2023: Higa ma Nopong’ gi Parruok—Ang’o ma Muma Wacho?

E higa mar 2023, gik ma notimore e piny ngima nonyiso maler ni wadak e kinde ma Muma luongo ni “ndalo mag giko.” (2 Timotheo 3:1) Ne ane kaka gik ma timore sani chalre gi gik ma Muma nokoro ni ne dhi timore e ndalo mag giko.

Gik ma Muma nokoro kod gik ma timore e piny ngima

“Lwenje kod humb lwenje.”​—Mathayo 24:6.

• “Timbe gero medore kuonde mang’eny e piny ngima.”a

“Yiengni mag piny . . . kamoro bang’ machielo.”​—Mariko 13:8.

• “Are chak higa mar 2023, wasebedo gi yiengni 13 madongo ma tekogi ng’eny moloyo kinde moro amora mosekalo.”b

“Gik ma kelo luoro.”​—Luka 21:11.

• “Liet mar piny osebedo ka medore; sani to koro chal mana ka gima opopni.”​—António Guterres, jagoro maduong’ mar Riwruok mar Pinje.c

“Chiemo . . . manok.”​—Mathayo 24:7.

• “2023: Higa machielo ma ngima omedo ridore ne joma ok yudga chiemo moromo joodgi.”d

“Kinde matek ahinya.”​—2 Timotheo 3:1.

• “E piny ngima, ng’at achiel kuom ji aboro nigi tuo mar paro.”e

Ang’o ma wanyalo geno e higa mar 2024?

Onge ng’ama nyalo ng’eyo gadier gik ma biro timore e higa mar 2024. Kata kamano, gik ma timore e piny e kindewagi nyiso maler ni machiegnini, Pinyruodh Nyasaye, ma en sirkal manie polo, biro tieko sirkende duto mag dhano kaachiel gi chandruoge kod parruok duto ma dhano nigo.​—Daniel 2:44; Fweny 21:4.

Sama warito kindeno, wanyalo dhi nyime geno kuom Nyasaye mondo okonywa kedo gi parruok. Muma wacho kama:

“In e ma ageno kuomi sa ma luoro omaka.”​—Zaburi 56:3.

Wanyalo nyiso nade ni wageno kuom Nyasaye? Wakwayi mondo ipuonjri weche momedore e wi gima Muma singo, ni e kinde mabiro, chandruok duto biro rumo. Tem ane chenrowa mar puonjruok Muma mondo ine kaka singono nyalo konyi kaachiel gi joodu.