Ang’o Momiyo Joneno mag Jehova Ok Dhiga e Lweny?

Joneno mag Jehova ok dhiga e lweny nikech weche ma luwogi:

1. Giluwo chik Nyasaye. Muma wacho ni jotich Nyasaye ne dhi ‘thedho ligengnigi obed kwer,’ kendo ni ne ok gidhi ‘puonjre lweny kendo.’​—Isaya 2:4.

2. Giluwo chik Yesu. Yesu nonyiso jaote Petro niya: “Duok liganglani kare, nimar jogo duto ma tiyo gi ligangla notho tho ligangla.” (Mathayo 26:52) Mano nyiso maler ni jolup Yesu ne ok onego odonjre e lweny.

   Jopuonjre Yesu “ok gin mag piny” mana kaka Yesu nowacho. Ginyiso ni ok gin mag piny sama ok gidonjre e weche siasa. (Johana 17:16) Ok ging’anyga sama jolweny okawo okang’ moro, kendo ok gikwed joma oyiero dhi e lweny.

3. Gihero ji. Yesu nochiko jopuonjrene ni giherre. (Johana 13:34, 35) Mano ne dhi miyo gibed e riwruok achiel e piny ngima kendo ne ok gidhi kedo gi jowetegi.​—1 Johana 3:10-12.

4. Giluwo ranyisi mar Jokristo mokwongo. Buk miluongo ni Encyclopedia of Religion and War wacho kama: “Jolup Yesu mokwongo ne ok donjre e lweny, kata timo tije motudore gi lweny.” Ne gineno lweny kod tije kaka mago “kaka gik ma kwedo chik ma Yesu nopuonjogi ni giher jowasikgi.” Peter Meinhold ma wuok e piny Germany kendo mosomo weche din nowacho kama e wi Jokristo mokwongo: “Ne ok nyalre mondo ng’ato obed Jakristo kendo jalweny.”

Kaka gikonyoga joma odak e alworagi

Joneno mag Jehova konyoga ji duto kendo ok gitimga gik ma nyalo miyo sirkende ochich kodgi. Wachiwo luor ne sirkende ma locho nikech Muma nyisowa niya:

• “Ng’ato ka ng’ato mondo obolre ne joloch.”​—Jo-Rumi 13:1.

• “Chuluru Kaisar gige Kaisar, to gige Nyasaye ne Nyasaye.”​—Mathayo 22:21.

Omiyo, waluwo chike sirkal, wachulo osuru, kendo wariwo lwedo yore ma sirkal oketo mag konyo ji.