SULA MAR PUONJRUOK 23
WER 2 Nyingi En Jehova
Gimomiyo Wageno Nying Jehova
“Jehova owacho niya, ‘Un jonenona.’”—ISA. 43:10.
GIMA SULANI WUOYE
E sulani, wabiro neno ting’ ma wan-go mar keto nying Jehova obed maler kendo miye duong’.
1-2. Wang’eyo nade ni Yesu ogeno nying Jehova?
YESU okawo nying Jehova kaka gima duong’ moloyo gimoro amora. Onge ng’ato ang’ata ma osetemo matek mondo nyingno ong’ere kaka Yesu notimo. Mana kaka ne waneno e sula mokalo, Yesu noikore tho nikech nying Jehova kendo nonyiso ni yore duto mag Jehova ni kare. (Mar. 14:36; Hib. 10:7-9) Bang’ Loch mar Higni Aluf Achiel, Yesu biro duoko loch ne Wuon-gi nikech odwaro ni Jehova oyud duong’. (1 Kor. 15:26-28) Yo ma Yesu oherogo Jehova bende nyisowa kaka osiep manie kindgi chalo. Mano nyiso ma onge kiawa ni Yesu ohero Wuon-gi.
2 Yesu nobiro e piny mondo owuo e lo Jehova. (Joh. 5:43; 12:13) Ne okonyo jolupne ng’eyo nying Wuon-gi. (Joh. 17:6, 26) Ka nopuonjo ji kendo timo honni, nonyiso maler ni Jehova e ma nomiye rieko kod teko mar timo honnigo. (Joh. 10:25) Yesu bende nokwayo Jehova mondo orit jolupne ‘nikech nyinge.’ (Joh. 17:11) Koro ka ne Yesu ogeno nying Jehova kamano, ere kaka ng’ato nyalo wacho ni en jalup Kristo madier ka ok ong’eyo nyingno kendo ok oti kode?
3. Ang’o ma wabiro nono e sulani?
3 Nikech wan Jokristo madier, waluwo ranyisi mar Yesu kuom hero nying Jehova kendo miyo nyingno luor. (1 Pet. 2:21) E sulani, wabiro neno gimomiyo joma lando “wach maber mar Pinyruoth” iluongo gi nying Jehova. (Mat. 24:14) Bende, wabiro neno gimomiyo ng’ato ka ng’ato kuomwa onego ogen nying Jehova.
“JO MA ILUONGO GI NYINGE”
4. (a) En tich mane ma Yesu nomiyo jopuonjrene ka ne pok odok e polo? (b) En penjo mane ma wadwaro nono?
4 Mana matin ka Yesu pok odok e polo, nonyiso jopuonjrene niya: “Ubiro yudo teko ka roho maler obiro kuomu, mi unubed jonenona e Jerusalem, kod Judea duto, gi Samaria, nyaka kuonde maboyo mogik e tung’ piny.” (Tich 1:8) Omiyo, jopuonjrego ne dhi lando wach maber kuonde duto, to ok mana e Israel kende. Mano ne dhi miyo joma wuok e ogendni duto thuolo mar bedo jolup Yesu. (Mat. 28:19, 20) Kata kamano, Yesu nowacho niya: “Unubed jonenona.” Be ne dwarore ni jopuonjre manyien-go ong’e nying Jehova, koso ne gidhi mana bedo joneno mag Yesu? Weche ma yudore e Tich Joote sula mar 15 konyowa yudo dwoko mar penjono.
5. Ere kaka joote gi jodongo ma ne ni Jerusalem nonyiso ni ne dwarore ni ji duto ong’e nying Jehova? (Ne picha bende.)
5 E higa mar 49 B.K., joote gi jodongo nochokore Jerusalem mondo gine ane ka be ne ochuno ni joma wuok e ogendni mamoko oter nyangu eka gibed Jokristo. E giko romono, Jakobo ma ne en owadgi Yesu nowacho niya: “[Petro] oselero adimba kaka Nyasaye koro noparo jo ma oa e ogendni mamoko mondo okaw kuomgi jo ma iluongo gi nyinge.” En nying mane ma Jakobo ne wuoye? Nonwoyo weche ma janabi Amos nowacho niya: “Eka mondo jo ma odong’ omany Jehova gi kinda kaachiel gi jo ma oa e ogendni duto ma gin jo ma iluongo gi nyinga, Jehova . . . osewacho.” (Tich 15:14-18) Jopuonjre manyien-go ne ok dhi mana puonjore nying Jehova kende, to ne idhi ‘luonggi gi nyingno.’ Mano nyiso ni ne gidhi konyo jomamoko ng’eyo nyingno, kendo gin bende ne idhi luonggi gi nyingno.
