Muma Wacho Ang’o e Wi Kong’o? Be Madho Kong’o En Richo?
Dwoko ma Muma chiwo
Madho kong’o ok en richo ka ng’ato ok ometho mokalo tong’. Muma wacho ni divai en mich moa kuom Nyasaye, kendo ni divai nyalo miyo chuny dhano mor. (Zaburi 104:14, 15; Eklesiastes 3:13; 9:7) Muma wacho bende ni divai kata kong’o inyalo tigo e weche thieth.—1 Timotheo 5:23.
Yesu nomadho divai kinde ma ne en e piny. (Mathayo 26:29; Luka 7:34) Achiel kuom honni mong’ere ahinya ma ne Yesu otimo ne en loko pi obed divai e nyasi moro mar kend.—Johana 2:1-10.
Hinyruok ma madho kong’o mokalo tong’ kelo
Kata obedo ni Muma ok kwer wach mar madho kong’o, ok oyie kata matin gi metho mokalo tong’ kod mer. Omiyo, ka Jakristo oyiero madho kong’o, ok onego ometh mokalo tong’. (1 Timotheo 3:8; Tito 2:2, 3) Muma chiwo puonj mang’eny ma nyiso gimomiyo ok onego wamadh kong’o mokalo tong’.
Metho mokalo tong’ chocho pach ng’ato kendo nyalo miyo kik ong’ad paro e yo maber. (Ngeche 23:29-35) Ng’at ma omer ok nyal chopo chik manie Muma ma wacho ni ‘wachiw ringrewa kaka misango mangima, maler kendo ma Nyasaye oyiego, ka watiyone gi nyalowa mar paro.’—Jo-Rumi 12:1.
Metho mokalo tong’ “mayo ji rieko” kendo nyalo miyo ng’ato chir manono mar timo gik ma ok dotim ka wang’e ler.—Hosea 4:11; Jo-Efeso 5:18.
Kong’o mang’eny nyalo ketho dend ng’ato kendo kelone dhier.—Ngeche 23:21, 31, 32.
Metho mokalo tong’ kod mer ok mor Nyasaye.—Ngeche 23:20; Jo-Galatia 5:19-21.
Ng’ato nyalo ng’eyo nade tong’ ma ok onego okal?
Ng’ato nyalo kalo tong’ ka ometho mochopo kama koro ochako hinyo jomoko kata hinyore owuon. Ka luwore gi Muma, ok ochuno ni nyaka pach ng’ato lal eka wach ni omer. Kar mano mer nyalo nenore ka ng’ato wuotho ka tagore, kata ogere gi ji, kata obodho wach. (Ayub 12:25; Zaburi 107:27; Ngeche 23:29, 30, 33) Kata mana joma ong’eyo tong’gi e madho kong’o pod nyalo yudo hinyruok ma kong’o kelo.—Luka 21:34, 35.
Kinde Monego Ng’ato Owere gi Kong’o Chuth
Muma nyiso bende ni nitie kinde ma nyalo dwarore ni Jokristo owere gi kong’o chuth. Kuom ranyisi:
Ka po ni madhe nyalo chwanyo jomoko.—Jo-Rumi 14:21.
Ka po ni madho kong’o ketho chik sirkal.—Jo-Rumi 13:1.
Ka po ni ng’ato ok nyal keto tong’ e okang’ ma omethogo. Joma madho kong’o mokalo tong’ kod joma mer onego okaw okang’ mapiyo mar weyo kong’o.—Mathayo 5:29, 30.