Be ‘Isepuonjori Bedo Ng’at ma Gik’ ma En-go Romo?

1. Tiend bedo ng’at ma gik ma en-go romo en ang’o?

BE IMOR gi gik ma in-go? Ng’at mamor gi gik ma en-go winjoga kamano nikech ogoyo erokamano ne Jehova kuom gik mosemiye. Iye ok wang’ kendo ok owinj marach mana nikech nitie gik ma oongego. Kata kamano, bedo ng’at ma gik ma gin-go romo ok nyis ni wabed joma chunygi ng’ich kata ma piny romrenegi. Kuom ranyisi, en gima owinjore ka Jakristo moro manyo thuolo mag tiyo ne Jehova e okang’ momedore. (Rumi 12:1; 1 Tim. 3:1) Kata kamano, ka po ni migawo moro mogombo ok ochopo mapiyo kaka noparo, mano ok onego omaye mor ma en-go.

2. Ang’o ma nyalo timorenwa ka gik ma wan-go ok oromowa?

² Ka gik ma wan-go ok romwa, wanyalo timo yiero maricho. Wanyalo tiyo kuom seche mang’eny ahinya mana mondo wayud gige ringruok ma samoro ok ochuno. Gima lit en ni nitie Jokristo moko mosekwalo pesa kata gik mamoko ma ne gigombo. Nyalo bedo ni ne giwacho e chunygi ni, ‘Awinjora bedo gi gini,’ kata, ‘Aserito moromo,’ kata ni, ‘Abiro chulo pesano bang’e.’ Kata kamano, kit kuwo moro amora kethoga nying Jehova. (Nge. 30:9) Jomoko to chunygi osenyosore ma giweyo lamo Jehova mana nikech ne ok giyudo migawo moro ma ne gigombo. (Gal. 6:9) Ang’o ma dimi Jakristo mosechiwore ne Jehova otim gima kamano? Nyalo bedo ni nosechako gombo ahinya gik ma oongego.

3. En puonj mane ma yudore e Jo-Filipi 4:​11, 12 ma wanyalo bedogo gadier?

³ Waduto wanyalo bedo mamor gi gik ma wan-go. Jaote Paulo nowacho ni ‘nosepuonjore bedo ng’at ma gik moko romo e kit ngima moro amora.’ (Som Jo-Filipi 4:11, 12.) Nondiko wechego ka ne en e jela. Kata kamano, ne pok olalo mor ma ne en-go e tij Nyasaye. ‘Nosepuonjore bedo ng’at ma gik’ ma en-go romo. Weche ma Paulo nowachogo kaachiel gi gik mamoko mosetimore e ngima jomoko, nyiso ni wan bende wanyalo puonjore bedo joma gik ma wan-go romo. Bedo ng’at ma gik ma en-go romo ok bi abia kende, to en gima ng’ato nyaka puonjre. E yo mane? Wanonuru ane kido ma nyalo konyowa bedo joma mor gi gik ma wan-go.

BED NG’AT MA GOYO EROKAMANO

4. Ere kaka goyo erokamano konyowa bedo joma gik ma wan-go romo? (1 Jo-Thesalonika 5:18)

⁴ Ng’at ma gik ma en-go oromo goyoga erokamano. (Som 1 Jo-Thesalonika 5:18.) Kuom ranyisi, ka wagoyo erokamano kuom gik mochuno ma wan-go e ngima, ok wabi keto pachwa ahinya kuom gik ma waongego. Ka wagoyo erokamano ne Jehova kuom migepe ma sani omiyowa, mano biro konyowa timo migepego e yo maber kar keto pachwa kuom migepe ma waongego. Mano e momiyo Ndiko jiwowa ni wago ne Jehova erokamano sama walemo! Bedo joma goyo erokamano konyowa yudo “kuwe mar Nyasaye ma loyo ng’eyo duto.”—Fil. 4:​6, 7.

