Jachien Chalo Nade?

Dwoko ma Muma chiwo

Jachien nigi del mar roho, to mano nyiso ni ok wanyal nene.—Jo-Efeso 6:11, 12.

Picha moro mong’ere ahinya mar Jachien ka omako ragwar e lwete. Suche chalo gi diel kendo en gi tungene kod yiwe.

Kinde mang’eny igoroga Jachien kaka ng’at machalo gi diel, en gi tungene, yiwe, kendo en gi ragwar e lwete. Nitie joma paro ni piche ma chalo kamano, ne okwong gor gi jogoro moko ma ne odak chiegni higni 1000 mokalo. To gima omiyo ne gigoro Jachien kamano, en nikech sigendni machon ma ne giwinjo e wi Jachien.

Muma lero ni Jachien chalo nade?

Muma tiyo gi yore mang’eny e lero kaka Jachien chalo. Magi konyowa ng’eyo kaka kite chal to ok kaka suche chalo. Moko kuom yore milerego gin:

Malaika mar ler. Owuondore ni ochiwo gik mabeyo mondo otem wuondo ji oluw puonj mage kar luwo puonj mag Nyasaye.—2 Jo-Korintho 11:14.
Sibuor ma ruto. Omonjo jotich Nyasaye.—1 Petro 5:8.
Thuol mang’ongo. Obuogo ji, en gi teko, kendo oketho kama duong’.—Fweny 12:9.

Ndiko ma wuoyo e wi Jachien

2 Jo-Korintho 11:14: “Satan owuon siko ka wuondore mondo onenre kaka malaika mar ler.”

Tiend Ndikono: Satan wuondore ni en ng’at maber mondo owuond ji oluw puonj mage kar luwo puonj mag Nyasaye.
Jo-Efeso 6:11: “Rwakreuru gi gige lweny duto moa kuom Nyasaye mondo ubed gi nyalo mar chung’ motegno e kedo gi riekni mopondo mag Jachien.”

Tiend Ndikono: Jachien tiyo gi riekni maricho e wuondo ji mondo kik giluw chike Nyasaye.
Jakobo 4:7: “Bolreuru ne Nyasaye; to kweduru Jachien, mi noringu.”

Tiend Ndikono: Ng’ato nyalo loyo Satan ka otimo gik ma Nyasaye nyise, kar luwo gik ma Satan nyise.
1 Petro 5:8: “Jasiku ma en Jachien wuotho koni gi koni kaka sibuor ma ruto komanyo ng’at ma dongam.”

Tiend Ndikono: Jachien osin gi joma luwo chike Nyasaye kendo odwaro ni oketh winjruok ma gin-go gi Nyasaye.