Ka ne bura matayo e kinde Jokristo mokwongo obedo gi romo moro, ne gifwenyo ni dwarore ni Jokristo madier oti gi nying Nyasaye (Ne paragraf mar 5)
6-7. (a) Ang’o momiyo Yesu ne obiro e piny? (b) En wach mane machielo maduong’ ma nomiyo Yesu obiro e piny?
6 Tiend nying Yesu en “Jehova En Jares,” kendo Jehova notiyo gi Yesu e reso ji duto ma ne oketo yie kuome kod Wuode. Yesu nobiro e piny mondo otho ne dhano. (Mat. 20:28) Ka ne Yesu ochulo rawar, nomiyo dhano thuolo mar yudo resruok kod ngima ma nyaka chieng’.—Joh. 3:16.
7 To ang’o momiyo ne dwarore ni ores dhano? En nikech gima notimore e puodho mar Eden. Mana kaka ne waneno e sula mokalo, jonyuolwa mokwongo ma gin Adam gi Hawa, nong’anyo ne Jehova ma gilalo thuolo mar dak nyaka chieng’. (Cha. 3:6, 24) Kata kamano, Yesu nobiro e piny mondo otim gimoro machielo maduong’ moloyo mana reso dhano. Satan noketho nying Jehova. (Cha. 3:4, 5) Omiyo, ne dwarore ni oket nying Jehova obed maler mondo ores nyikwa Adam gi Hawa. Mano ne en wach maduong’ ahinya. Yesu e ma ne nyalo timo kamano nikech ne owuoyo e lo Jehova kendo timo gik moko duto ma Jehova ne dwaro e yo makare chuth.
Ere kaka ng’ato nyalo wacho ni en jalup Kristo madier ka ok ong’eyo nyingno kendo ok oti kode?
8. Ji duto ma ne dhi keto yie kuom Yesu ne onego ong’e wach mane?
8 Ji duto ma ne dhi keto yie kuom Yesu, bed ni gin Jo-Yahudi kata joma oa e ogendni mamoko, ne nyaka yie ni Jehova Nyasaye e ma ne dhi resogi. (Joh. 17:3) Mana kaka Yesu, gin be ne idhi luonggi gi nying Jehova. Ne dwarore ni ging’e gimomiyo keto nying Nyasaye obed maler en gima duong’, nikech mano e ma ne dhi miyo oresgi. (Tich 2:21, 22) Omiyo, jolup Yesu duto nonego ong’e Jehova kod Yesu. Mano e momiyo Yesu notieko lemo kowacho niya: “Asemiyo ging’eyo nyingi kendo abiro miyo nyingi omed ng’ere, mondo eka hera ma ne iherago obed kuomgi, kendo abed e winjruok achiel kodgi.”—Joh. 17:26.
“UN JONENONA”
9. Ere kaka wanyalo nyiso ni nying Jehova en gima duong’ e ngimawa?
9 Chop kae, nenore maler ni mondo waluw ranyisi mar Yesu, nyaka waket nying Jehova obed maler. (Mat. 6:9, 10) Nyaka wane nying Jehova kaka nying maduong’ moloyo nyinge mamoko. Mano oriwo nyaka gik ma watimo. Omiyo, ang’o ma wanyalo timo mondo waket nying Jehova obed maler, kendo nyiso ni weche duto ma Satan nowacho e wi Jehova gin miriambo?
