Bed Gadier ni Jehova Oheri

1. Ang’o momiyo nichiwori ne Jehova? (Ne picha bende.)

BE INYALO paro kinde ma ne ichiworie ne Jehova? Nitimo kamano nikech ing’eyo Jehova kendo ihere. Nisingori ni ibiro keto dwache obed motelo e ngimani kendo ni ibiro dhi nyime here gi chunyi duto, gi ngimani duto, gi pachi duto, kendo gi tekoni duto. (Mar. 12:30) Chakre kindeno, hera miherego osemedore. Omiyo, inyalo dwoko nade ka ng’ato openji kama: “Be in gadier ni ihero Jehova?” Onge kiawa ni ibiro dwoke niya: “Ahere moloyo ng’ato ang’ata kata gimoro amora!”

2-3. Jehova dwaro ni wabed gadier gi wach mane, to ang’o ma wabiro nono e sulani? (Jeremia 31:3)

² To nade ka ng’ato openji niya: “Be in gadier ni Jehova oheri?” Be ibiro dikori dwoko penjono samoro kiwacho e chunyi ni ok onyal heri? Nyaminwa moro ma nochandore ahinya ka ne pod otin wacho kama: “Ang’eyo ni ahero Jehova kendo aonge gi kiawa moro amora e wi wachno. Kata kamano, gima chandoga chunya en ka be Jehova ohera gadier.” Ang’o ma nyalo konyi ng’eyo kaka Jehova neni?

³ Jehova dwaro ni ibed gadier ni oheri. (Som Jeremia 31:3.) Adiera en ni Jehova e ma noywayi ire. Ka ne isingori ni ibiro tiyone mi obatisi, ne omiyi mich moro makende ahinya. Michno en herane mosiko. Mano nyiso ni ogeni ahinya kendo ok onyal jwang’i kata matin. Herano miyo Jehova neno jotichne, moriwo nyaka in kaka ‘mwandune mogeno ahinya.’ (Mal. 3:17) Jehova dwaro ni ibed gadier ni oheri, mana kaka jaote Paulo ne ni gadier ni Jehova ohere. Jaote Paulo ne nigi chir ka nondiko niya: “An gadier chuth ni kata mana tho, kata ngima, kata malaike, kata loje, kata gik ma nitie sani, kata gik ma biro, kata gik ma nigi teko, kata bor, kata tut, kata chuech moro amora, ok bi pogowa gi hera mar Nyasaye.” (Rumi 8:​38, 39) E sulani, wadwaro nono gimomiyo onego wamed bedo gadier ni Jehova oherowa kod gima nyalo konyowa timo kamano.

GIMOMIYO WAN GADIER NI JEHOVA OHEROWA

4. En miriambo mane ma Satan dwaro ni wayiego, to ere kaka wanyalo kwede?

⁴ Sama wayie ni Jehova oherowa, mano konyowa kwedo achiel kuom “riekni mopondo” mag Satan. (Efe. 6:11) Satan oikore timo gimoro amora mondo kik wati ne Jehova. Achiel kuom riekni mopondo ma Satan osebedo ka tiyogo en ni Jehova ok oherowa. Satan osetiyo gi yorno e wuondo ji mang’eny. Omonjowaga e kinde ma chunywa onyosore, samoro nikech gik ma notimore e ngimawa chon, gik ma timorenwa sani, kata kiawa ma wan-go e wi kinde ma biro. (Nge. 24:10) Satan chalo gi sibuor ma manyo le ma yom yom ma dongam. Omiyo otemoga matek mondo omonjwa sama waol. Kata kamano, ka wadhi nyime bedo gadier ni Jehova oherowa, mano biro konyowa ‘kwedo’ Satan kendo tang’ gi rieknige mopondo ma onyalo tiyogo e wuondowa.—1 Pet. 5:​8, 9; Jak. 4:7.

