Oro Mager—Gima Muma Wacho

“Sani liet ng’eny ahinya e piny China, kendo mae e oro mar adek mosebedo mager ahinya e pinyno.”—The Guardian, Septemba 7, 2022.
“Kuonde moko e Afrika, sani oro osebetie kuom higni abich moluwore.”—UN News, Agost 26, 2022.
“Ripode moko nyiso ni oro sani dhi kwako pinje mang’eny mag Ulaya, to mano e ma nyalo bedo oro marach moloyo kuom higni 500 mosekalo.”—BBC News, Agost 23, 2022.

Jolony mang’eny wacho ni oro ma kamago biro dhi nyime bedo marach moloyo. Be nitie geno moro amora ni oro chieng’ norum? Ang’o ma Muma wacho?

Weche ma Muma nokoro e wi oro

Muma nokoro kama e wi ndalowagi:

“Chiemo nobed manok kamoro bang’ machielo.”—Luka 21:11.

Thothne, oro miyo chiemo bedoga manok. Nok mar chiemo keloga chandruoge kod tho, to mano chopo weche ma nokor e Muma.—Fweny 6:6, 8.

Gimomiyo oro medore ameda

Muma nyisowa wach maduong’ momiyo oro medore ameda. Owacho kama:

“Dhano onge gi teko . . . mar chiko ondamone.”—Jeremia 10:23.

Mano tiende ni dhano onge gi nyalo mar chikore giwegi kata bedo gi loch margi giwegi. Thothne, yiero maricho ma gitimoga kelo mana oro kod nok mar pi.

Josayans mang’eny wacho ni gik ma dhano timo e pinyni osemiyo piny omedo bedo maliet, to mano miyo oro medore kuonde mang’eny.
Ich-lach kod chike miketo kiriknigo osemiyo ji oketho bunge mang’eny. Bende, gikeyo sum kod iro ma ketho kor lwasi kendo tiyo marach gi gik ma piny nyago, to mano osekelo nok mar pi.

Kata kamano, Muma miyowa geno.

Be oro chieng’ norum?

Muma singo ni Nyasaye biro tieko nok mar pi. E yo mane?

1. Nyasaye biro “ketho jo ma ketho piny.” (Fweny 11:18) Obiro tieko joma miyo chandruok mar pi betie, tiende ni, joma richo ma igi lach ma timo gik ma ketho alwora.—2 Timotheo 3:1, 2.
2. “Lowo ma ne chieng’ obaro biro lokre thidhiya.” (Isaya 35:1, 6, 7) Nyasaye biro loso gik ma oro oseketho, kendo obiro loko pinyni obed paradiso ma nigi pi mang’eny.
3. “Irito piny maber, imiyo omew kendo onyak maber.” (Zaburi 65:9) Nyasaye biro guedho pinyni mi obed gi chiemo mang’eny kod pi maler ma romo ji te.