10. En kes mane ma iwuoye e yor ranyisi e Isaya sula mar 42 nyaka 44? (Isaya 43:9; 44:7-9) (Ne picha bende.)
10 Isaya sula mar 42 nyaka 44 nyiso ting’ ma wan-go e keto nying Jehova obed maler. E sulago, iwuoyo e yor ranyisi e wi kes moro ma mulo ratiro ma Jehova nigo mar locho. Jehova nyiso nyiseche ni gitim gima nyiso ni gin nyiseche madier. Bende, ochiwo thuolo mondo joneno mag nyisechego obi onyis ka be nyiseche ma gilamogo gin nyiseche madier. Onge ng’ato ang’ata ma timo kamano!—Som Isaya 43:9; 44:7-9.
Wanyiso ni Jehova en Nyasaye madier kokalo kuom wechewa gi timbewa (Ne paragraf mar 10-11)
11. En wach mane ma Jehova nyiso joge e Isaya 43:10-12?
11 Som Isaya 43:10-12. Jehova nyiso joge niya: “Un jonenona, kendo an e Nyasaye.” Jehova kwayo joge mondo gichiw dwoko mar penjoni: “Be nitie Nyasaye moro mak mana an?” (Isa. 44:8) Wan gi thuolo makende mar chiwo dwoko mar penjono. Wanyiso ni Jehova kende e Nyasaye madier kokalo kuom wechewa gi timbewa. Nyinge ni malo moloyo nyinge mamoko duto. Kokalo kuom timbewa, wanyiso ni wahero Jehova gadier kendo wamakore kode kata Satan kelnwa tembe ma chalo nade. Timo kamano miyowa thuolo mar keto nying Nyasaye obed maler.
12. Ere kaka weche ma nokor e Isaya 40:3, 5 nochopo?
12 Wanyiso ni waluwo ranyisi mar Yesu Kristo sama wakedo ne nying Jehova. Isaya bende nokoro ni nitie ng’at ma ne dhi ‘iko ne Jehova yo.’ (Isa. 40:3) Ere kaka wachno nochopo? Johana Jabatiso noiko ne Yesu yo, ma en e Jal ma nobiro e nying Jehova kendo wuoyo e nying Jehova. (Mat. 3:3; Mar. 1:2-4; Luka 3:3-6) Weche ma nokorgo bende wacho kama: “Duong’ mar Jehova biro fwenyore.” (Isa. 40:5) Ere kaka wechego nochopo? Ka ne Yesu obiro e piny, notimo dwach Jehova e yo makare chuth mana ka gima Jehova owuon e ma nobiro e piny.—Joh. 12:45.
13. Ere kaka wanyalo luwo ranyisi mar Yesu?
13 Mana kaka Yesu, wan bende wan Joneno mag Jehova. Iluongowa gi nying Jehova kendo wapuonjo ji duto ma waromogo gik mabeyo motimo. Mondo watim kamano e yo maber, nyaka wanyis ji migawo ma Yesu nigo e keto nying Jehova obed maler. (Tich 1:8) Yesu e ma nochiwo neno makare chuth e wi Jehova, to wan bende waluwo ranyisine. (Fwe. 1:5) En yo mane machielo ma wanyalo nyisogo ni wageno nying Jehova?
YORE MAMOKO MA WANYISOGO NI WAGENO NYING JEHOVA
14. Mana kaka oler e Zaburi 105:3, waneno nying Jehova nade?
14 Wamor gi nying Jehova. (Som Zaburi 105:3.) Jehova bedo mamor sama wasungo nyinge. (Jer. 9:23, 24; 1 Kor. 1:31; 2 Kor. 10:17) ‘Sungruok kuom Jehova’ nyiso ni wamor ni Jehova en Nyasachwa. Waneno ni en gima kende ahinya miyo nyinge duong’ kendo kedo ne nyingno. Ok onego waluor nyiso joma watiyogo, joma wasomogo, jirendewa, kod jomamoko ni wan Joneno mag Jehova! Jachien dwaro ni wawe wuoyo e wi nying Jehova. (Jer. 11:21; Fwe. 12:17) Satan gi jonabine mag miriambo dwaro ni wi ji owil gi nying Jehova. (Jer. 23:26, 27) Kata kamano, nikech wahero nying Jehova, wabedo moil gi nyingno “odiechieng’ duto.”—Zab. 5:11; 89:16.
