendo ka gimor. Ging’eyo ni Nyasaye biro tieko timbe ma ok kare e kinde mowinjore.

12. En ang’o ma nyalo konyowa nano?

¹² Ere kaka wanyalo luwo ranyisi mar malaike e nyiso kido mar nano? Mana kaka malaike, wanyalo neno kitimo ne ji gik ma ok kare kata kikwedogi. Kata kamano, wan be wan gadier ni e kinde mowinjore, Nyasaye biro tieko timbe ma ok karego. Omiyo, mana kaka malaike, “kik waol gi timo gik mabeyo.” (Gal. 6:9) Nyasaye bende singo ni obiro konyowa. (1 Kor. 10:13) Wanyalo kwayo Jehova e lamo mondo omiwa rohone maler, ma biro konyowa nyago kido mar horuok kod mor. (Gal. 5:22; Kol. 1:11) To nade ka iromo gi akwede? Gen Jehova gi chunyi duto kendo kik ibed ma luor. Kinde duto, Jehova biro konyi kendo miyi teko.—Hib. 13:6.

MALAIKE KONYO E RITO KANYAKLA MONDO OSIK KA LER

13. En migawo mane makende ma malaike timo e kindegi? (Mathayo 13:47-49)

¹³ E ndalo mag gikogi, Jehova osemiyo malaike migawo moro makende. (Som Mathayo 13:47-49.) Ji mang’eny e piny ngima gombo winjo wach maber. Moko kuomgi kawoga okenge ma dwarore mondo gibed Jokristo madier, moko to ok tim kamano. Osemi malaike migawo mar “[pogo] jo ma richo gi jo ma kare.” Mano nyiso ni omigi migawo mar rito kanyakla mondo osik ka ler. Mano ok nyis ni ng’at moweyo riwore kodwa koro ok bi duogo e kanyakla, kata ni ok wabi romo gi chandruoge e kanyakla. Kata kamano, wanyalo bedo gadier chuth ni malaike tiyo matek mondo girit kanyakla osik ka ler.

14-15. Ere kaka wanyalo luwo ranyisi mar malaike e rito kanyakla mondo osik ka ler? (Ne pichni bende.)

¹⁴ Ere kaka wanyalo luwo ranyisi mar malaike e rito kanyakla osik ka ler? Wanyiso ni warito ler mar kanyakla kuom siko ka waler e timbewa kod e lamowa. Mano oriwo temo matek mondo warit chunywa kuom yiero osiepe mabeyo kendo loso winjruokwa gi Jehova. (Zab. 101:3) Bende, wanyalo konyo owete gi nyimine mondo odhi nyime makore gi Jehova. Kuom ranyisi, en ang’o monego watim ka Jakristo wadwa otimo richo moro maduong’? Hera ma waherego biro chwalowa mondo wajiwe odhi owuo gi jodong-kanyakla. To ka ok otimo kamano, wabiro nyiso jodongo wachno. Wadwaro ni Jakristo wadwa moro amora ma winjruokne gi Jehova odok chien, oyud kony mapiyo.—Jak. 5:14, 15.

¹⁵ Gima lit en ni seche moko nyalo dwarore ni ogol Jakristo motimo richo moro maduong’ e kanyakla. Ka gima kamano otimore, biro dwarore ni ‘wawe bedo kanyachiel’ kode. d(1 Kor. 5:9-13) Chenro ma kamano miyo kanyakla siko ka ler. E wi mano, ka ok wariwore gi joma ogol e kanyakla, wanyiso ni wadewogi. Timo mano nyalo miyo giduog ir Jehova. To ka giduogo, wabedo mamor kaachiel gi Jehova kod malaike.—Luka 15:7.

16. Gin yore mage ma wanyalo luwogo ranyisi mar malaike?

¹⁶ To mano kaka Jehova odhialowa sama omiyowa thuolo mar puonjruok gik mathoth e wi malaike kendo tiyo kanyachiel kodgi! Omiyo, weuru mondo waluw kido mabeyo ma malaike nigo kaka bolruok, hero ji, nano, kod rito kanyakla mondo osik ka ler. Ka waluwo ranyisi mar malaike momakore gi Jehova, to wan bende wabiro bedo achiel kuom jood Jehova ma lame nyaka chieng’.