Liet Mang’eny e Piny Ngima e Higa mar 2023—Ang’o ma Muma Wacho?

E piny ngima, ji nyagore gi liet mang’eny kaachiel gi masiche mamoko ma lietno kelo. Ne ane ripode ma luwogi:

“Mae e dwe mar Jun ma lietie moloyo chakre ne ji chak pimo liet mar kor lwasi higni 174 mokalo.”—National Oceanic and Atmospheric Administration, U.S. Department of Commerce, Julai 13, 2023.
“Pinje mag Italy, Spain, France, Germany kod Poland liet mokalo, kendo wachore ni lietno dhi medore ma chop digri 48, e chula mar Sicily gi Sardinia. Mano e ma nobed liet mamalo ahinya mosegabedoe e Europe.”—European Space Agency, Julai 13, 2023.
“Kaka piny medo chwakore, e kaka wabiro medo bedo gi koth mang’eny ahinya, kendo mano biro kelo ohula mang’eny ahinya.”—Stefan Uhlenbrook, ma en dairekta mar hydrology, water and cryosphere e World Meteorological Organization, Julai 17, 2023.

Dibed ni ripode ma nyiso ni liet medorego miyi luoro? Ne ane gima Muma wacho e wi wach ma sani chando jino.

Be lokruoge madongo ma timore e kor lwasi chopo weche ma nokor e Muma?

Ee. Liet ma medore e piny ngima, kaachiel gi lokruoge mamoko madongo e kor lwasi chopo weche ma Muma nokoro ni ne dhi timore e kindewagi. Kuom ranyisi, Yesu nokoro ni ne wadhi neno “gik ma kelo luoro,” kata “gik ma yoreyore ma buogo ji.” (Luka 21:11; Good News Translation) Liet ma siko medore osemiyo jomoko obedo maluor nikech giparo ni dhano biro ketho piny chuth.

Be pinyni biro kethore ma chop kama dhano ok nyal dakie kendo?

Ooyo. Nyasaye nochueyo piny mondo wadagie nyaka chieng’; ok obi yie mondo dhano okethe. (Zaburi 115:16; Eklesiastes 1:4) Mano e momiyo osewacho ni obiro “ketho jo ma ketho piny.”—Fweny 11:18.

Muma nyiso ni Nyasaye nigi nyalo mar rito piny, kendo obiro rite mondo kik gimoro amora kethe.

‘Nyasaye ne okueyo ahiti; apaka bende noling’ thi.” (Zaburi 107:29) Nyasaye nigi teko mar chiko gik ma timore e kor lwasi. Kendo en gi nyalo mar loso gik mosekethore e kor lwasi mosekelo ne dhano chandruoge madongo.
“Irito piny maber, imiyo omew kendo onyak maber.” (Zaburi 65:9) Nyasaye biro loso pinyni ma oloke obed paradiso ma jaber.

Mondo ipuonjri weche momedore kuom singo ma Muma chiwo e wi kaka ibiro los pinywani, som sula ma wiye wacho ni, “Ni Nani Atakayeiokoa Dunia?”