Gimomiyo Yesu Ogeno Nying Jehova

1-2. (a) Ang’o ma Yesu ne otimo e otieno mogik ka pok onege? (b) Gin penjo mage ma wabiro nono e sulani?

NE EN Tich Ang’wen godhiambo Nisan 14, higa mar 33 B.K., Yesu noa chamo Chiemb Odhiambo gi jootene ma nomakore kode. Nong’eyo ni kinde matin bang’ mano, Judas ne dhi ndhoge kendo jo wasike ne dhi sande kae to nege. Bang’ chiemb odhiambono, Yesu nonyiso jootene weche moko mogik-ogik ma nojiwogi ahinya. To ka pok ne giwuok e ot ma malono, Yesu ne olemo. Jaote Johana nondiko weche mag lamono e Johana sula mar 17.

² Ere kaka weche ma Yesu nowacho e lamono konyowa ng’eyo gima ne nie pache e kindeno? Ere kaka lamono konyowa ng’eyo gima Yesu noketo mokwongo ka ne en e piny kae? We wanon ane dwoko mag penjogo.

“ASEMIYO GING’EYO NYINGI”

3. Ang’o ma Yesu nowacho e wi nying Jehova, to tiend wechego gin ang’o? (Johana 17:6, 26)

³ Yesu nowacho kama e lamo: “Asemiyo ging’eyo nyingi.” Nikech Yesu ne onwoyo wechego, mano nyiso ni nying Jehova ne duong’ne ahinya. (Som Johana 17:6, 26.) Ne otemo wacho ang’o? Be ne onyisogi nying ma ne gikia? Jopuonjre Yesu ne gin Jo-Yahudi omiyo ne ging’eyo nying Nyasaye ma en Jehova. Nyingno ne yudore nyading’eny e Ndiko mag Dho-Hibrania. Omiyo, Yesu ne ok wuo awuoya e wi nying Nyasaye, kar mano, ne opuonjogi gima nyingno ochung’ne. Noyudo osekonyogi ng’eyo Jehova e yo maber, dwache, tijene, kod kidoge e yo ma onge ng’at ma ne nyalo timo kamano.

4-5. (a) Wanyalo tiyo gi ranyisi mane e lero tiend ng’eyo nying ng’ato? (b) Ere kaka jopuonjre Yesu ne ong’eyo tiend nying Jehova?

⁴ Kuom ranyisi, wawach ni jaduong’-kanyaklau moro miluongo ni David en laktar. Iseng’eyo owadwano kuom higni mang’eny. Kae to chieng’ moro ibedo matuo apoya. Iringo kodi e osiptal kama owadwano tiyoe, kae to otiyo gi lony ma en-go e reso ngimani. Donge mano miyo ichako neno owadwano e yo mopogore? Koro ok inene mana kaka jaduong’-kanyaklau kende, to bende inene kaka laktar ma noreso ngimani.

⁵ E yo ma kamano, jolup Yesu bende ne oseng’eyo nying Jehova. Kata kamano, ne gichako neno nyingno e yo mopogore ka ne Yesu yalo e piny kae. Ang’o momiyo wanyalo wacho kamano. En nikech Yesu ne luwo kit Wuon-gi e gik moko duto ma nowacho kendo ma notimo. Kuom mano, joote Yesu ne ong’eyo Jehova e yo maber nikech ne giwinjo kaka Yesu ne puonjo kendo neno kaka ne odewo jomamoko.—Joh. 14:9; 17:3.

“NYINGI MISEMIYA”

6. Jehova ne omiyo Yesu nyinge e yo mane? (Johana 17:11, 12)

⁶ Yesu ne olemo e lo jopuonjrene kowacho kama: “Ritgi nikech nyingi misemiya.” (Som Johana 17:11, 12.) Be mano nyiso ni koro Yesu e ma ne en Jehova? Ooyo. Ne ni ka ne Yesu wuoyo e wi Jehova e lamo, nowacho ni “nyingi.” Omiyo Yesu ne ok okawo nying Jehova kaka mare. Kare Yesu ne temo wacho ang’o ka ne owacho ni osemiye nying Nyasaye? Mokwongo, Yesu e ma ne wuoyo e lo Jehova. Wuon-gi e ma noore kendo notimo tije madongo kotiyo gi nying Wuon-gi. (Joh. 5:43; 10:25) E wi mano, tiend nying Yesu en ni “Jehova En Jares.” Kuom adier, nying Jehova gi Yesu otudore.

7. Ang’o momiyo Yesu ne nyalo wuoyo e nying Jehova? Chiw ane ranyisi.

⁷ Kuom ranyisi, jatelo moro nyalo oro jambetre mondo owuo e loye. Weche ma jambetreno biro wacho nigi teko mana kaka mar jatende. E yo ma kamano, Yesu bende ne nyalo wuoyo e lo Jehova, nikech Jehova e ma noore.—Mat. 21:9; Luka 13:35.

