Be Muma Nyalo Konyi Sama In gi Gowi Kata Chandruoge mag Pesa?

Dwoko ma Muma chiwo

Ee. Puonj ang’wen mag Mumagi nyalo konyi sama in-gi gowi kata chandruoge mag pesa:

1. Chan kaka idhi tiyo gi pesa. “Chenro mag jakinda kelo ohala, to ji duto ma rikni bedo modhier.” (Ngeche 21:5) Kik irikni nyiewo gimoro mana nikech iuse. Los bajet kendo iluwe kaka en.

2. Kik idonj e gowi ma ok ochuno. “Jagowi bedo misumba ng’at mohole.” (Ngeche 22:7) Ka po ni in gi gowi to pod chule otami, tem wuoyo gi ng’at ma ne oholi mondo iyud yore moko mayot minyalo chulogo gowino. Kik ijogi. Ti gi puonj mar Muma ma wuoyo e wi ng’at moro ma nochung’ ne ng’ato e gope e yo ma ok kare to okawo ting’ mar chulo gowino. Ndikono wacho kama: “Dhi ire mapiyo, ibolrine kendo ihombe. Kik iwe nindo oteri, kendo kik inur.” (Ngeche 6:1-5) Kata ka po ni ok oyie sama ihango kwaye, in dhi adhiya nyime kwaye.

3. Bed gi paro mowinjore e wi pesa. “Kik ibed gi siso mar bedo ng’at ma omewo nikech inyalo bedo e chal marach moloyo kata kaka niparo.” (Ngeche 28:22, Contemporary English Version) Nyiego gi ich-lach nyalo miyo ilal mwandu mang’eny kendo onyalo ketho winjruokni gi Nyasaye.

4. Gik ma in-go mondo oromi. “Ka wan gi chiemo kod lewni, mago mondo oromwa.” (1 Timotheo 6:8) Pesa ok nyal keloni mor e ngima. Moko kuom joma mor ahinya e piny, onge gi pesa mang’eny. En mana ni joodgi kod osiepegi oherogi kendo gin gi winjruok maber gi Nyasaye.​—Ngeche 15:17; 1 Petro 5:6, 7.