5. Ang’o momiyo wawinjoga maber sama wan gadier ni Jehova oherowa kendo ogenowa?

⁵ Wanyalo sudo machiegni gi Jehova ka wan gadier ni oherowa. Ne ane gimomiyo wawacho kamano. Jehova nochueyowa gi nyalo mar hero jomamoko kendo winjo maber ka oherwa. Sama jomamoko oherowa, wan bende waherogi. Omiyo, kaka wamedo winjo ni Jehova oherowa, e kaka wan bende wamedo here. (1 Joh. 4:19) To kaka wamedo here, e kaka en bende omedo herowa. Muma wacho maler niya: “Suduru machiegni gi Nyasaye to en bende nosud iru.” (Jak. 4:8) Kata kamano, ang’o ma nyalo konyowa medo bedo gadier ni Jehova oherowa?

ANG’O MA NYALO KONYOWA BEDO GADIER NI JEHOVA OHEROWA?

6. Wanyalo timo ang’o ka ok wan gadier ni Jehova oherowa?

⁶ Dhi nyime kwayo Jehova mondo okonyi bedo gadier ni oheri. (Luka 18:1; Rumi 12:12) Wuo gi Jehova nyading’eny odiechieng’ kodiechieng’ kikwaye mondo okonyi bedo gadier ni oheri. Seche moko chunywa nyaloga nyosore mi wachak paro ni Jehova ok oherowa. Kata kamano, par ni Jehova duong’ moloyo chunyi. (1 Joh. 3:​19, 20) Ong’eyi moloyo kaka ing’eri iwuon, kendo oneno kido mabeyo ma in-go ma samoro in ok inyal neno. (1 Sa. 16:7; 2 We. 6:30) Omiyo, kik iluor ‘olone gik manie chunyi’ kikwaye mondo okonyi bedo gadier ni oheri. (Zab. 62:8) Bang’ lemo, tem tiyo gi paro mochiw e paragraf ma luwogi.

7-8. Ere kaka Zaburi konyowa bedo gadier ni Jehova oherowa?

⁷ Bed gadier ni Jehova biro chopo singoge. Jehova notayo jondik Muma mondo gindik gik madier kuome. Ne ane yo makende ma Daudi nolerogo kaka Jehova dewowa. Nowacho kama: “Jehova ni machiegni gi jo ma chunygi onyosore, kendo oreso jo ma chunygi ool.” (Zab. 34:18) Sama chunyi onyosore, inyalo paro ni in kendi. Kata kamano, Jehova singo ni obiro bedo machiegni kodi nikech ong’eyo ni mago e kinde midwaroe kony moloyo. E zaburi machielo, Daudi nondiko kama: “Kan pi wang’a e chupani.” (Zab. 56:8) Jehova nenoga sama ikuyo kendo iwinjo malit. Odewi ahinya kendo ok omor neno kichandori. E yo machielo, chalo ka gima okano pi wang’i e chupa, kendo ogenogi ahinya mana kaka ng’at ma wuotho e thim ogeno pi moting’o e chupa. Zaburi 139:3 wacho niya: ‘Jehova ong’eyo yorena duto.’ Jehova neno yoreni duto kendo oketo pache e gik mabeyo mitimo. (Hib. 6:10) Nikech ang’o? Nikech omor gi kinda mitimo e lame.a

⁸ Jehova tiyo gi ndiko kaka mago e hoyowa. Chalo ka gima onyisi niya: “Daher ni ing’e ni aheri kendo adewi ahinya.” Kata kamano, kaka ne waseneno motelo, Satan dwaro ni ipar ni Jehova ok oheri. Omiyo, ka seche moko in gi kiawa ka be Jehova oheri, inyalo penjori kama: ‘Abiro yie gi weche mag ng’a, Satan ma en “wuon miriambo” koso Jehova ma en “Nyasach adiera”?’—Joh. 8:44; Zab. 31:5.

9. En ang’o ma Jehova osingo ne joma ohere? (Wuok 20:​5, 6)

⁹ Par matut e wi kaka Jehova winjo sama wahere. Ne ane gima Jehova nonyiso Musa kaachiel gi Jo-Israel. (Som Wuok 20:​5, 6.) Jehova singo ni obiro dhi nyime hero joma ohere. Wechego miyo wabedo gadier ni Nyasachwa ok nyal yie ni wahere, kae to oweyo ma ok oherowa. (Neh. 1:5) Omiyo, ka seche moko in gi kiawa ka be Jehova oheri, inyalo penjori niya: ‘Be ahero Jehova?’ Nikech Jehova makorega gi joge, wanyalo bedo gadier ni ok onyal weyo hero joma ohere. (Dan. 9:4; 1 Kor. 8:3) Mano nyiso ni ka in gadier ni ihero Jehova, to ok onego ibed gi kiawa ni en bende oheri. En Nyasaye mohero joge kendo ma makore kodgi kinde duto.