5. Ang’o momiyo Jo-Israel nonego ogo ne Jehova erokamano? (Ne picha bende.)

⁵ Ne ane gima notimore ne Jo-Israel. Ne giywagore ne Jehova nyading’eny ka giwacho ni ne gigombo chiemo ma ne gichamoga ka gin Misri. (Kwan 11:​4-6) En adier ni dak e thim ne ok yot. Ang’o ma dine okonyogi bedo joma gik ma gin-go romo? Ne dwarore ni gipar kendo gigo erokamano ne gik ma Jehova nosetimonegi. E kinde ma ne isandogi malit ka gin wasumbni e piny Misri, Jehova nogoyo Jo-Misri gi masiche apar. Ka nogony Jo-Israel, ne giyako mwandu mag Jo-Misri kaka fedha, dhahabu, gi lewni. (Wuok 12:​35, 36) Ka ne Jo-Misri olawogi nyaka e dho Nam Makwar, Jehova nobaro pige mag namno e yor hono. Bende, pile ka pile nopidhogi gi manna ka ne gin e thim. Kare ang’o momiyo Jo-Israel ne ywagore ni gionge chiemo? Jo-Israel ne nigi chiemo, en mana ni ne ok gigoyo erokamano kuom gik ma ne gin-go.

6. Ang’o ma nyalo konyowa bedo joma goyo erokamano?

⁶ Ang’o ma nyalo konyi bedo ng’at ma goyo erokamano? Mokwongo, ket thuolo tenge mar paro gik momori odiechieng’ kodiechieng’. Inyalo kata ndiko piny gik moko ariyo kata adek minyalo goyoe erokamano. (Ywa. 3:​22, 23) Mar ariyo, go erokamano. Kaw okang’ mokwongo mar goyo erokamano ne jomamoko kuom gik ma gitimoni. To maduong’ moloyo, go ne Jehova erokamano pile. (Zab. 75:1) Mar adek, mak osiep gi joma ohero goyo erokamano. Ka wamako osiep gi joma kamago, to wabiro bedo joma goyo erokamano. (Rap. 1:​26-28; 2 Tim. 3:​1, 2, 5) Ka wamanyo thuolo mag goyo erokamano, gik ma wan-go biro romowa, kendo chunywa ok gi nyosore nikech gik ma waongego.

7. Ang’o ma nokonyo nyaminwa moro bedo ng’at ma goyo erokamano?

⁷ Ne ane gima notimore ne Nyaminwa Aci modak e piny Indonesia. Owacho kama: “E kinde tuo mar Korona nachako pimo ngimana kod ngima Jokristo wetena. Mano nomiyo achako gombo gik ma ne aongego.” (Gal. 6:4) Ang’o ma nokonye loko paro ma ne en-go? Owacho niya: “Nachako kwano gueth ma nayudo pile ka pile, kendo paro matut kuom gik ma naseyudo e riwruok mar oganda Jehova. Kae to nagoyo erokamano ne Jehova. Mano nomiyo abedo mamor gi gik ma ne an-go.” Ka po ni in bende samoro ok imor gi chal ma interee, donge inyalo kawo okenge ma nyaminwano nokawo mondo ibed mamor kendo?

BED GI PARO MALONG’O KENDO ISIK KIBOLORI

8. En obadho mane ma Baruk nodonjoe?

⁸ Kinde moro, Baruk ma ne en jagoro mar janabi Jeremia nodonjo e obadho moro. Migawo ma Baruk ne timo ne ok yot nikech ne dwarore ni okony Jeremia e kinde ma ne olando ote mager ne oganda ma noseng’anyo ne Jehova. Kata kamano, nitie kinde ma nochako bedo gi paro ma ok kare. Kar keto pache kuom dwach Jehova, Baruk nochako keto pache kuom dwache owuon. Jehova notiyo gi Jeremia e nyiso Baruk niya: “We manyo gik madongo ma chunyi gombogo.” (Jer. 45:​3-5) Ne chalo ka gima Jehova nyise niya: “Bed mamor gi gik ma in-go.” Baruk norwako siemno kendo nodhi nyime bedo osiep Jehova.

9. Ka luwore gi 1 Jo-Korintho 4:​6, 7, bolruok biro konyowa paro ang’o? (Ne pichni bende.)

⁹ Nitie sama Jakristo moro nyalo paro ni en gi ratiro mar yudo migawo moro. Nyalo bedo ni en gi lony moko, ojakinda, kendo osetiyo ne Jehova kuom higni mang’eny. To nade ka omi jomamoko migawo mogombono? Ang’o ma nyalo konye mondo kik chunye nyosre? Onyalo paro matut kuom weche ma jaote Paulo nondiko e 1 Jo-Korintho 4:​6, 7. (Som.) Jehova e ma miyowaga lony kod migepe ma wan-go. To ok omiga ng’ato gigo nikech ober moloyo jomamoko. Kar mano, Jehova miyowa lony kod migepe nikech ng’wonone mogundho.—Rumi 12:​3, 6; Efe. 2:​8, 9.

