Be Puonj mag Mise mag Muma Pod Nyalo Konyi?

1. Adiera mag Muma ma nihango puonjori nomulo ngimani nade?

ADIERA mag Muma ma ne wahango puonjore oseloko ngimawa. Kuom ranyisi, bang’ puonjore ni nying Nyasaye en Jehova, ne wachako timo gik ma chwalowa bedo osiepene. (Isa. 42:8) Ka ne wapuonjore e wi gima timore ne ng’ato sama otho, ne wafwenyo ni osiepewa kod wedewa mosetho ok sandre kamoro. (Ekl. 9:10) Bende, ka ne wapuonjore ni Nyasaye singo ni pinyni biro bedo Paradiso, chunywa noweyo chandore nikech kinde ma biro. Ne wabedo gadier ni wanyalo dak nyaka chieng’, to ok mana kuom higni 70 kata 80 kende.—Zab. 37:29; 90:10.

2. Ere kaka 2 Petro 1:​12, 13 nyiso ni kata mana Jokristo motegno nyalo yudo ber kuom puonj mag mise?

² Ok onego wakaw mayot adiera mag Muma ma ne wahango puonjorego. Jaote Petro nondiko barupe mar ariyo ne Jokristo ma ‘nosegurore motegno e adiera.’ (Som 2 Petro 1:​12, 13.) Kata kamano, e kindego ne nitie jopuonj mag miriambo ma nosieko e kanyakla ma ne dwaro ketho yie mar owete. (2 Pet. 2:​1-3) Petro ne dwaro tego yie mar Jokristo wetene mondo gikwed joma kamago. Mano e momiyo noparonegi adiera moko ma ne gisepuonjore chon. Puonjgo ne dhi konyogi siko ka gimakore gi Jehova nyaka giko.

3. Chiw ane ranyisi ma nyiso gimomiyo Jokristo duto onego odhi nyime paro matut kuom puonj mag mise mag Muma.

³ Kata obedo ni wasetiyo ne Jehova kuom higni mang’eny, pod wanyalo yudo ber ka wanono puonj mag mise mag Muma. Kuom ranyisi, jatedo molony kod jatedo ma eka chako puonjore tedo nyalo tiyo gi gik ma chalre sama gitedo chiemo moro. Kata kamano, jatedo molonyno ong’eyo kaka onyalo tedo chiemo mopogore opogore kendo mamit kotiyo mana gi gik tedo ma en-go. E yo ma chalo kamano, joma osetiyo ne Jehova kuom higni mang’eny nyalo yudo puonj mathoth e ndiko moro kopimgi gi joma eka ochako puonjore adiera. Nyalo bedo ni ngimawa kata migepe ma wan-go e tij Jehova oselokore chakre ne batiswa. Ka watiyo gi puonj mag Muma ma ne wapuonjore chon, wanyalo fwenyo yore manyien ma puonjgo nyalo konyowago. Wane ane gik ma Jokristo motegno nyalo puonjore kuom puonj moko adek mag mise mag Muma.

JEHOVA E JACHUECH

4. Ere kaka ng’eyo ni Jehova e Jachuech osemulo ngimawa?

⁴ Muma wacho ni “jal ma ne ogero gik moko duto en Nyasaye.” (Hib. 3:4) Wang’eyo ni Jachuech mariek kendo ma nigi teko e ma nochueyo pinywani kod gik moko duto manie iye. Ong’eyowa maber nikech en e ma nochueyowa. To maduong’ie moloyo, odewowa gadier. Ong’eyo gik ma nyalo kelonwa ber. Ng’eyo mana ni Jehova e Jachuechwa, osemulo ngimawa e okang’ maduong’ kendo mano osekonyowa ng’eyo gimomiyo nochuewa kod kaka wanyalo tiyo gi ngimawa e yo maber.

