Timbe Maricho Siko ka Medore e Piny Ngima​—Ang’o ma Muma Wacho?

Grube mopogore opogore mag njore ketho gik moko e piny Haiti. Timbe gero kod mahundu osekelo chandruoge mang’eny e piny South Africa, Mexico, kod pinje mamoko ma yudore yo milambo mar Amerka. Kata mana kuonde ma timbe mag gero osedokie piny, ji pod odak gi luoro kod parruok nikech jokuoge pod turo ute ji kuondego.

Ang’o ma Muma wacho e wi timbe maricho ma sani timore e piny ngima?

Gima Muma nokoro e wi timbe maricho

Muma nokoro ni timbe maricho ne dhi bedo achiel kuom gik ma nyiso ni “giko mar ndalo okayo machiegni.” (Mathayo 24:3) Ka ne Yesu Kristo wuoyo e wi gik ma ne dhi nyiso ni wadak e ndalo mag giko nowacho niya:

• “Nikech timbe maricho nomedre, hera mar ji mang’eny nobed mang’ich.”​—Mathayo 24:12.

Muma bende nokoro ni e ndalo mag giko ji ne dhi bedo ‘ma onge ritruok, mager, kendo ma ok ohero gik mabeyo.’ (2 Timotheo 3:1-5) Kido ma kamago osemiyo timbe maricho omedore e kindegi.

Kata kamano, nitie gimomiyo onego wabed gi geno. Muma singo ni machiegnini timbe maricho duto ibiro tieki.

• “Odong’ mana kinde matin, to joricho ok nobedie; inimanygi kuonde ma ne gintie, to ok ibi yudogi. To jo mamuol nobed weg piny, kendo ginibed mamor ahinya nikech ginidag gi kuwe.”​—Zaburi 37:10.

Puonjri weche mathoth e wi geno ma Muma chiwo kod gimomiyo onego wabed gadier ni gik ma timore e piny kawuono chopo weche ma Muma nokoro. Som sula ma luwogi:

“Tumaini Bora la Wakati Ujao”

“Ni Nini Ishara ya ‘Siku za Mwisho’?”

“Je, Biblia Ilitabiri Mitazamo na Matendo ya Watu Leo?”