10. Ang’o ma nyalo konyowa bedo gi kido mar bolruok?

¹⁰ Paro ranyisi ma Yesu noketonwa nyalo konyowa bedo gi kido mar bolruok. Ne ane gik ma notimore e otieno ma Yesu nolwokoe tiende jootene. Jaote Johana nondiko niya: “Nikech Yesu nong’eyo ni [1] Wuoro nosechiwo gik moko duto e lwete, [2] ni noa ir Nyasaye kendo [3] ne odhi dok ir Nyasaye, noa malo . . . mi ochako lwoko tiende jopuonjrene.” (Joh. 13:​3-5) Yesu ne nyalo nyiso jopuonjrene ni gilwokne tiendene. Kata kamano, e ngimane duto ka ne en e piny, onge chieng’ ma noparo ni en gi ratiro mar yudo gik mabeyo mana nikech en Wuod Nyasaye. (Luka 9:58) Yesu nobolore kendo gik ma ne en-go norome. Noketonwa ranyisi maber monego waluw.—Joh. 13:15.

11. Ere kaka kido mar bolruok osekonyo Dennis?

¹¹ Owadwa Dennis modak e piny Netherlands temoga matek mondo onyis kido mar bolruok kaka Yesu, kata kamano, ok yotnega nyiso kidono kinde duto. Owacho kama: “Seche moko awinjoga marach ka ng’at machielo oyudo migawo moro ma nagombo. Sama gima kamano otimore, ajatimoga nonro e wi kido mar bolruok. Asechoko ndiko moko ma wuoyo e wi bolruok e JW Library^® mondo ayudgi mapiyo kendo somogi nyadinwoya. Bende, asetoko twege moko ma wuoyo e wi bolruok ma ajawinjoga nyadinwoya.a Asepuonjora ni gimoro amora ma atimo onego omi Jehova duong’, to ok an. Ng’ato ka ng’ato kuomwa omako kamoro e chopo dwach Jehova.” Ka po ni chunyi osechako nyosore nikech pok iyudo migawo moro misebedo kigombo, kaw okenge ma biro konyi bedo gi kido mar bolruok. Timo kamano biro miyo iteg winjruokni gi Jehova, kendo ibiro bedo mamor gi gik ma in-go.—Jak. 4:​6, 8.

PAR MATUT KUOM GENO MA IN-GO

12. En geno mane ma konyowa bedo mamor gi gik ma wan-go? (Isaya 65:​21-25)

¹² Wabedoga mamor gi gik ma wan-go ka waparo matut gik ma Jehova osingonwa e kinde ma biro. E bug Isaya, Jehova nyisowa ni ong’eyo maber chandruoge ma wakaloe, kendo ni machiegnini obiro golo chandruogego duto. (Som Isaya 65:​21-25.) Wabiro dak e ute mabeyo. Wabiro tiyo tije ma kelonwa mor, wabiro chamo chiemo mabeyo kendo mamit. Ok wabi dak ka waluoro gik maricho ma nyalo timorenwa kata ne nyithindwa. (Isa. 32:​17, 18; Eze. 34:25) To mano kaka ngima maber oritowa nyime!

13. Gin kinde kaka mage ma nyalo dwarore ni wapar matut e wi genowa?

¹³ Magi e kinde monego waparie matut e wi genowa ma kinde ma biro moloyo kinde moro amora. Nikech ang’o? En nikech wadak e “ndalo mag giko” ma gin “kinde matek ahinya,” kendo mopong’ gi chandruoge mathoth. (2 Tim. 3:1) Pile ka pile, Jehova tayowaga kendo omiyowa teko mondo wadhi nyime nano. (Zab. 145:14) E wi mano, geno ma wan-go nyalo konyowa ahinya sama waromo gi chandruoge madongo. Nyalo bedo ni sani chuni tiyo matek mondo ipidh joodi. Be ibiro dak e ngima ma kamano nyaka chieng’? Ooyo ngang’! Jehova osingo ni obiro miyi gik michando duto, kendo obiro medoni mang’eny moloyo e Paradiso. (Zab. 9:18; 72:​12-14) Samoro inyagori gi tuo moro ma miyi rem ahinya, tuoche mag paro, kata tuoche mamoko ma ok changi. Be tuochego biro chandi kamano nyaka chieng’? Ooyo ngang’! Tuoche kod tho ibiro gol e piny manyien ma Nyasaye osingo. (Fwe. 21:​3, 4) Genono konyowa mondo kik wabed gi mirima kata jok gi ngima e kindegi. Wanyalo siko ka wamor kata sama otimnwa gik ma ok kare, walalo mwanduwa, wanyagore gi tuo moro, kata sama waromo gi tembe mamoko. Nikech ang’o? En nikech kata warom gi pek madongo manade, wang’eyo ni “masiche ma wayudo gin ma kadho piyo,” kendo ni gichiegni lal nono e piny manyien.—2 Kor. 4:​17, 18.

