Kaka Jehova Konyowa Nano

1. Gin chandruoge kaka mage ma jotich Jehova romogo e kindegi, to en ng’a ma nyalo konyogi nano? (1 Petro 5:10)

E KINDE matek mag gikogi, jotich Jehova romo gi chandruoge mang’eny ma dwarore ni gidhi nyime nanoe. Moko kuomgi osetuore kuom kinde malach. Moko wedegi kod osiepegi osetho. Moko to nyagore gi akwede mowuok kuom joodgi kod sirkal. (Mat. 10:​18, 36, 37) Bed gadier ni Jehova oikore konyi nano e pek moro amora ma inyagorigo.—Som 1 Petro 5:10.

2. Jokristo yudoga teko mar nano kanye?

² Tiend nano en chung’ motegno kendo bedo gi geno sama waromo gi chandruoge, sand, kata tembe. Ok wanyal nano gi tekowa wawegi; kar mano, Jehova e ma konyowa nikech omiyowa “teko mokalo ma pile.” (2 Kor. 4:7) E sulani, wabiro nono gik moko ang’wen ma Jehova osemiyowa mondo okonywa nano. Bende, wabiro neno kaka wanyalo tiyo maber gi moro ka moro kuom gigo.

LAMO

3. Ang’o momiyo wanyalo wacho ni lamo en mich makende?

³ Jehova osemiyowa mich moro makende ma konyowa nano. Osemiyowa thuolo mar wuoyo kode kendo owinjowa kata obedo ni wan joricho. (Hib. 4:16) Parie ni wanyalo wuoyo gi Jehova sa asaya kendo e wi wach moro amora. Onyalo winjo ka wawuoyo kode e dhok moro amora kendo kamoro amora ma wantie, bed ni wan kar kendwa kata e jela. (Jona 2:​1, 2; Tich 16:​25, 26) Jehova pod nyalo ng’eyo kaka wawinjo kata sama wan gi parruok ahinya ma ok wanyal wuoyo. (Rumi 8:​26, 27) Kuom adier, lamo en mich makende!

4. Ang’o momiyo wanyalo wacho ni kwayo Jehova mondo wanan en gima luwore gi dwache?

⁴ Jehova singonwa e Wachne ni “gimoro amora ma wakwaye kaluwore gi dwache, owinjowa.” (1 Joh. 5:14) Be wanyalo kwayo Jehova mondo okonywa nano? Ee! Nikech timo kamano luwore gi dwache. Ang’o momiyo wawacho kamano? Sama wanano e tembe, Jehova yudo dwoko monyalo miyo jal ma jare ma en Satan. (Nge. 27:11) E wi mano, Muma wacho ni Jehova dwaro nyiso “tekone ne jogo ma lame gi chunygi duto.” (2 We. 16:9) Omiyo, wanyalo bedo gadier ni Jehova gombo konyowa kendo ni onyalo miyowa teko mar dhi nyime nano.—Isa. 30:18; 41:10; Luka 11:13.

5. Ere kaka lamo konyowa bedo gi paro kod chuny mokuwe? (Isaya 26:3)

⁵ Muma wacho ni sama walemo gi kinda e wi gik ma chandowa, to ‘kuwe mar Nyasaye ma loyo ng’eyo duto rito chunywa kod pachwa kokalo kuom Kristo Yesu.’ (Fil. 4:7) Mano tiende ang’o? Sama joma ok ti ne Jehova oyudo chandruok moro, gitiyoga gi yore mopogore opogore mondo gibed gi chuny mokuwe. Kuom ranyisi, jomoko temoga mondo wigi owil gi gik moko duto ma chando pachgi. Mano en gima nyalo hinyo ng’ato nikech sama otimo kamano, omiyo jochiende thuolo mar chiko pache. (Pim gi Mathayo 12:​43-45.) Mopogore gi mano, kuwe ma Jehova miyowa sama wawuoyo kode to ber moloyo. Sama walemo, wanyiso ni wageno kuom Jehova gi chunywa duto mondo omiwa “kuwe mosiko.” (Som Isaya 26:3.) Yo achiel ma Jehova timogo kamano en kuom konyowa paro adiera ma wasepuonjore e Wachne. Adierago konyowa bedo gi paro kod chuny mokuwe ka wan gadier ni Jehova dewowa kendo ni odwaro ni ngimawa odhi maber.—Zab. 62:​1, 2.

6. Gin gik mage ma inyalo wacho sama ilemo? (Ne picha bende.)

⁶ Gima inyalo timo. Sama inyagori gi tem moro, “bol ting’ mari kuom Jehova” kendo kwaye mondo omiyi kuwe. (Zab. 55:22) Kwaye bende mondo omiyi rieko ma nyalo konyi nyagori maber gi temno. (Nge. 2:​10, 11) Sama ilemo mondo okonyi nano, kik wiyi wil gi goyone erokamano. (Fil. 4:6) Par yore ma Jehova konyigo pile ka pile mondo inan kendo igone erokamano. Kik iwe mondo chandruoge ma in-go omoni neno gueth ma Jehova osemiyi.—Zab. 16:​5, 6.