8. Ere kaka Yesu ne oting’o nying Jehova ka ne pok obiro e piny kae? (Wuok 23:20, 21)

⁸ Muma luongo Yesu ni Wach, kendo mano e momiyo ne onyalo tero ote mag Jehova ne malaike gi dhano. (Joh. 1:1-3) Nyalo bedo ni Yesu e malaika ma ne Jehova ooro mondo ota Jo-Israel ka ne giwuok Misri. Jehove ne onyiso Jo-Israel gimomiyo ne onego giwinj malaikano ka nowachonegi niya: “Nikech oting’o nyinga.”a (Som Wuok 23:20, 21.) Yesu ne ‘oting’o’ nying Jehova nikech ne obiro e lo Jehova kendo en e ma Jehova ne tiyo kode ahinya e lando nyingno kendo kete mondo obed maler.

“WUORA, MI NYINGI DUONG’”

9. Yesu ne neno nade nying Jehova? Ler ane.

⁹ Mana kaka waseneno, Yesu ne onyiso ni ogeno nying Jehova ahinya kata ka ne pok obiro e piny kae. Mano e momiyo gik moko duto ma ne Yesu timo ka ne en e piny kae, ne otudore gi nying Jehova! Ka ne Yesu chiegni tieko tije e piny kae, nokwayo Wuon-gi kama: “Wuora, mi nyingi duong’.” Gie sechego, dwond Jehova ne owinjore kowuok e polo ka wacho niya: “Asemiye duong’, kendo abiro miye duong’.”—Joh. 12:28.

10-11. (a) Ere kaka Yesu ne omiyo nying Jehova duong’? (Ne picha bende.) (b) Ang’o momiyo dwarore ni oket nying Jehova obed maler kendo opwodhe?

¹⁰ Yesu bende ne omiyo nying Wuon-gi duong’. Notimo kamano e yo mane? Yo achiel ma notimogo kamano en kuom konyo jomamoko ong’e kido mag Wuon-gi kod tijene. Kata kamano, notimo gimachielo bende. Ne dwarore ni oket nying Jehova obed maler kendo opwodhe.b Yesu nonyiso kaka mano ne en wach maduong’ ka ne opuonjo jopuonjrene kaka onego gilem. Nowacho niya: “Wuonwa manie polo, nyingi mondo obed maler.”—Mat. 6:9.

¹¹ Ang’o momiyo dwarore ni oket nying Jehova obed maler kendo opwodhe? En nikech Satan Jachien ne oketho nying Jehova Nyasaye e puodho mar Eden kendo nowacho miriambo kuome. Satan ne temo wacho ni Jehova en jamiriambo kendo ni ne otuono Adam gi Hawa gima ber. (Cha. 3:1-5) E yo machielo, Satan ne wacho ni Jehova ok tim gik moko e yo makare. Miriambo ma Satan nowachogo noketho nying Jehova achiel kachiel. Bang’e e kinde Ayub, Satan nowacho ni dhano tiyo ne Jehova mana nikech gik ma giyudo koa kuome. Jaketh nyingno ne wacho ni onge dhano moro amora mohero Jehova, ma nyalo dhi nyime tiyone kokalo e tembe. (Ayub 1:9-11; 2:4) Ne dwarore ni kinde okal mondo ji ofweny ni en ng’ano ma ne wacho miriambo e kind Jehova gi Satan.

“ACHIWO NGIMANA”

12. Yesu ne oikore timo ang’o nikech nohero nying Jehova?

¹² Nikech Yesu ne ohero nying Jehova, nodwaro timo duto monyalo mondo opwodh nyingno kendo okete obed maler. Ne owacho kama: “Achiwo ngimana.” (Joh. 10:17, 18) Ee, ne oikore kata tho nikech nying Jehova.c Adam gi Hawa ma ne gin dhano makare ne ong’anyo ne Jehova kendo riwo Satan lwedo. Mopogore kodgi, Yesu noikore biro e piny kendo nyiso ni nohero Jehova. Notimo kamano kuom luwo chike Jehova e gik moko duto ma notimo. (Hib. 4:15; 5:7-10) Nomakore motegno gi Jehova nyaka thone e yadh sand. (Hib. 12:2) Kuom timo kamano, ne onyiso ni ohero Jehova kod nying Nyasaye.