14. Ere kaka wanyalo tego genowa?

¹⁴ Nikech geno konyowa bedo mamor gi gik ma wan-go, ere kaka wanyalo tego genowa? Nitie joma rwakoga angolo mondo okonygi neno gik man mabor e yo maler. E yo ma chalo kamano, nyalo dwarore ni wakaw okenge moko ma nyalo konyowa neno piny manyien e yo maler. Ka po ni weche mag yuto miyowa parruok mokalo tong’, wanyalo paro kaka ngima biro chalo e kinde ma ok bi chuno ni wanyiew gi moko gi pesa, wabed gi gope, kata chandore nikech dhier. Ka po ni chunywa onyosore nikech migepe moko ma wagombo to pok wayudo, wanyalo paro kaka gik ma kamago gin gik matindo ahinya kopim gi ngima makare ma wabiro bedogo nyaka chieng’. (1 Tim. 6:19) Samoro wanyalo yudo ka teknwa paro e wi ngima ma kinde ma biro nikech waketo pachwa ahinya kuom gik ma timorenwa sani. Kata kamano, ka wasiko waparo e wi ngima maberno, biro bedonwa mayot golo pachwa kuom chandruoge ma waromogo.

15. Weche ma Nyaminwa Christa owacho puonji ang’o?

¹⁵ Ne ane kaka geno osekonyo Nyaminwa Christa, ma en jaod Dennis, ma ne wasewuoyo kuome. Christa wacho kama: “An gi tuo moro ma miyoga lechena bedo ma yomyom, kendo chunaga tiyo gi wheelchair kata nindo kuom seche mang’eny. An-ga gi rem mang’eny pile ka pile. Laktar nyocha onyisa ni ok abi chango. To mana mapiyo nawacho e chunya ni, ‘Ok ong’eyo geno ma an-go mar kinde ma biro.’ Aketo pacha duto e genono, kendo mano miyo an gi chuny mokuwe. Sani, chuna nyagora gi chandruoge ma aromogo, kata kamano, e piny manyien abiro dak maber ma onge chandruok kata achiel!”

“JO MOLUORE YUDO GIK MOKO DUTO MA GIDWARO”

16. Ang’o momiyo Daudi ne nyalo wacho ni jo moluoro Jehova “yudo gik moko duto ma gidwaro”?

¹⁶ Pod wabiro yudo chandruoge moko kata obedo ni gik ma wan-go oromowa. Kuom ranyisi, par ane gima notimore ne Ruoth Daudi. Nyithinde adek notho, nohangne wach, nondhoge, kendo nochune dak e thim kuom higni mang’eny ka ne Ruoth Saulo dwaro nege. To e ma pod nomor gi gik ma ne en-go, mowacho kama e wi Jehova: “Jo moluore yudo gik moko duto ma gidwaro.” (Zab. 34:​9, 10) Ang’o momiyo nonyalo wacho kamano? En nikech nong’eyo ni kata obedo ni Jehova ne ok ogeng’one chandruoge ma noyudo, pod nomiye gik moko duto ma nodwaro. (Zab. 145:16) Mana kaka Daudi, wanyalo bedo gadier ni Jehova biro konyowa nano e tembe duto ma waromogo. Wanyalo bedo gi mor kod chuny mokuwe kata ang’o ma timrenwa.

17. Ang’o momiyo ing’ado e chunyi ni ibiro puonjori bedo ng’at mamor gi gik ma en-go?

¹⁷ Jehova dwaro ni ibed mamor gi gik ma in-go. (Zab. 131:​1, 2) Ng’ad e chunyi ni ibiro puonjori bedo ng’at mamor gi gik ma in-go. Ka in ng’at ma goyoga erokamano, in gi paro malong’o kendo ibolori, kendo isiko kitego geno mari, inyalo wacho gi chir niya: “Mwandu mosemiya oroma.”—Zab. 16:​5, 6.