Be Din Onego Odonjre e Weche Siasa?

E piny ngima ji, mang’eny ma wachoga ni gin jolup Yesu Kristo donjorega e weche siasa. Jomoko temoga siro dindegi kata puonj maggi kuom riwo lwedo jasiasa moro kata chama moro mar siasa. Kinde mang’eny, josiasa tiyoga gi weche ma mulo timbe mag ji kata ma mulo ngima ji mondo jo dinde oriwgi lwedo. Waseneno ding’eny ka jotend dinde laro kombe mag siasa. To e pinje moko, kanisni moko ma luongore ni Jokristo inenoga kaka kanisni mopwodhi mag pinjego.

Iparo nade? Be jolup Yesu Kristo onego odonjre e weche siasa? Inyalo yudo dwoko kuom nono ranyisi mar Yesu. Nowacho kama: “Aketonu ranyisi, mondo utim kaka asetimonu.” (Johana 13:15) Yesu noketonwa ranyisi mane kodok korka weche siasa?

Be Yesu nodonjore e weche siasa?

Ooyo. Yesu ne ok odonjore e weche siasa kata matin.

Yesu ne ok olaro kombe mag siasa. Notamore bedo gi loch e wi sirkende duto mag dhano ka ne Satan Jachien dwaro miye “pinjeruodhi duto mag piny.” (Mathayo 4:8-10)a Kinde moro, ji noneno kido mabeyo ma Yesu ne nigo kaka jatelo, to mano nomiyo ne gidwaro kete ruoth. Muma wacho niya: “Ka Yesu nong’eyo ni ne gichiegni biro make mondo gikete ruoth, noa kanyo mi odok e got kar kende.” (Johana 6:15) Yesu ne ok otimo gima jogo ne dwaro ni otim. Kar mano, notamore donjo e weche siasa chuth.

Yesu ne ok oriwo lwedo konchiel e weche siasa. Kuom ranyisi, e ndalo ma Yesu ne nie piny kae, Jo-Yahudi nosin gi wach chulo osuru ne sirkal mar Jo-Rumi, kendo ne gineno wachno kaka ting’ ma ok kare. Ka ne gitemo rwako Yesu e wachno, ne ok oyware kodgi ka be nonego gichul osuru kata ooyo. Kar mano, nonyisogi kama: “Chuluru Kaisar gige Kaisar, to gige Nyasaye ne Nyasaye.” (Mariko 12:13-17) Kata obedo ni ne ok odonjore e weche siasa, nonyiso jogo ni nonego gichul osuru ma sirkal mar Rumi ne oketonegi. E kindego bende, nonyisogi tong’ ma nonego gibedgo sama giluwo chike ma sirkende mag dhano oketo. Ng’ato ne ok onego omi sirkal moro gima nonego omi Nyasaye, moriwo nyaka lamo kod chiwruok chuth.—Mathayo 4:10; 22:37, 38.

Yesu nopuonjo ji wach sirkal mar polo, ma en Pinyruodh Nyasaye. (Luka 4:43) Ne ok odonjore e weche siasa, nikech nong’eyo ni Pinyruodh Nyasaye kende e ma nyalo miyo dwach Nyasaye otimre e piny, to ok sirkende mag dhano. (Mathayo 6:10) Nong’eyo ni Nyasaye ok nyal tiyo gi sirkende mag dhano, to nodhi gologi mondo oket Pinyruodhe kargi.—Daniel 2:44.

Be Jokristo mokwongo nodonjore e weche siasa?

Ooyo. Jolup Yesu noluwo chik ma nomiyogi ma ne dwaro ni kik gibed “mag piny.” (Johana 15:19) Ne giluwo ranyisine, kendo ne ok gidonjore e weche siasa. (Johana 17:16; 18:36) Kar mano, ne gitimo mana tich ma Yesu noweyonegi mar yalo wach maber kendo puonjo ji e wi Pinyruodh Nyasaye.—Mathayo 28:18-20; Tich Joote 10:42.

Kata obedo ni Jokristo mokwongo ne winjo Nyasaye moloyo kaka ne giwinjo sirkende mag dhano, ne ging’eyo ni ne dwarore ni gichiw luor ne sirkendego. (Tich Joote 5:29; 1 Petro 2:13, 17) Ne giluwo chike ma sirkendego noketo, kendo ne gichulo osuru. (Jo-Rumi 13:1, 7) Kata obedo ni ne ok gidonjore e weche siasa, ne gitiyo gi chike ma sirkende e siro ratiro margi.—Tich Joote 25:10, 11; Jo-Filipi 1:7.

Gik ma histori wacho e wi kaka Jokristo mokwongo ne neno weche siasa

“Jokristo notamore timo tije moko ne sirkand Rumi. . . . Ne ok gimanyga tije motudore gi siasa.”—On the Road to Civilization—A World History, ite mar 238.
“Onge gimoro amora ma nyiso ni Yesu ne gombo donjo e tije mag lweny, kata e siasa, kendo . . . mano e ranyisi ma jolupne noluwo.”—Jesus and Judaism, ite mar 231.
“Gima Jokristo noketo mokwongo ne en din margi, to ok weche siasa; ne gichiwore chuth ne Kristo, to ok ne Kaisar.”—Caesar and Christ, ite mar 647.
“[Jaote] Paulo noikore tiyo gi ratiro mare kaka raia mar Rumi e yudo arita ma nowinjore omiye, kata kamano, ne ok odonjore e weche siasa ma kindene. . . . Kata obedo ni Jokristo mokwongo nong’eyo ni ne dwarore ni gichiw luor ne sirkende, ne ok gidonjore e weche siasa.”—Beyond Good Intentions—A Biblical View of Politics, ite mar 122-123.
“Jokristo mang’eny nong’eyo ni ne ok onego gimany kombe mag siasa . . . E chakruok mar senchari mar adek, Hippolytus nowacho ni chike mag Jokristo ne dwaro ni jaloch moro amora ma ne dwaro bedo Jakristo ne nyaka were gi tije mar locho e ka obed Jakristo.”—A History of Christianity, Volume I, ite mar 253.

Jokristo ma kindegi ok onego odonjre e weche siasa

Muma nyisowa maler ni Yesu kod jolupne mokwongo ne ok odonjore e weche siasa. Mano e momiyo mana kaka Jokristogo, Joneno mag Jehova e piny ngima ok donjre e weche siasa. Mana kaka Jokristo mokwongogo, gitimoga mana tich ma Yesu noweyonegi, ma en yalo ‘wach maber mar Pinyruoth.’—Mathayo 24:14.

a Kata obedo ni Yesu ne ok oyie kawo loje mag piny ka ne Satan omiyegi, ne ok okwedo ni Satan e ma nigi teko e wi sirkende mag pinyni. Bang’e, noluongo Satan ni “jaloch mar pinyni.”—Johana 14:30