WACH MADUONG’ MA GASET WUOYOE—MUMA WACHO ANG’O E WI MALAIKE?
Kaka Malaike Nyalo Konyi
Malaike mabeyo nono ahinya gik ma timore e ngima dhano kendo gihero timo dwach Jehova. Ka ne Nyasaye ochueyo piny, malaike ‘nower kaachiel kendo yawuot Nyasaye nokok gi mor.’ (Ayub 38:4, 7) Kuom higni duto, malaike osebedo ka “gombo ahinya ng’eyo” gik ma nokor ni biro timore e piny e higni ma biro.—1 Petro 1:11, 12.
Muma wacho ni nitie kinde ma malaike oserito jotich Nyasaye mondo gikony e chopo dwach Nyasaye. (Zaburi 34:7) Ne ane ranyisi ma luwogi:
Ka ne Jehova ketho Sodom gi Gomora, malaike nokonyo Lut gi joode mondo giring giwuog kanyo.—Chakruok 19:1, 15-26.
E piny Babilon machon, ka ne ong’ad ne rowere moko adek ma Jo-Hibrania kum mar tho e mach ma kakni, Nyasaye ‘nooro malaikane, kendo nogolo jotichne’ e masirano.—Daniel 3:19-28.
Ka ne Daniel osebedo e bur sibuoche otieno ma ngima, nowacho ni sibuochego ne ok ochame nikech ‘Nyasache ne ooro malaikane, ma omiyo dho sibuoche.’—Daniel 6:16, 22.
Malaike osebedo ka konyo jotich Nyasaye kuom kinde malach
MALAIKE NOKONYO JOKRISTO MOKWONGO
Nitie kinde ma nochuno ni malaike okony kanyakla mar Jokristo mokwongo ka timo kamano ne miyo gichopo dwach Nyasaye. Ne ane ranyisi ma luwogi:
Malaika moro noyawo dhoudi mag jela monyiso joote ma notue ni gidhi nyime gi lendo e hekalu.—Tich Joote 5:17-21.
Malaika moro nonyiso Filipo jaland injili mondo odhi e ndara ma wuok Jerusalem kadhi Gaza mondo olend ne Ja-Ethiopia moro ma noa lemo Jerusalem.—Tich Joote 8:26-33.
Ka ne kinde ochopo mondo joma ok Jo-Yahudi obed Jokristo, malaika moro nobiro ne jatend askeche moro mar Jo-Rumi miluongo ni Kornelio e fweny monyise mondo oluong jaote Petro e ode.—Tich Joote 10:3-5.
Ka ne otue jaote Petro e jela, malaika moro nodhi mogonye.—Tich Joote 12:1-11.
KAKA MALAIKE NYALO KONYI
Onge gima nyiso ni Nyasaye pod tiyo gi malaike mondo okony ji e yor hono kaka notimo chon. Kata kamano, Yesu nowacho kama ka nowuoyo e wi ndalowagi: “Wach maber mar Pinyruothni ibiro yal e piny mangima mondo ochiw neno ne ogendni duto, eka giko nobi.” (Mathayo 24:14) Be ing’eyo ni jolup Kristo tiyo tijni ka itayogi gi malaike?
Malaike konyo e lando wach maber e piny ma ngima
Bug Fweny nyiso ni malaike ne dhi konyo ji e piny ma ngima mondo ong’e Jehova Nyasaye kod dwache ne dhano. Jaote Johana nondiko niya: “Ne aneno malaika machielo ka huyo e kor polo ka en gi wach maber ma nyaka chieng’ molando ne joma odak e piny, ne ogendni duto, gi dhoudi duto, gi dhok duto, kod ji mopogore opogore duto. Ne owacho gi dwol maduong’ niya: ‘Luoruru Nyasaye kendo umiye duong’, nikech sane mar ng’ado bura osechopo, omiyo, koro lamuru Jalno ma nochueyo polo, gi piny, gi nam, kod sokni mag pi.’ ” (Fweny 14:6, 7) Nitie gik mang’eny e kindegi ma nyiso ni malaike konyo e tij lando wach maber mitimo e piny ma ngima. Mano e momiyo kata sama jaricho achiel olokore mobedo jatich Jehova, “malaike mag Nyasaye bedo mamor.”—Luka 15:10.
Ang’o ma biro timore ka osetiek tij lando wach maber? Bang’ mano, “oganda lweny mag polo” biro riwore gi Yesu Kristo, ma en Ruodh ruodhi, mondo giked e Har–Magedon, ma en “lweny mar odiechieng’ maduong’ mar Nyasaye Manyalo Duto.” (Fweny 16:14-16; 19:14-16) Malaike man gi teko biro ketho joma richo sama Ruoth Yesu ‘chulo kuor kuom joma ok luw wach maber e wi Ruodhwa Yesu.’—2 Jo-Thesalonika 1:7, 8.
Omiyo, bed gadier ni malaike oikore konyi in iwuon. Malaike nono ahinya gik ma timore ne jogo duto ma gombo tiyo ne Nyasaye, kendo Jehova osebedo ka tiyo kodgi mondo gijiw kendo girit jotichne e piny ka.—Jo-Hibrania 1:14.
Kuom mano, ng’ato ka ng’ato kuomwa nyaka tim yiero moro. Be wabiro yie winjo wach maber milando e piny ma ngima sani kendo luwo kaka wapuonjore? Joneno mag Jehova modak e alworau oikore konyi mondo ing’e kaka malaike mag Nyasaye man gi teko nyalo konyi.