10-11. Jehova dwaro ni ine rawar e yo mane? (Jo-Galatia 2:20)

¹⁰ Par matut e wi rawar. Misango mar Yesu e mich maduong’ie moloyo ma Jehova osemiyo dhano. (Joh. 3:16) To be en mich ma nomiyi in iwuon? Ee! Ne ane ranyisi mar Jaote Paulo. Par ni ne otimo richo moko madongo ka ne pok obedo Jakristo, kendo ne dwarore ni odhi nyime kedo gi nyawo ma ne en-go. (Rumi 7:​24, 25; 1 Tim. 1:​12-14) Kata kamano, ne oneno rawar kaka mich ma Nyasaye ne omiye en owuon. (Som Jo-Galatia 2:20.) Par ni Jehova e ma notayo Paulo gi rohone mondo ondik wechego. Omiyo, Jehova dwaro ni wapuonjre kuom weche ma Paulo nondikogo. (Rumi 15:4) Wechego nyiso ni Jehova dwaro ni ine rawar kaka mich ma omiyi in iwuon. Kitimo kamano, to ibiro medo bedo gadier ni Jehova oheri.

¹¹ Wagone Jehova erokamano kuom oro Yesu e piny mondo othonwa. Kata kamano, Yesu bende ne obiro e piny mondo opuonj ji adiera e wi Nyasaye. (Joh. 18:37) Adierago oriwo yo ma Jehova nenogo nyithinde.

KAKA YESU KONYOWA BEDO GADIER NI JEHOVA OHEROWA

12. Ang’o momiyo wanyalo bedo gadier gi weche ma Yesu nowacho kuom Jehova?

¹² Ka ne Yesu nie piny, nokonyowa ng’eyo Jehova e yo maber. (Luka 10:22) Wanyalo bedo gadier kuom weche ma Yesu nowacho e wi Jehova. Nikech ang’o? En nikech Yesu osedak gi Jehova e polo kuom higni mang’eny. (Kol. 1:15) Yesu nong’eyo kaka Jehova ohero malaike kod dhano momakore kode. Ere kaka Yesu nyalo konyowa mondo wabed gadier ni Jehova oherowa?

13. Yesu dwaro ni wane Jehova nade?

¹³ Yesu dwaro ni wang’e kaka Jehova nenowa gadier. E ndiko mag Injili, Yesu noluongo Jehova ni “Wuoro” kata “Wuonu” mokalo nyadi 160. Ka nowuoyo gi jolupne, noluongo Jehova ni “Wuonu manie polo” kata “Wuonu.” (Mat. 5:16; 6:26) Weche mag timo nonro e Mathayo 5:16 e Study Bible wacho kama: “Jotich Nyasaye machon ne pako Jehova gi nyinge mopogore opogore mag telo, kaka ‘Manyalo Duto,’ ‘Ng’at Mamalo Chutho,’ kod ‘Jachuech.’ Kata kamano, bedo ni Yesu noluongo Jehova ni ‘Wuoro’ nyiso kaka Jehova nigi winjruok machiegni ahinya gi jotichne.” Kuom adier, Yesu dwaro ni wane Jehova kaka en bende onene, tiende ni wanene kaka Wuoro ma jahera kendo mogeno nyithinde. Wanon ane ndiko moko ariyo ma Yesu noluongoe Jehova ni “Wuoro” kata “Wuonu.”