5. En adiera mane ma nyalo konyowa bedo joma bolore? (Isaya 45:​9-12)

⁵ Ng’eyo ni Jehova e Jachuech nyalo konyowa bedo joma bolore. Ka ne Ayub ochako bedo gi paro ma ok kare kuom Jehova kod kuome owuon, Jehova noparone ni en e Jachuech kendo Nyasaye Manyalo Duto. (Ayub 38:​1-4) Wachno noparo ne Ayub ni yore mag Jehova ni malo ahinya moloyo yore mag dhano. Janabi Isaya bende ne nigi paro kaka mano ka nondiko niya: “Be lowo dipenj Jachue-Agulu ni, ‘Ichueyo ang’o?’”—Som Isaya 45:​9-12.

6. Gin kinde kaka mage ma ber ka waparo matut e wi rieko kod teko ma Jachuechwa nigo? (Ne pichni bende.)

⁶ Bang’ ka ng’ato osetiyo ne Jehova kuom higni mang’eny, onyalo chako genore owuon kar geno Jehova kod Wachne ma en Muma. (Ayub 37:​23, 24) To nade ka ng’at ma kamano oparo matut kuom rieko kod teko ma Jehova nigo ma ok nyal pim gi gimoro amora? (Isa. 40:22; 55:​8, 9) Mano nyalo konye siko kobolre kendo tang’ mondo kik ogen riekone owuon.

7. Ang’o ma Rahela notimo ka ne tekne rwako lokruok moro ma riwruokwa notimo?

⁷ Nyaminwa Rahela modak e piny Slovenia nofwenyo ni paro matut e wi Jachuechne osekonye rwako lokruoge mosetim e riwruogwa. Owacho kama: “Ne ok yotnaga kinde duto luwo kaka owete ma tayo chikowa. Kuom ranyisi, kata bang’ neno Ripot mar 8 mar Bura Matayo ma 2023, pod nabwok ahinya ka naneno ka owadwa moro mopidho tike golo twak. Nalemo ka akwayo Jehova mondo okonya arwak lokruogno.” Rahela nofwenyo ni nikech Jehova e Jachuech mar polo gi piny, ong’eyo yo maberie mogik monyalo tayogo riwruokne. Ka po ni ok yotni rwako yo moro manyien mitayowago kata lokruok moro motim, donge inyalo bolori kendo paro matut kuom rieko kod teko ma Jachuechwa nigo?—Rumi 11:​33-36.

GIMOMIYO NYASAYE OWEYO MONDO CHANDRUOK OBEDIE

8. Ng’eyo gimomiyo Nyasaye oweyo mondo chandruok obedie osekonyi nade?

⁸ Ang’o momiyo Nyasaye oweyo mondo chandruok obedie? Moko kuom joma ok ong’eyo dwoko mar penjono osesin gi Nyasaye kata wacho ni Nyasaye onge! (Nge. 19:3) Mopogore gi mano, isepuonjori ni richo monyuolwago kod bedo joma orem e ma miyo dhano chandore, to ok Jehova. Isepuonjori bende ni horuok mar Jehova osemiyo ji mang’eny ong’eye kendo jogo osepuonjore kaka Jehova biro tieko chandruoge chuth e kinde ma biro. (2 Pet. 3:​9, 15) Adierago osejiwi kendo konyi sudo machiegni gi Jehova.

9. Gin kinde kaka mage ma dwarore ni wapar matut kuom gimomiyo Jehova oweyo mondo chandruoge obedie?

⁹ Dwarore ni wahore sama warito Jehova mondo otieknwa chandruoge. Kata kamano, sama wedewa kata osiepewa kalo e chandruoge moko kata itimonegi gik ma ok kare, iwa nyalo wang’ nikech waparo ni Jehova deko kawo okang’ mar konyogi. (Hab. 1:​2, 3) E kinde kaka mago, ber paro matut gimomiyo Jehova oweyo mondo jo makare ochandre.a (Zab. 34:19) Bende, wanyalo paro matut kuom gimomiyo osingo ni obiro tieko chandruoge duto.

