Ang’o Momiyo Tek Ahinya Mondo Kuwe Obed e Piny Mangima?

Dwoko ma Muma Chiwo

Kinda ma ji keto e kelo kuwe e piny mangima osebedo kayiem nono. Dhano ok bi nyalo kelo kuwe nikech weche maluwogi:

• “Dhano onge gi teko yiero yore mowuothoe.” (Jeremia 10:23) Nyasaye ne ok ochueyo dhano gi nyalo mar tayore giwegi, omiyo, ok ginyal kelo kuwe mosiko e piny.

• “Kik ugen jo madongo, kata dhano moro, ma onge gi gik ma digikonygo. Muche orumo, giyike e lowo; Chieng’onogo gi moparo olal alala.” (Zaburi 146:3, 4) Jotend sirkende kata ma nigi kido mabeyo machalo nade, ok nyal tieko gik makeloga lwenje.

• “To ng’e wachni, ni kinde matek ahinya nobedie e ndalo mag giko. Nimar ji nobed . . . joma ger, joma ok ohero gik mabeyo, jo andhoga, joma wigi tek, joma opong’ gi sunga.” (2 Timotheo 3:1–4) Wadak e “ndalo mag giko” ma gin kinde ma loso kuwe tek.

• “Nobed malit ne piny kod nam, nimar Jachien oselor mwalo iru ka en gi mirima mager, kong’eyo ni odong’ mana gi kinde manok.” (Fweny 12:12) Osewit Jachien, ma en jasik Nyasaye e piny ka, kendo ojiwo ji mondo oluw kite marach mar gero. Ka pod en “jaloch mar pinyni,” ok wabi bedo gi kuwe.—Johana 12:31.

• ‘Pinyruodh Nyasaye nong’iny pinje ruodhi duto [ma kwedo Nyasaye] mi notiekgi kendo [pinyruodhno] nobedie nyaka chieng’.’ (Daniel 2:44) Pinyruodh Nyasaye kende ema biro kelo kuwe e piny mangima.—Zaburi 145:16.