Nyasaye Nochako Chueyo Polo gi Piny Karang’o?

Dwoko ma Muma chiwo

Muma ok nyiswa ni en karang’o ma ne Nyasaye ochako chueyo polo gi piny kod kinde ma ne okawo sama ne ochueyogi. Gima Muma wacho en ni: “Kar chakruok Nyasaye ne ochueyo polo gi piny.” (Chakruok 1:1) Muma ok nyiswa ni “chakruok” ne en karang’o sie. Kata kamano, bug Chakruok nyisowa ni ne ochue polo gi piny ka pok odiechienge auchiel mag chuech ochakore.

• Be odiechienge auchiel mag chuech gin odiechienge ma nigi seche 24?

• Ang’o ma ne otimore e odiechienge auchiel mag chuech?

• Be yo milerogo kaka chuech notimore e bug Chakruok winjore gi gima josayans wacho?

• Chieng’, dwe, gi sulwe ne ochue karang’o?

• Kaluwore gi Muma, piny osebedoe kuom kinde ma romo nadi?

Be odiechienge auchiel mag chuech gin odiechienge ma nigi seche 24?

Ooyo. E Muma, wach motigo ni “odiechieng’” nyalo bedo kinde ma borne opogore opogore kaluwore gi gima iwuoye. Kuom ranyisi, nitie kamoro e bug Chakruok ma lero ni ne ochue gik moko duto e odiechieng’ achiel.​—Chakruok 2:4.

Ang’o ma ne otimore e odiechienge auchiel mag chuech?

Nyasaye ne oloko ‘piny ma ne ni nono kendo ma ne onge kido’ mondo obed kama ber ma ji nyalo dakie. (Chakruok 1:2) Ne ochueyo gik mangima e piny. Muma lero gik ma ne otimore e odiechienge auchiel mag chuech:

• 

  Odiechieng’ Mokwongo: Nyasaye ne omiyo ler ochopo e piny, to mano ne okelo odiechieng’ gi otieno.​—Chakruok 1:3-5.

• 

  Odiechieng’ mar 2: Nyasaye ne ochueyo gima pogo pige ma ni malo kod pige ma ni piny.​—Chakruok 1:6-8.

• 

  Odiechieng’ mar 3: Nyasaye ne omiyo lowo motwo onenore. Ne ochueyo bende gik ma twi e lowo.​—Chakruok 1:9-13.

• 

  Odiechieng’ mar 4: Nyasaye ne omiyo chieng’, dwe, kod sulwe onenore e piny.​—Chakruok 1:14-19.

• 

  Odiechieng’ mar 5: Nyasaye ne ochueyo gik manie nam kod mago ma fuyo e kor polo.​—Chakruok 1:20-23.

• 

  Odiechieng’ mar 6: Nyasaye ne ochueyo le manie piny kod dhano.​—Chakruok 1:24-31.

E giko odiechieng’ mar auchiel, Nyasaye ne oyueyo kata ne oweyo chueyo gik moko.​—Chakruok 2:1, 2.

Be yo milerogo kaka chuech notimore e bug Chakruok winjore gi gima josayans wacho?

Sama Muma lero kaka ne ochue gik moko, ok oti gi weche matek ma josayans tiyogo. Kar mano, olero kaka nochue gik moko e yo mayot ma kata ng’at ma ne nitie e kinde ma ne indikoe Muma ne nyalo winjo wechego e yo mayot. Weche ma Muma wacho e wi chuech ok pingre gi weche sayans mosetimnegi nonro maber. Jasayans moro ma nono weche mag sulwe miluongo ni Robert Jastrow nondiko kama: “Kaka Muma lero weche mag chuech gi kaka sayans lerogi opogore, kata kamano, nitie kaka gichalre. Gik ma ne ochue ka pok ochue dhano notimore apoya, kata kamano, ne gitimore e kinde moro sie.”

Chieng’, dwe, gi sulwe ne ochue karang’o?

Chieng’, dwe, gi sulwe ne gin moko kuom gik manie “polo” ma ne ochue e “kar chakruok.” (Chakruok 1:1) Kata kamano, ler margi ne ok nyal rieny ma chop e piny nikech boche polo ne oumogi. (Chakruok 1:2) Kata obedo ni e odiechieng’ mokwongo ler nonenore, kama ne lerno ae ne pok onere. Nenore ni boche pologo ne olal e odiechieng’ mar ang’wen. Sama Muma wacho ni chieng’, dwe, kod sulwe ne ochako ‘rieny mondo gikel ler e piny,’ nyalo bedo ni olero kaka ng’at ma ne nitie e piny ne nyalo neno kaka gigo timore.​—Chakruok 1:17.

Piny osebedoe kuom higni adi kaluwore gi Muma?

Muma ok nyiswa ni pinyni osebedoe kuom higni adi. Bug Chakruok1:1 wacho ni piny gi polo ma waneno sani ne nigi chakruok. Parono ok kwed weche ma winjore maler ma josayans osefwenyo e wi higni ma piny nigo.