14. Ere kaka Yesu nonyiso ni Wuonwa manie polo ogeno ng’ato ka ng’ato kuomwa? (Mathayo 10:​29-31) (Ne picha bende.)

¹⁴ Mokwongo, wane ane weche ma Yesu nowacho e Mathayo 10:​29-31. (Som.) Oyundi gin winy matindo ma ok nyal hero Jehova kata lame. Kata kamano, Wuonwa ogeno winygo ahinya ma kata ka achiel kuomgi olwar piny to ong’eyo. Ka Jehova ogeno winy matindo kamano, donge mano nyiso kaka ogeno moro ka moro kuom jotichne ma lame nikech gihere? Kwan matindo 30 wacho ni, “kata mana yie wiu duto osekwan.” Weche mag timo nonro e Study Bible wacho kama e wi wechego: “Bedo ni Jehova ong’eyo nyaka weche matindo tindo kamano, nyiso ni ogeno moro ka moro kuom jolup Kristo.” Onge kiawa ni Yesu dwaro ni wabed gadier ni Jehova ogeno ng’ato ka ng’ato kuomwa.

15. Weche ma Yesu nowacho e Johana 6:44 puonji ang’o e wi Wuonu manie polo?

¹⁵ Ne ane yo machielo ma Yesu nodendogo Jehova ni “Wuora.” (Som Johana 6:44.) Wuonu manie polo e ma noywayi ire. Ang’o momiyo notimo kamano? Nikech noneno ka in gi chuny makare. (Tich 13:48) Weche mag timo nonro e Johana 6:44 e Study Bible wacho ni nyalo bedo ni Yesu ne wuoyo kuom weche ma Jeremia nondiko ma bende otigo kaka ndiko ma tayo sulani. Wechego wacho niya: “Aseywayi ira nikech aheri ahinya [kata, asedhi nyime nyisi hera madier].” (Jer. 31:3; weche moler piny; pim gi Hosea 11:4.) Wechego tiendgi ang’o? Wuonwa manie polo pod dhi nyime neno kido mabeyo ma in-go ma samoro in ok inyal neno.

16. (a) En wach mane ma Yesu nowacho, to ang’o momiyo onego wayie gi wachno? (b) Ang’o ma nyalo konyi bedo gadier ni Jehova e Wuoro maberie moloyo? (Ne sanduk ma wacho ni “Jal Mowinjore Bedo Wuonwa.”)

¹⁶ Ka ne Yesu oluongo Jehova ni Wuonwa, ne chal ka gima owacho niya: “Jehova ok en mana Wuora kenda, to bende en Wuonu. Ng’euru ni ohero kendo odewo ng’ato ka ng’ato kuomu.” Omiyo, ka seche moko in-ga gi kiawa ka be Jehova oheri, nyalo bedo maber ka ipenjori kama: ‘Nikech Yesu ong’eyo Wuonwa e yo maber kendo kinde duto owachoga adier, donge onego ayie gi weche ma Yesu nowacho kuome?’—1 Pet. 2:22.

DHI NYIME BEDO GADIER NI JEHOVA OHERI

17. Ang’o momiyo onego wadhi nyime bedo gadier ni Jehova oherowa?

¹⁷ Dwarore ni wadhi nyime bedo gadier ni Jehova oherowa. Mana kaka ne waseneno, Satan temo matek mondo wawe tiyo ne Jehova. Yo achiel motimogo kamano en kuom nyoso chunywa mondo wapar ni Jehova ok oherowa. Kik iyie gi miriambo ma Satan wachono!—Ayub 27:5.

18. Ang’o minyalo timo mondo imed bedo gadier ni Jehova oheri?

¹⁸ Mondo idhi nyime bedo gadier ni Jehova oheri, lem kikwaye mondo okonyi neno kido mabeyo ma oneno kuomi. Par matut kaka Muma lero hera moherogo jotichne. Par gima otimo sama ng’ato onyiso ni ohere; ok inyal here kae to en otamore heri. Kik wiyi wil ni Jehova ne ooro Wuode mondo othoni. Bed gadier gi weche ma Yesu nowacho ni Jehova en Wuonu manie polo. Kitimo kamano, to ok ibi digni dwoko sama ng’ato openji kama: “Be in gadier ni Jehova oheri?” Kar mano, ibiro dwoke gi chir niya: “Ee, ohera, kendo atimo duto ma anyalo mondo an bende anyis ni ahere!”