Be Ochuno ni Nyaka Abed gi Din ma Alemee?

Dwoko ma Muma chiwo

Ee, nikech Nyasaye dwaro ni ji ochokre kanyachiel ne lamo. Muma wacho niya: “Wadewreuru mondo wajiw hera kod timbe mabeyo, ma ok wajwang’ bedo e chokruogewa kanyachiel.”​—Jo-Hibrania 10:24, 25.

Yesu nowacho ni jolupne ne dhi bedo e riwruok moro mochanore ka nowachonegi kama: “Ma e ma nomi ji duto ong’e ni un jopuonjrena ka un gi hera e kindu uwegi.” (Johana 13:35) Yo maduong’ ma jolup Kristo ne dhi nyisogo herano en ka gichokore kanyachiel. Ne idhi chan-gi e kanyakla mopogore opogore mondo gichokrega ne lamo. (1 Jo-Korintho 16:19) Kanyaklago duto koriw to bedo riwruok mar owete manie piny ngima.​—1 Petro 2:17.

Bedo abeda gi din ma ilemee ok oromo

Kata obedo ni Muma wacho ni ji onego ochokre kanyachiel mondo gilam Nyasaye, mano ok nyis ni gibiro moro Nyasaye nikech koro gin gi din ma gilemee. Mondo Nyasaye oyie gi ng’ato, dinne nyaka mul ngimane ma pile pile. Kuom ranyisi, Muma wacho niya: “Lamo maler kendo ma ok ochido e wang’ Nyasachwa kendo Wuoro en ma: ni warit nyithi kiye kod mond liete e chandruokgi, kendo waritre wawegi mondo kik wabed gi mbala moro amora moa e pinyni.”​—Jakobo 1:27.