15. Luongo nying Jehova tiende en ang’o?
15 Wadhi nyime luongo nying Jehova. (Joel 2:32; Rumi 10:13, 14) Luongo nying Jehova ok en mana ng’eyo nyingno kendo tiyo kode. Oriwo ng’eyo Nyasaye e yo maber kendo geno kuome mondo okonywa kendo otawa. (Zab. 20:7; 99:6; 116:4; 145:18) Bende, walando nyinge kod kido mabeyo ma en-go ne jomamoko, ka wajiwogi ni gilok chunygi kendo gitim gik ma biro miyo Jehova oyie kodgi.—Isa. 12:4; Tich 2:21, 38.
16. Wanyalo nyiso nade ni Satan en jamiriambo?
16 Wayie yudo sand nikech nying Jehova. (Jak. 5:10, 11) Wanyiso ni Satan en jamiriambo sama wamakore motegno gi Jehova e bwo sand. E kinde Ayub, Satan nowacho kama e wi jotich Jehova: “Dhano nyalo chiwo gimoro amora ma en-go mondo ores ngimane.” (Ayub 2:4) Satan ne temo wacho ni dhano nyalo tiyo ne Jehova mana ka ngimagi dhi maber. Kata kamano, ka giromo gi chandruok to gibiro weyo tiyo ne Jehova. Ayub nonyiso maler ni wechego gin miriambo. Wan bende wan gi thuolo mar nyiso maler ni kata Satan temwa e okang’ ma romo nade, ok wabi weyo makore gi Jehova. Wan gadier ni Jehova biro ritowa nikech nyinge.—Joh. 17:11.
17. En yo mane machielo ma wanyalo miyogo nying Jehova duong’ mana kaka ilero e 1 Petro 2:12?
17 Wamiyo nying Jehova duong’. (Nge. 30:9; Jer. 7:8-11) Nikech wan Joneno mag Jehova, gik ma watimo nyalo miyo nying Jehova duong’ kata ketho nyingeno. (Som 1 Petro 2:12.) Omiyo, dwaher timo duto ma wanyalo mondo wapak Jehova kokalo kuom wechewa kod timbewa. Ka watimo kamano, wabiro miyo nying Jehova duong’ kata obedo ni wan dhano morem.
18. En yo mane machielo ma wanyalo nyisogo ni wageno nying Jehova? (Ne bende weche moler piny.)
18 Nying Jehova e gima duong’nwa moloyo nyingwa. (Zab. 138:2) Ang’o momiyo mano en gima duong’? Jomoko nyalo chako ketho nyingwa nikech wahero Jehova.a Nikech Yesu ne dwaro miyo nying Jehova duong’, noikore tho kaka ja mahundu, ma en tho ma kelo wich-kuot. Ne ‘ochayo wich-kuot’ nikech ne ok oparore mokalo tong’ e wi gik ma ji ne wacho kuome. (Hib. 12:2-4) Noketo pache duto e timo dwach Nyasaye.—Mat. 26:39.
19. Ineno nade nying Jehova, to nikech ang’o?
19 Wamor tiyo ne Jehova, kendo bedo jotichne miluongo gi nyinge. Mano e momiyo waikorega tiyone kata ka jomoko jarowa. Nying Jehova e gima duong’ moloyo kata weche ma jomoko wacho kuomwa. Omiyo, wadhiuru nyime pako nying Jehova kata Satan tim ang’o. Ka watimo kamano, wabiro nyiso ni wageno nying Jehova mana kaka Yesu Kristo notimo.
WER 10 Pakuru Jehova Nyasachwa!
a Kata mana Ayub bende ne ochako parore mokalo tong’ ka ne osiepene moko adek owacho ni otimo gimoro marach. Mokwongo okwongo, ka ne nyithind Ayub otho kendo olalo mwandune duto, “ne ok oketho kata wacho ni Nyasaye otimo marach e yo moro amora.” (Ayub 1:22; 2:10) Kata kamano, ka ne osiepene moko adek owacho ni otimo gimoro marach, ‘ne orikni wuoyo.’ Noketo pache ahinya e loso nyinge moloyo miyo nying Jehova duong’.—Ayub 6:3; 13:4, 5; 32:2; 34:5.