Ang’o Momiyo Ji Ok Nyal Kelo Kuwe e Piny?​—Ang’o ma Muma Wacho?

Jotelo mag piny kod riwruoge madongo mopogore opogore osetemo kelo kuwe e piny, to osetamogi. E kindewagi, ywaruok kod lwenje osemedore moloyo kinde moro amora, to ahinya-ahinya chakre Lweny mar Ariyo mar Piny Ngima. Chiegni ji ma dirom bilion ariyo e piny ngima odak kuonde ma nitie ywaruok kod lwenje.

Ang’o momiyo dhano ok nyal kelo kuwe e piny? Ang’o ma Muma wacho?

Gik moko adek momiyo dhano ok nyal kelo kuwe e piny

1. 1. Dhano nigi kido moko ma monogi loso kuwe gi jowetegi. Muma nokoro ni e ndalowagi ji ne dhi bedo “jo moherore giwegi, jo mohero pesa, jo ma pakore, jong’ayi, . . . jo ma ok makre chuth gi jomamoko, . . . jo ma ok oikore loso winjruok moro amora, . . . jo ma onge ritruok, jo mager, . . . jo ma wigi tek, jo sunga.”​—2 Timotheo 3:2-4.

2. 2. Dhano onge gi nyalo mar tieko chandruoge ma giromogo, bed ni en ng’ato achiel kata ka gin e grube. Jehovaa Nyasaye, ma en Jachuech e ma nyalo konyogi tieko chandruogego. Muma wacho ni “dhano onge gi teko kata mar chiko ondamone.”​—Jeremia 10:23.

3. 3. Piny nie bwo teko mar jaloch marach kendo ma nigi teko miluongo ni Satan Jachien, ma “wuondo piny mangima.” (Fweny 12:9) Ka pod “piny duto ni e teko mar ng’at marach,” ywaruok kod lwenje biro betie.​—1 Johana 5:19.

En ng’ano ma nyalo kelo kuwe e piny?

Muma nyisowa ni Nyasaye e ma biro kelo kuwe madier, to ok kinda ma dhano timo.

• “‘Nimar an awuon ang’eyo gima aparo kuomu,’ Jehova owacho, ‘adwaro ni ubed gi kuwe to ok masira, mondo amiu gima unyalo geno bang’e.’”​—Jeremia 29:11.

Ere kaka Nyasaye biro chopo singono? “Nyasaye ma chiwo kuwe biro ng’inyo Satan.” (Jo-Rumi 16:20) Nyasaye biro tiyo gi sirkal moro manie polo, ma Muma luongo ni “Pinyruodh Nyasaye,” mondo okel kuwe e piny ngima. (Luka 4:43) E Pinyruodhno ma Ruodhe en Yesu Kristo, ibiro puonj ji kaka ginyalo dak gi kuwe.​—Isaya 9:6, 7.

• Mondo iyud weche momedore, som sula ma wiye wacho ni “Ang’o ma Pinyruodh Nyasaye Biro Timo?”