13. Ang’o momiyo Yesu ne nyalo nyiso e yo maber ni Satan en jamiriambo? (Ne picha bende.)

¹³ Gik moko duto ma Yesu notimo, nonyiso ni Satan en jamiriambo to ok Jehova! (Joh. 8:44) Yesu ne ong’eyo Jehova maber moloyo ng’ato ang’ata. Ka dine bed ni weche ma Satan nowacho e wi Jehova ne gin adier, Yesu dine ong’eyo mano. Kata kamano, Yesu ne odhi nyime kedo ne nying Jehova. Kata mana e kinde ma ne nenore ni Jehova oseweye, Yesu ne oikore tho kendo chung’ motegno kor Jehova.—Mat. 27:46.d

“ASETIEKO TICH MA NIMIYA MONDO ATIM”

14. Jehova noguedho Yesu e yore mage nikech nomakore kode?

¹⁴ E otieno mogik ka Yesu pok otho, ne owacho kama e lamo: “Asetieko tich ma nimiya mondo atim.” Ne en gadier ni Jehova ne dhi guedhe nikech ne omakore kode. (Joh. 17:4, 5) Yesu ne ni kare geno kuom Jehova. Jehova ne ok oweye e liel. (Tich 2:23, 24) Nochiero Yesu ma omiye migawo ma malo e polo. (Fil. 2:8, 9) Gikone, Yesu nochako locho kaka Ruoth e Pinyruodh Nyasaye. Pinyruodhno ne dhi timo ang’o? Yesu nochiwo dwoko mar penjono ka ne onyiso jopuonjrene mondo olem kama: “Pinyruodhi mondo obi. Dwaroni [Jehova] mondo otimre e piny kaka timore e polo.”—Mat. 6:10.

15. Ang’o machielo ma Yesu biro timo?

¹⁵ Machiegnini, Yesu biro kedo gi wasik Nyasaye kendo kethogi chuth e lweny mar Har–​Magedon. (Fwe. 16:14, 16; 19:11-16) Mapiyo bang’ mano, obiro wito Satan “e bur matut ma onge giko,” to mano nyiso ni Satan ok bi bedo gi teko mar timo gimoro amora. (Fwe. 20:1-3) Bang’e, Yesu biro locho kuom Higni Aluf Achiel kendo obiro kelo kuwe kod ngima makare e piny. Obiro chiero jomotho. Obiro miyo piny duto obed Paradiso. Dwach Jehova biro chopo!—Fwe. 21:1-4.

16. Ngima biro chalo nade bang’ Loch Yesu mar Higni Aluf Achiel?

¹⁶ Ngima biro chalo nade bang’ Loch Yesu mar Higni Aluf Achiel? Ibiro tiek richo chuth. Koro ok bi chuno ni dhano okwa ng’wono e nying Yesu, kata bedo gi jagach eka gibed gi winjruok maber gi Jehova. Tho bende ok nobedie nikech “jasigu mogik ma ibiro tiek en tho.” Jomotho ibiro chier, kendo liete biro dong’ nono. Ji duto ma biro dak e piny biro bedo gi ngima makare chuth.—1 Kor. 15:25, 26.

17-18. (a) Ang’o ma biro timore e giko Loch mar Higni Aluf Achiel? (b) Ang’o ma Yesu biro timo bang’ tieko locho? (1 Jo-Korintho 15:24, 28) (Ne picha bende.)

¹⁷ Ang’o kendo ma biro timore bang’ Loch Yesu mar Higni Aluf Achiel? E kindeno, gimoro makende biro timore. Nying Jehova biro bedo maler kendo onge ng’ato ang’ata ma biro bedo gi kiawa kuom wachno. Nikech ang’o? E puodho mar Eden, Satan nowacho ni Jehova en jamiriambo kendo ni ok ohero dhano. Chakre kindeno, joma lamo Jehova osenyiso nyading’eny ni loch Jehova e ma ber. E giko Loch mar Higni Aluf Achiel, nying Nyasaye ibiro ket mondo obed maler chuth. Jehova biro nyiso maler ni en Wuoro ma jahera.

¹⁸ Bang’ Loch Yesu mar Higni Aluf Achiel, ji duto biro ng’eyo ni weche ma ne Satan owacho e wi Jehova ne gin miriambo lilo. Ang’o ma Yesu biro timo bang’ Lochne mar Higni Aluf Achiel? Be obiro luwo ranyisi mar Satan kendo ng’anyo ne Jehova? Ooyo! (Som 1 Jo-Korintho 15:24, 28.) Yesu biro duoko Pinyruoth ne Wuon-gi. Obiro bolore ne loch mar Jehova. Ee, mopogore gi Satan, Yesu oikore duoko loch ne Wuon-gi nikech ohero Jehova.

19. Yesu neno nying Jehova nade?

¹⁹ Kare mano e momiyo Jehova ne oikore miyo Yesu nyinge! Yesu osenyiso e yo makare chuth kaka Wuon-gi chalo. Omiyo Yesu neno nade nying Jehova? Ogeno nyingno moloyo gimoro amora. Noikore tho nikech nyingno kendo obiro ikore duoko loch ne Jehova e giko Lochne mar Higni Aluf Achiel. Ere kaka wanyalo luwo ranyisi mar Yesu? Wabiro nono dwoko mar penjono e sula ma luwo.