Nyasaye Chako Chweyo Gik Moko

GIK moko duto ma wan-go a kuom Nyasaye. Ne ochweyo chieng’ mondo omiwa ler seche mag odiechieng’ to dwe koda sulwe mondo omiwa ler gotieno. Kendo Nyasaye ne ochweyonwa piny mondo wadagie.

Kata kamano, chieng’, dwe, sulwe kod piny ok ema ne Nyasaye okwongo chweyo. Bende ing’eyo chwech ma ne okwongo? Nyasaye ne okwongo chweyo ji kaka en. Ok wanyal neno jogi, mana kaka ok wanyal neno Nyasaye. Ei Muma, iluongo jogi ni malaike. Nyasaye ne ochweyo malaikene mondo odag kode e polo.

Malaika ma Nyasaye ne okwongo chweyo ne en malaika makende. Ne en Wuod Nyasaye mokwongo, to ne otiyo kod Wuon mare. Ne okonyo Nyasaye e loso gik moko duto. Ne okonyo Nyasaye e loso chieng’, dwe, sulwe koda pinywa.

Piny ne chalo nade kindeno? Kane ochakore, onge ng’ama ne nyalo dak e piny. Ne onge gimoro amora mak mana nam achiel maduong’. Kata kamano, Nyasaye ne dwaro mondo dhano odag e piny. Omiyo, ne ochako chano gik moko nikech dhano. Ne otimo ang’o?

Mokwongo, piny ne dwaro ler. Omiyo Nyasaye ne omiyo ler mawuok kuom chieng’ mondo orieny e piny. Ne otimo kamano mondo odiechieng’ koda otieno obedie. Bang’ mano, Nyasaye ne omiyo lowo mondo onen e wi pige.

Mokwongo ne onge gimoro e wi lowo. Ne ochalo gi picha ma ineno kae. Ne onge mauwa kata yien kata le. Kata rech bende ne onge e nam. Nyasaye ne nigi tije mang’eny mag loso piny obedi kama ber mondo le koda dhano odagie.