Lweny kod Lokruoge mag Kor Lwasi Osemiyo Chiemo Omedo Bedo ma Nok—Ang’o ma Muma Wacho?

Lweny ma dhi nyime e piny Ukraine, kaachiel gi lokruoge mag kor lwasi osemiyo chiemo medo mana bedo ma nok e piny mangima. Chandruogno omako ahinya-ahinya pinje modhier ma thothne ok yudga chiemo moromo.

“Chiemo medo mana bedo ma nok nikech lweny ma dhi nyime, lokruoge mag kor lwasi, nengo mar mafuta ma medo idho, kod weche mamoko.”—António Guterres, jagoro maduong’ mar UN, Julai 17, 2023.
“Jolony wacho ni nikech Russia noweyo bedo achiel kuom pinje ma miyoga pinje mamoko chiemo, mano biro miyo chiemo obed ma nok kendo nengogi biro idho e pinje modhier to ahinya-ahinya e pinje man yo North Africa kod Middle East.”—Atalayar.com, Julai 23, 2023.

Ne ane gima Muma wacho e wi nok mar chiemo kod gima biro timore e kinde mabiro.

Muma nokoro ni chiemo ne dhi bedo ma nok

Yesu nokoro kama: “Oganda noked gi oganda kendo pinyruoth noked gi pinyruoth, bende chiemo nobed manok.”—Mathayo 24:7.
Bug Fweny wuoyo e wi joidh farese moko ang’wen. Achiel kuom joidh faresego ochung’ ne lweny. Iluwe gi jaidh faras machielo mochung’ ne kech. Kech ne dhi bedo e kinde ma chiemo ne dhi bedo ma nok kendo ne idhi use e nengo ma malo. Bug Fwenyno wacho kama: ‘Ne ang’icho mi aneno faras marateng’. Ng’at moidhe noting’o rapim mar ratil e lwete. Eka ne awinjo gimoro ma chalo gi dwol ka wacho niya: “Ogudu mar bel koro nengone romo pok jatich kuom odiechieng’ achiel, kendo ogute adek mag oduma bende nengone mana kamano!”’—Fweny 6:5, 6, The Bible in Luo, 1976.

Weche ma Muma nokoro e wi nok mar chiemo chopo sani e kinde ma Muma luongo ni “ndalo mag giko.” (2 Timotheo 3:1) Mondo ipuonjri weche momedore e wi “ndalo mag giko” kod joidh farese ang’wen ma bug Fweny wuoyoe, ne vidio ma wiye wacho ni Kaka Piny Oselokore Chakre Higa mar 1914 kendo isom sula ma wiye wacho ni “Joidh Farese Ang’wen Gin Jomage?”

Kaka Muma nyalo konyowa

Muma nigi paro mabeyo ma nyalo konyowa nyagore gi chandruoge ma waromogo kaka nok mar chiemo kod nengo ma idho mag chiemo. Kuom ranyisi, ne ane paro kaka mago e sula ma wacho ni “Jinsi ya Kuishi Ukiwa na Pesa Kidogo.”
Muma miyowa geno kowacho ni weche biro dhi maber. Osingonwa ni nitie kinde ma “cham nobed mang’eny e piny” kendo ji duto biro bedo gi chiemo mang’eny moromogi. (Zaburi 72:16) Mondo iyud weche momedore e wi genono kod gimomiyo inyalo bedo gadier ni genono biro chopo kare, ne sula ma wacho ni “Tumaini Bora la Wakati Ujao.”