10. Ang’o mosebedo ka konyo Anne nyagore gi kuyo bang’ tho min-gi?

¹⁰ Ng’eyo adiera e wi gimomiyo wachandore nyalo konyowa nano. Nyaminwa Anne modak e chula mar Mayotte ma yudore Indian Ocean, wacho kama: “Nakuyo ahinya ka ne minwa otho higni matin mokalo. Kata kamano, pile ka pile atemoga matek mondo apar ni Jehova ok e ma kelnwa chandruoge. Ogombo ahinya tiekonwa chandruoge kaachiel gi chiero wedewa kod osiepewa mosetho. Paro matut e wi adierago hoyaga kendo miyo chunya bedo mokuwe.”

11. Ere kaka ng’eyo gimomiyo Nyasaye oweyo mondo chandruoge obedie chwalowa dhi nyime gi tijwa mar lendo?

¹¹ Ng’eyo gimomiyo Nyasaye oweyo mondo chandruoge obedie nyalo chwalowa dhi nyime gi tijwa mar lendo. Bang’ ka jaote Petro noselero kaka horuok mar Jehova miyo joricho loko chunygi, nomedo niya: “Onego ubed gi timbe maler kod timbe ma nyiso ni uluoro Nyasaye.” (2 Pet. 3:11) Achiel kuom ‘timbe ma nyiso ni waluoro Nyasaye’ en tijwa mar lendo. Wan bende wahero dhano wetewa mana kaka Wuonwa manie polo. Wagombo ni gin bende gibi gidag e piny manyien ma biro. Jehova osebedo ka hore mondo joma odak e alworau oyud thuolo mar lame. To mano kaka in gi thuolo ma jaber mar tiyo kanyachiel gi Nyasaye kendo konyo ji mang’eny kaka nyalore mondo gipuonjre e wi Jehova ka pok giko ochopo!—1 Kor. 3:9.

WADAK E “NDALO MAG GIKO”

12. Ng’eyo ni wadak e “ndalo mag giko” osekonyowa nade?

¹² Muma nyiso maler kido ma ji ne dhi bedogo e “ndalo mag giko.” (2 Tim. 3:​1-5) Ka wang’iyo gik ma timore e kindewagi, waneno kaka weche ma nokorgo chopo. Neno kaka jomaricho medo mana timo gik maricho, miyo wabedo gadier gi weche manie Muma.—2 Tim. 3:​13-15.

13. Ka luwore gi ngero ma Yesu nogoyo e Luka 12:​15-21, gin penjo mage monego wapenjre?

¹³ Ng’eyo ni wadak e ndalo mag giko konyowa ng’eyo gik monego waket mokwongo e ngimawa. Wanyalo neno gimomiyo dwarore ni watim kamano ka wanono ngero moro ma Yesu nogoyo e Luka 12:​15-21. (Som.) Ang’o momiyo noluong jamwanduno ni “ng’at mofuwo”? Ok nikech mwanduge, to en nikech gik ma noketo mokwongo e ngimane. Ng’atno ‘nokano mwandu ne en owuon, to ne ok en jamwandu e wang’ Nyasaye.’ Mano ne en tim fuwo. Nikech ang’o? Nyasaye nonyise niya: “E otienoni gidwaro ngimani.” Nikech giko mar pinyni sani okayo machiegni ahinya, onego wapenjre kama: ‘Gik ma agombo timo nyiso ni aketo ang’o mokwongo e ngimana? Gin gik mage ma daher ni nyithinda otim? Be atiyo gi tekona kod thuolona e timo mana gik ma konya awuon kar kano mwanduna e polo?’

