Be Muma Nyalo Konyi Nyagori Sama Lokruok ma Timore e Kor Lwasi Okelo Masira?

Be in achiel kuom ji mang’eny moseyudo masiche ma betiega nikech lokruok ma timore e kor lwasi? Nitie lokruok mopogore opogore ma timorega e kor lwasi ma nyalo kelo masira. Kuom ranyisi, kodh yamo mager keloga ohula kendo kethoga gik moko. Koth ma chue mang’eny ahinya nyalo miyo lowo sienyore kendo mil polo nyalo chako mach maduong’ ahinya ma nyalo ketho gik moko. Oro kod liet mang’eny bende keloga masira.

E pinje mang’eny, masiche ma betiega nikech lokruoge ma timore e kor lwasi dhi nyime bedo mang’eny kendo madongo. Ripot mar International Federation of Red Cross and Red Crescent Societies, wacho kama: “Kwan mar joma yudoga masiche dhi nyime medore ameda. Masiche mikelo gi ohula, yamo mager, kod oro dhi nyime ketho ngima ji kendo daro ji mang’eny higa ka higa.”

Sama masiche ma kamago timore, ji chandorega ahinya. Ginyalo chandore nikech gilalo gigegi mag ringruok kod utegi, kata nikech wedegi gi osiepegi otho e masichego.

Ka in bende iseyudoga masiche ma betiega nikech lokruok ma timore e kor lwasi, Muma nyalo konyi nyagori kodgi. Muma oting’o weche ma hocho, ma miyo ji geno, kendo ma osekonyo ji mang’eny moyudo masiche kaka mago. (Jo-Rumi 15:4) Bende, ochiwo dwoko mag penjo mang’eny ma chando ji kaka: Ang’o momiyo Nyasaye oweyo mondo masirani otimre? Dibed ni okuma, koso?

Masiche ma betiega nikech lokruok ma timore e kor lwasi ok gin kum moa kuom Nyasaye

Muma puonjo ni masiche kata chandruoge ma ji romogo, ok gin kum moa kuom Nyasaye. Muma nyisowa ni “ok nyal tem Nyasaye gi gik maricho, to en owuon bende ok otem ng’ato.” (Jakobo 1:13) Mano nyiso ni Nyasaye ok okel masiche ma betiega e kindewagi nikech lokruoge ma timore e kor lwasi.

Muma nyisowa ni nitie kinde ma Nyasaye notiyo gi teko mar kor lwasi e kumo joma richo. Kata kamano, gik ma Nyasaye notimogo opogore ahinya gi masiche ma betiega nikech lokruok ma timore e kor lwasi e kindewagi, ma gin masiche ma timore apoya kendo ma yudo joma beyo kanyachiel gi joma richo. Mopogore gi mano, Muma nyisowa ni sama ne Nyasaye kelo kum, nochiwoga siem motelo, noritoga joma omakore kode, kendo noleroga gimomiyo nokelo kumno. Kuom ranyisi, Nyasaye nolero gimomiyo nokelo ataro ma notimore e kinde Noa, nochiwo siem motelo, kendo norito Noa gi joode.​—Chakruok 6:13; 2 Petro 2:5.

Mondo ipuonjri gimomiyo masiche ma timore ok gin kum moa kuom Nyasaye, ne sula ma wiye wacho ni, “Ang’o ma Muma Wacho e Wi Masiche Matimore Apoya?”

Nyasaye dewo ahinya joma oyudo masiche ma betiega nikech lokruok ma timore e kor lwasi

Muma nyiso ni Jehovaa Nyasaye dewo ji kendo okechogi. Ne ane moko kuom ndiko ma hoyowa.

• Isaya 63:9: “[Chuny Nyasaye] ne chandore e kinde ma ne gichandore.”

  Tiend wachno: Jehova winjoga marach ahinya sama oneno ka ji chandore.

• 1 Petro 5:7: “Odewou.”

  Tiend wachno: Jehova odich ahinya gi ngimani.

Nikech Jehova dewowa kendo okechowa, mano chwale mondo okonywa. Ohoyowa kokalo kuom puonj manie Muma kod geno e wi kinde mabiro ma onge masira moro amora ma nobedie nikech lokruok ma timorega e kor lwasi.​—2 Jo-Korintho 1:3, 4.