WACH NYASAYE

7. Ere kaka puonjruok Muma nyalo konyowa dhi nyime nano?

⁷ Jehova osemiyowa Wachne mondo okonywa nano. Muma oting’o ndiko mang’eny ma miyo wabedo gadier ni Jehova oikore konyowa. Ne ane ranyisi achiel. Mathayo 6:8 wacho niya: “Wuonu ong’eyo gik muchando kata ka pok ukwaye.” Yesu e ma nowacho wechego, to nikech ong’eyo Jehova e yo maber moloyo ng’ato ang’ata, mano miyo wabedo gadier ni Jehova oikore konyowa sama wayudo chandruoge. Muma oting’o ndiko mamoko mathoth kaka mago ma nyalo konyowa dhi nyime nano.—Zab. 94:19.

8. (a) Chiw ane ranyisi mar puonj moro mar Muma ma nyalo konyowa nano. (b) Ang’o ma nyalo konyowa paro puonj mag Muma sama dwarore ni wati kodgi?

⁸ Puonj mag Muma nyalo konyowa nano. Puonjgo oting’o paro kod rieko ma nyalo konyowa timo yiero mabeyo. (Nge. 2:​6, 7) Kuom ranyisi, Muma jiwowa ni wanyagre gi parruok modiechieng’ kodiechieng’, kar parruok mokalo tong’ e wi gik ma nyalo timorenwa kiny. (Mat. 6:34) Ka waheroga somo ndiko kendo paro matut kuomgi, mano biro konyowa paro ndikogo e seche ma wadwarogie moloyo.

9. Ere kaka ranyisi mag joma iwuoyo kuomgi e Muma miyo wabedo gadier ni Jehova biro konyowa?

⁹ Muma bende oting’o ranyisi mag joma orem kaka wan, ma Jehova nokonyo nikech ne gigeno kuome. (Hib. 11:​32-34; Jak. 5:17) Ka waparo matut kuom ranyisigo, gikonyowa medo bedo gadier ni Jehova e “kar bwokwa kendo en e tekowa, en e ma okonyowa e kinde mag chandruok.” (Zab. 46:1) Sama wanono ranyisi mag jotich Nyasaye ma nomakore kode e kinde mokalo, mano jiwowa mondo waluw yiegi kod sinani margi.—Jak. 5:​10, 11.

10. Ang’o ma inyalo timo mondo Wach Nyasaye omed konyi moloyo?

¹⁰ Gima inyalo timo. Som Muma pile kendo ilos list mag ndiko ma diher tiyogo e ngimani. Jomoko bende osefwenyo ni nono ndiko modiechieng’ kodiechieng’ gokinyi en yo maber mar yudo paro ma nyalo jiwogi odiechieng’ ma ngima. Nyaminwa moro miluongo ni Mariea bende notimo mana kamano ka ne tuo mar kansa omako jonyuolne. Ang’o ma nokonye nano ka ne jonyuolne chiegni tho? Owacho kama: “Okinyi kokinyi, ne ajanono ndiko modiechieng’ e bug Nono Ndiko Pile kae to aparo matut kuom ndikono. Timo kamano ne konyaga pong’o pacha gi paro mabeyo mowuok e ndiko, kar keto pacha kuoma awuon kata e chandruok ma ne anyagorago.”—Zab. 61:2.

JOKRISTO WETEWA

11. Ng’eyo ni owetewa gi nyiminewa bende nyagore gi sand jiwowa nade?

¹¹ Jehova osemiyowa owete gi nyimine e piny ma ngima mondo okonywa nano. Ng’eyo ni ‘sand ma yudowa bende yudo owete e piny ngima’ konyowa bedo gadier ni ok wan kendwa. (1 Pet. 5:9) Kuom adier, kata bed ni waromo gi sand ma chal nade, owetewa mamoko bende oseromo gi sand kaka mago kendo gisenano. Mano nyiso ni wan bende wanyalo nano!—Tich. 14:22.

12. Jokristo wetewa nyalo konyowa nade, to ere kaka wan bende wanyalo konyogi? (2 Jo-Korintho 1:​3, 4)

¹² Jokristo wetewa nyalo konyowa dhi nyime nano kokalo kuom wechegi kod gik ma gitimonwa. Mano e gima notimore ne jaote Paulo. Ne ogoyo erokamano ne joma ne okonye e kinde ma ne otueye e ot ka oluongogi gi nyinggi. Ne gihoyo Paulo, gijiwe, kendo konye gi gik ma nochando. (Fil. 2:​25, 29, 30; Kol. 4:​10, 11) Kindegi bende, Jokristo wetewa nyalo hoyowa kendo konyowa nano sama waromo gi pek moko, to wan bende wanyalo konyogi e yo ma kamano.—Som 2 Jo-Korintho 1:​3, 4.

