Dichwo moro ng’iyo kaka ji donjo e Kingdom Hall

PENJO MA ROWERE OHERO PENJORE

Ang’o Momiyo Onego Idhi e Chokruoge Mitimo e Kingdom Hall?

Joneno mag Jehova e piny mangima, chokorega diriyo e juma e ute lamo miluongo ni Kingdom Hall. Ang’o ma timorega kuno, to ang’o momiyo ber ka ichokori kuno?

Ang’o ma timorega e Kingdom Hall?

Kingdom Hall en kama ipuonjruokie Muma. Chokruoge mitimo kuno nyalo konyi mondo:

ipuonjori adiera e wi Nyasaye.
ing’e tiend gik ma timore sani.
ibed ng’at maber.
iyud osiepe mabeyo.

Be ing’eyo? Kama Joneno mag Jehova time chokruogegi iluongo ni Kingdom Hall, nikech gima duong’ miwacho kuno en wach Pinyruodh Nyasaye.—Mathayo 6:9, 10; 24:14; Luka 4:43.

Ang’o momiyo onego idhi e chokruoge?

Weche mipuonjo kuno biro konyi. Puonj mag Muma mipuonjo e chokruoge mag Joneno mag Jehova, biro konyi mondo iyud “rieko.” (Ngeche 4:5) Mano nyiso ni Muma nyalo konyi timo yiero mabeyo e ngima. Bende, onyalo konyi yudo dwoko mag penjo madongo kaka:

Ma luwogi gin moko kuom wi twege migolo e chokruogewa mag giko juma:

Ang’o Momiyo Muma Ema Onego Otawa?
Ere Kama Inyalo Yudoe Kony e Kinde mag Chandruok?
Gima Pinyruodh Nyasaye Timonwa Gie Sani.

“Jaklaswa moro nobiro e chokruok. Nobet gi joodwa kendo ne wasomo kode buge ma ne wating’o. Bang’e, nonyisa ni nomor gi paro mane ji ochiwo. Nowacho bende ni e kanisagi, giongega gi gik ma gipuonjorego Muma kaka wan.”—Brenda.

Be ing’eyo? Donjo e Kingdom Hall en nono, onge chudo kata sadaka moro amora michoko.

Ibiro yudo jip sama itudori gi joma ni kuno. Muma wacho ni achiel kuom gimomiyo Jokristo onego oromga kanyachiel, en ni mondo ‘gijiwre.’ (Jo-Hibrania 10:24, 25) Wabedoga ma mor ahinya sama wan gi osiepe mabeyo moketo weche Nyasaye kod jowetegi obed mokwongo e pinyni ma ji ok dew jowetegi.

“Bang’ bedo gi odiechieng’ ma rabora, chunya nyosorega kendo awinjoga ka ajony, kata kamano, joma nie Kingdom Hall miyo awinjoga maber. Bang’ wuok e chokruok, awinjoga ka amor kendo aikora ne odiechieng’ machielo.”—Elisa.

Be ing’eyo? Nitie kanyakla mag Joneno mag Jehova mokalo 120,000 e piny ngima, kendo gichokorega kuonde mokalo 60,000. Chiegni ni higa ka higa, imedoga ger Kingdom Hall maromo 1,500 nikech kwan ma medore mag joma biro e chokruok.a

Gik ma mbeseni wacho

“Ka ne an e sekondari, nitie kinde ma ne ajadhiga gi jaklaswa moro e chokruogewa. Neno kaka ji ma hikgi opogore opogore puonjore Muma ne omore ahinya. To machiegnini, jatenda nobiro e chokruok, to ne omor ahinya gi kaka watiyo gi Muma e chokruok. Neno kaka chokruogewa nomore nomiyo an bende amedo bedo mamor gi chokruok!”—Jessica.

“Ayudoga ka chokruoge miyo abedo gi chuny mokuwe kata obedo ni an gi parruok mapile mag ngima. Wapuonjorega kaka wanyalo dak gi mor, kaka wanyalo bedo joma beyo kod gik mamoko mang’eny. Awuokga e Kingdom Hall ka ayudo jip kendo ka ategno.”—Timothy.

“Dichwo moro mane agwelo e chokruok bang’e nowacho kama: ‘Ne abiro e chokruok mondo ane ka be anyalo kwedo gik ma uyiego. Kata kamano, nafwenyo ni kara yie mara e ma ne rach!’ Bende, ne omor gi kaka Joneno mag Jehova norwake kod kaka ne gimor. Nowacho kama: ‘Kata obedo ni e ka ahango romo kodu, urwaka mana kaka ng’at ma useng’eyo kuom higni mang’eny!’”—Jacob.

“Nitiega kinde ma asegaparo ni, ‘Abiro wuok mapiyo ka chokruok orumo.’ Kata kamano, sama chokruok dhi nyime parono lalga alala. Bang’ chokruok, awuoyoga gi ji kendo awuoroga gimomiyo ne aparoga wuok mapiyo. Ka dine bed ni ok adhiga e chokruoge, dikoro aonge gi osiepe mabeyo ma an-go sani.”—Madison.

a Mondo iyud kama watime chokruogewa, dhi kama wacho ni “Chokruoge mag Joneno mag Jehova” kae to idi kama ondik ni “Yud Kar Chokruok Man Machiegni Kodi.”