Kinde ma masiche ma betiega nikech lokruok ma timore e kor lwasi norum

Muma nyisowa ni Jehova osingonwa ‘gima wanyalo geno bang’e.’ (Jeremia 29:11) Odwaro ni wadag gi mor e paradiso e piny ka, to ok ka waluor nikech masiche ma betiega nikech lokruok ma timorega e kor lwasi.​—Chakruok 1:28; 2:15; Isaya 32:18.

Nyasaye biro miyowa ngima ma chalo kamano kokalo kuom Pinyruodhe, ma en sirkal manie polo ma Yesu e ma lochoe. (Mathayo 6:10) Yesu nigi rieko kod teko mar geng’o masiche ma betiega nikech lokruok ma timorega e kor lwasi. Mano nonenore ayanga e kinde ma ne en e piny ka. (Mariko 4:37-41) Nikech obiro locho ka en gi nyalo mar ng’eyo tiend weche kod rieko, obiro puonjo dhano kaka ginyalo rito alwora ma gidakie kendo dak ma ok giketh alwora. (Isaya 11:2) E bwo loch Yesu, onge ng’ato ang’ata ma biro yudo hinyruok moro amora nikech masiche ma betie nikech lokruok ma timore e kor lwasi.

Inyalo penjori kama: ‘En karang’o ma Yesu biro tiyoe gi tekone e chiko kor lwasi?’ Mondo iyud dwoko mar penjono, ne sula ma wiye wacho ni, “Pinyruodh Nyasaye Biro Locho e Wi Piny Karang’o?”

Kaka inyalo nyagori gi masiche ma kindewagi ma betiega nikech lokruok ma timore e kor lwasi

Muma nyalo konyi ng’eyo gima inyalo timo ka pok masira otimore, sama masira otimore, kata bang’ masira.

• 

  Ka pok masira otimore: Ikri chon.

  Gima Muma wacho: “Ng’at mariek neno masira ka biro kendo opondo, Ng’at ma riekone tin to dhi adhiya kendo ohinyore.”​—Ngeche 22:3.

  Tiend wachno: Tem fwenyo masiche ma nyalo mako alwora midakie kendo iik kaka inyalo konyo joodi mapiyo.

  Gik ma notimore: “E odiechieng’ ma ne watony e masira mar mach moro maduong’, noyudo ka waseikore. Ne wan gi bege ma ne wanyalo ringogo moting’o yedhe kod lewni. Kata obedo ni ji ne nigi kibaji, amor ni wan to ne wan gi gimoro amora ma ne dwarore ni wabedgo. Agoyo erokamano ahinya nikech wachno!”​—Tamara, California, Amerka.

• 

  Sama masira otimore: Ket pachi kuom gik ma dwarore moloyo.

  Gima Muma wacho: “Kata ka ng’ato nigi gik mogundho, ngimane ok otenore kuom gik ma en-go.”​—Luka 12:15.

  Tiend wachno: Ngima dhano duong’ moloyo bedo gi gige ringruok.

  Gik ma notimore: “Ka ne kodh yamo mager miluongo ni Typhoon Lawinb oketho odwa, pacha nolal. Kata kamano, gimoro achiel ma ne aparo timo ne en wuoyo gi Jehova e lamo. Ne afwenyo ni gige ringruok e ma ne walalo to ok ngimawa.”​—Leslie, Philippines.

• 

  Bang’ masira: Kik iparri kuom gik ma biro timore kiny.

  Gima Muma wacho: “Kik uparru kuom kiny nikech kiny nobed gi parruokne owuon.”​—Mathayo 6:34.

  Tiend wachno: Kik ibed gi parruok mang’eny e wi gik ma biro timore e kinde mabiro.

  Gik ma notimore: “Bang’ ka kodh yamo mager miluongo ni Hurricane Irma noweyo ka odwa opong’ gi pi, nitie yiero mang’eny ma ne onego atim, to mano nomiyo abedo gi parruok mang’eny ahinya. Natemo luwo puonj manie Muma ma jiwowa ni kik wabed gi parruok kuom gik ma biro timore. Nafwenyo ni Jehova ne nyalo konya nano e chandruok moro amora.”​—Sally, Florida, Amerka.

Mondo iyud weche momedore, som sula ma wiye wacho ni, “Majanga Yanapotokea​—Unachoweza Kufanya Ili Uokoke.”