Nyasaye Nochueyo Polo gi Piny

Jehova Nyasaye e Jachuechwa. Ne oloso gik moko duto te, gibed ma wanyalo neno kata ma ok wanyal neno. Ka ne pok oloso gik ma wanyalo neno, ne okwongo ochueyo malaike mang’eny ahinya. Be ing’eyo ni malaike gin jomage? Malaike gin chuech ma Jehova ne ochueyo e yo ma chal kode. Ok wanyal nenogi, mana kaka ok wanyal neno Nyasaye. Malaika mokwongo ma ne ochueyo ne obedo kaka jakonyne. Malaikano ne okonyo Jehova tich sama Jehova ne chueyo sulwe kod gik mamoko mang’eny. Achiel kuom gik ma nochueyogo en pinywa ma jaberni.

Kae to Jehova nochako iko pinywani mondo obed kama le kod dhano nyalo dakie. Nomiyo ler ma wuok e chieng’ ochako rieny e piny. Nochueyo gode, nembe, kod aoche.

Ang’o ma Jehova notimo bang’ mano? Nowacho kama: ‘Adwaro chueyo lum, alode, kod yiende.’ Kendo olembe mopogore opogore, alode, kod maua mabeyo nochako twi. Kae to Jehova nochueyo le duto moriwo le ma fuyo, modak e pi, mamol, kod ma wuotho. Ne ochueyo le matindo kod madongo, kuom ranyisi, apwoyo, liech, kod mamoko. En le mane ma in ihero ahinya?

Kae to Jehova nowacho ne malaika ma ne ochueyo mokwongocha niya: “Wachue dhano.” Dhano ne dhi bedo mopogore gi le. Dhano ne nyalo loso gik manyien. Ne ginyalo wuoyo, nyiero, kendo lemo. Ne omigi tich mar rito piny kod le manie iye. Be ing’eyo dhano ma ne okwong chue? We wane ane.