14. Ranyisi mar Miki konyowa nade ng’eyo gimomiyo onego wapar matut e wi gik ma nyiso ni wadak e ndalo mag giko?

¹⁴ Ka waparo matut e wi gik ma nyiso ni wadak e ndalo mag giko, wabiro timo yiero mabeyo kendo tiyo gi ngimawa e yo maber. Mano e gima nyaminwa moro miluongo ni Miki notimo. Owacho kama: “Ka ne atieko somba e sekondar, nagombo ni ayudie tich ma ne nyalo miyo amed puonjora weche mathoth e wi le. To komachielo, nagombo bedo painia mapile kendo dhi lendo kama jolendo dwaroree moloyo. Owete gi nyimine motegno e yie nonyisa ni apar matut ka be tich ma nagombo tiyono ne dhi konya chopo gombona mar tiyo ne Jehova kuom thuolo momedore. Ne giparona ni pinyni ochomo gikone. To e piny manyien abiro bedo gi thuolo mar puonjra gik mathoth e wi le nyaka chieng’. Omiyo, nayiero kos ma ne dhi kawo kinde matin kendo ma ne adhi yudoe tiegruok moro. Mano nokonya yudo tich ma ne anyalo tiyo ka e sechego bende an japainia mapile, kendo bang’e nachiwora dhi e piny Ecuador, kama jolendo ne dwaroree moloyo.” Miki sani tiyo gi chwore ma en jarit-alwora e pinyno.

15. Be ochuno ni ji orwak wach maber sama ilendonegi? Chiw ane ranyisi. (Ne pichni bende.)

¹⁵ Chunywa ok onego onyosre ka po ni ji ok orwako wach ma walando. Ji lokorega. Par ane gima notimore ne owadgi Yesu ma niluongo ni Jakobo. Nodongo kanyachiel gi Yesu, noneno ka Yesu bedo Mesia, kendo noneno kaka nopuonjo e yo ma onge ng’ato ang’ata ma ne puonjogo. Kata kamano, kuom higni mang’eny Jakobo ne ok obedo jalup Yesu. Jakobo nobedo japuonjre bang’ ka nosechier Yesu, kendo ne en jakinda ahinya!b (Joh. 7:5; Gal. 2:9) Kik chunyi jog mana nikech isebedo kilendo ne wedeni kata jomamoko e alwora ma ji ok rwakie wach Pinyruoth. Par ni onego walend mapiyo nikech wadak e ndalo mag giko. Gik ma inyisogi sani nyalo miyo gikaw okang’ bang’e, samoro kata ka masira maduong’ osechakore.c

SIK KIGOYO EROKAMANO NE GIK MA JEHOVA PARONWA

16. Gik ma Jehova paronwa osekonyi nade? (Ne sanduk ma wiye wacho ni “Ti Kodgi e Konyo Jomamoko.”)

¹⁶ Moko kuom chiemb chuny ma riwruogwa miyowa olos ne joma pok owinjoga puonj mag mise mag Muma. Kuom ranyisi, twege mag ji duto migologa juma ka juma, sula kod vidio moko manie jw.org, kod gasedewa kaka Amkeni! kod Ohinga mar gocho mar ji duto, olosga ne joma ok gin Joneno. To e ma pod weche manie bugego kod vidiogo konyowaga. Gikonyowa medo hero Jehova, tego yiewa kuom Wachne, kendo medo lony sama wapuonjo jomamoko adierago.—Zab. 19:7.

17. Gin kinde kaka mage ma dwarore ni ipar moko kuom puonj mag mise manie Muma?

¹⁷ Wabedoga mamor ahinya sama omed lernwa tiend Ndiko moro. Kata kamano, wagoyo ne Jehova erokamano ahinya kuom puonj mag mise ma ne wahango puonjore. Mana kaka wasepuonjore, adierago pod nyalo konyowa nyaka sani. Omiyo, sama riwruokwa otimo lokruok moro to waneno ka teknwa rwako lokruogno, dwarore ni wabolre kendo paro ni Jehova e Jachuech ma nigi rieko kod teko, kendo en e motayo riwruok mare. Sama osiepewa kata wedewa kalo e tembe, wanyalo hore kendo paro gimomiyo Jehova oweyo mondo chandruoge obedie. Bende, sama wadwaro ng’ado kaka wabiro tiyo gi thuolowa kod mwanduwa, dwarore ni wapar ni giko mar pinyni okayo machiegni. Mad weche ma Jehova paronwa odhi nyime tegowa, jiwowa, kendo miyowa rieko.