13. Ang’o ma nokonyo Maya mondo odhi nyime nano?

¹³ E higa mar 2020, polise ne omonjo nyaminwa moro modak e piny Russia miluongo ni Maya mi gigo ode peksen, kendo bang’e ne odonjne nikech nolero yiene ne jomamoko. Owete gi nyimine nokonyo Nyaminwa Maya ahinya. Owacho kama: “E kindeno, ne aolga, nabedo gi parruok mang’eny, kendo nakuyo. Kata kamano, owete gi nyimine ne goyonaga simu kendo ndikona barupe ma jiwa. Nang’eyoga ni owete gi nyimine ohera kendo ni gin kaka joodwa. Kata kamano, gik ma ne gitimona e higa mar 2020, nomiyo amedo bedo gadier gi wachno.”

14. Jokristo wetewa nyalo konyowa nade dhi nyime nano? (Ne picha bende.)

¹⁴ Gima inyalo timo. Sama idhi nyime nano, tem ahinya mondo ibed machiegni gi Jokristo weteni. Kik iluor kwayo jodong-kanyakla kony. Ginyalo bedo “kar pondo ne yamo mager [kendo] ka ma ji buoroe ne kodh yamo.” (Isa. 32:2) Par ni Jokristo weteni bende nyagore gi pek moko e ngimagi. Omiyo, ka ikonyogi, ibiro bedo mamor kendo nyagori maber gi pek ma iromogo.—Tich 20:35.

GENO MAR KINDE MABIRO

15. Ere kaka geno osekonyo jotich Nyasaye momakore kode moriwo nyaka Yesu? (Jo-Hibrania 12:2)

¹⁵ Jehova osemiyowa geno ma jaber mar kinde ma biro mondo okonywa nano. (Rumi 15:13) Par ane kaka geno nokonyo Yesu ka ne oromo gi pek moro maduong’ e ngimane e kinde ma ne en e piny. (Jo-Hibrania 12:2.) Yesu nong’eyo ni ka ochung’ motegno e kinde matekno, to ne odhi miyo nying Jehova duong’. Yesu bende ne oketo pache e kinde ma ne odhi dok e polo kendo locho kanyachiel gi Jokristo mowal e Pinyruodh polo. E yo ma kamano, geno ma wan-go mar dak nyaka chieng’ e piny manyien, konyowa dhi nyime nano e tem moro amora ma Satan nyalo kelonwa.

16. Ere kaka geno nokonyo nyaminwa moro nano, to weche ma nowacho puonji ang’o?

¹⁶ Ne ane kaka geno mar Pinyruoth nokonyo Nyaminwa Alla modak e piny Russia e kinde ma ne omak chwore motue e jela. Ka ne omak chwore, nowacho niya: “Lemo e wi geno ma wan-go mar kinde ma biro kendo paro matut e wi genono osekonya mondo kik chunya nyosre. Ang’eyo ni nitie gik mabeyo moritowa bang’ nyagruok gi pekgi. Jehova biro loyo jowasike kendo obiro guedhowa.”

17. Wanyalo nyiso nade ni wamor gi geno ma wan-go mar kinde ma biro? (Ne picha bende.)

¹⁷ Gima inyalo timo. Many thuolo mar paro matut e wi gik mabeyo ma Jehova osingonwa. Tem ane paro ka idak e piny manyien kendo imor gi gik ma Jehova oikonwa. Chandruoge miromogo sani “gin ma kadho piyo kendo gitindo” kopimgi gi gueth ma wabiro yudo ka wadak nyaka chieng’ e paradiso. (2 Kor. 4:17) Bende, tim duto minyalo mondo iler ne jomamoko yieni. Tem ane paro kaka ngima tek ne joma ok ti ne Jehova nikech ok ging’eyo gik mabeyo ma osingonwa e kinde ma biro. Inyalo miyogi siso mar gombo ng’eyo weche momedore e wi Pinyruodh Nyasaye kata ka iwuoyo kodgi mana machuok.

18. Ang’o momiyo wanyalo geno singo mag Jehova?

¹⁸ Ka ne Ayub osenyagore gi tembe mathoth, nonyiso Jehova niya: “Koro ang’eyo ni onge gima nyalo tami timo kendo ni gimoro amora midwaro timo, inyalo timo.” (Ayub 42:2) Ayub nofwenyo ni onge gimoro amora ma nyalo geng’o dwach Jehova. Mano en wach ma nyalo jiwowa sama wanyagore gi chandruok moro. Kuom ranyisi, par ane miyo moro ma chunye onyosore nikech lakteche duto ma osedhi irgi ok nyal thiedho tuo ma chande. Kata kamano, oyudo laktar moro molony ma fwenyo tuo ma chandeno kendo laktarno nyise kaka odwaro thiedhe. Mano miyo owinjo maber kata obedo ni nyalo kawo kinde ka pok ochango. Ng’eyo wachno miyo odhi nyime nano nikech koro ong’eyo ni obiro chango. E yo ma chalo kamano, geno ma wan-go mar dak e Paradiso bende konyowa nano.

19. Gin ang’o ma nyalo konyowa nano?

¹⁹ Mana kaka waseneno, Jehova konyowa nano e tembe ma waromogo kokalo lamo, Wachne, Jokristo wetewa, kod geno momiyowa. Ka watiyo maber gi michgo, Jehova biro konyowa nano e pek moro amora ma waromogo nyaka chop kama ibiro tiekie chandruoge duto manie piny marach ma Satan tayoni.—Fil. 4:13.