Joneno mag Jehova Nigi Paro Mane e Wi Skul?

Paro ma wan-go e wi skul otenore kuom puonj manie Muma. Janeno ka Janeno tiyo gi chunye motieg gi Muma mondo okonye kaka onyalo tiyo gi puonj maluwogi.a

• Skul en gima dwarore

• Onego wabed gi paro mowinjore e wi skul

• Somo mamalo nyalo miyo ng’ato obed gi timbe maricho mi oketh winjruokne gi Nyasaye

• Be Joneno mag Jehova niga gi Sunday schools?

Skul en gima dwarore

Skul konyo ng’ato mondo obed gi ‘rieko kod rieko mipogogo weche,’ ma gin kido ma Muma pwoyo ahinya. (Ngeche 2:10, 11; 3:21, 22) E wi mano, Yesu nochiko jolupne ni gipuonj ji gik ma nonyisogi. (Mathayo 28:19, 20) Omiyo, wajiwo kendo wakonyo owetewa gi nyiminewa mondo gipuonjre gik mathoth, kaka somo, ndiko, kod tudruok gi ji,b kaachiel gi ng’eyo weche moko motudore gi dinde kod timbe mag ogendini mamoko.​—1 Jo-Korintho 9:20-22; 1 Timotheo 4:13.

Sirkande mag dhano bende ong’eyo ber mar somo kendo gidwaroga ni nyathi ka nyathi oyud somo mar primary gi secondary. Wateroga nyithindwa e skul nikech Muma chikowa ni: “Ng’ato ka ng’ato mondo obolre ne joma nigi teko mar loch,” kata sirkande mag dhano. (Jo-Rumi 13:1) E wi mago, wajiwoga nyithindwa mondo gisom matek kendo gitim maber e skul, to ok ni gisom asoma tek ni gisomo.c Wach Nyasaye wacho niya: “Gimoro amora mutimo, to timuru gi chunyu duto, mana ka gima utiyo ni Ruoth, to ok ni dhano.”​—Jo-Kolosai 3:23, The Bible in Luo 1976.

Somo konyowa e pidho joodwa. Muma wacho ni, “ka ng’ato ok chiw gik ma dwarore ne joma gin joge owuon, to moloyo joma gin joode, osekwedo yie kendo orach moloyo ng’at ma onge yie.” (1 Timotheo 5:8) Somo nyalo konyowa chopo migawo ma Nyasaye omiyowa mar pidho joutewa. Mana kaka The World Book Encyclopedia wacho, gima duong’ momiyo wadhi e skul en ni somo “tiego ji mondo gibed joma nyalo konyo jomamoko e oganda . . . giger piny.” Ng’at mosomo maber nyalo rito joode e yo maber moloyo ng’at maok odhi skul.​—Ngeche 22:29.

Jonyuol bende puonjo nyithindgi gik mabiro konyogi e ngimagi kata ka koro gisebedo joma dongo, to yo maber mar timo kamano en terogi mondo gisom e skul. (2 Jo-Korintho 12:14) Wajiwo jonyuol mondo giter nyithindgi e skul kata bed ni gidak e alwora ma nyithindo ok som nono, kuonde ma skunde ok yudore mayot, kata kuonde ma chike mag anyuola kwedo wach somo.d Bende, wasechiwo paro moko ma jonyuol nyalo tiyogo mondo gikony nyithindgi oyud somo.e

Onego wabed gi paro mowinjore e wi skul

Wanono e yo matut paro mopogore opogore michiwo e wi somo. Muma wacho niya: “Ng’at ma riekone tin oyie ayiea weche duto, to ng’a ma jaterre mos oparo maber yo ma dowuothie.” (Ngeche 14:15) Watiyo gi puonjni sama wanono e yo matut tiegruok mopogore opogore ma nyathi nyalo timo bang’ tieko sekondari kod ber ma tiegruok ma kamano nyalo kelonegi. Wanono bende kwan mar pesa ma tiegruok ma kamano nyalo kawo. Kuom ranyisi, tiego nyathi mondo ong’e tije mag lwedo en gima nyalo konyo ahinya bang’e.

Puonj mag Muma nigi ber mathoth kopim gi somo miyudo e skul. Mana kaka puonj miyudo e skul konyo, puonj mawuok e muma konyowa dak e ngima maber ahinya kendo konyowa ng’eyo Nyasaye e yo maber. (Johana 17:3) Bende okonyowa ng’eyo ‘tiend tim makare kod ng’ado bura, gi tim mowinjore bende e kind ji, ee, yore duto mabeyo.’ (Ngeche 2:9) Jaote Paulo bende noyudo somo mamalo ma e kindewagi inyalo pim gi somo mar yunivasiti, kata kamano nofwenyo ni ‘ber mar ng’eyo Kristo Yesu Ruoth nigi ohala maduong’ moloyo’ (Jo-Filipi 3:8; Tich Joote 22:3) E kindewagi bende, Joneno mag Jehova mang’eny osesomo modhi kata mana e yunivasiti, kata kamano, ging’eyo ni puonj ma giyudo e Muma oloyo mabor somo ma pinyni chiwo.f

Somo mamalo nyalo ketho timbewa mabeyo kod winjruokwa gi Nyasaye

Ngero moro mar Muma wacho ni: ‘Ng’a materore mos oneno gi moro marach mi opondo.’ (Ngeche 22:3) Joneno mag Jehova neno ni gik ma timore e yunivasiti kata kuonde ma ji yudoe somo mamalo nyalo ketho timbegi mabeyo kod winjruokgi gi Nyasaye. Nikech mano, Joneno mang’eny ok ohero dhi e yunivasiti kata tero nyithindgi mondo oyud somo mamalo. Gineno ni kuondego ema ji jiwega paro ma ok nikare kaka maluwogi:

• Paro ma ok kare: Pesa miyowa mor kod rit maber

  Ji paroga ni ka ng’ato oyudo somo mamalo, to obiro yudo tich maber michule pesa mang’eny, omiyo ji mang’eny ma dhiga e yunivasiti timoga kamano mondo chieng’ giyud tich maber. Jomoko paroga ni pesa nyalo kelo mor kod arita maber, kata kamano, Muma wacho ni paro ma kamano en ma nono. (Eklesiastes 5:10) E wi mago, Muma bende puonjo ni “hero pesa en achiel kuom chakruok mar gik moko duto ma kelo hinyruok” kendo kinde mang’eny olalo yie mar ng’ato. (1 Timotheo 6:10) Joneno mag Jehova temoga matek mondo “wuond mar mwandu” kik logi.​—Mathayo 13:22.

• Paro ma ok kare: Ng’ato onego oyud somo mamalo mondo obed gi huma kod duong’ ma joma osomo nigo

  Kuom ranyisi, prime minister ma Georgia miluongo ni, Nika Gilauri, nondiko kama kaluwore gi paro ma ji nigo e gweng’gi: “Chiegni ni digri miyudo e yunivasiti en gima ochuno mondo e ka ibed gi huma e piny Georgia . . . [E kinde mokalo,] rowere ma ne onge gi digri ne ineno kaka joma kelo wich kuot ne joodgi.”g Mopogore gi mano, Muma kwerowa ni kik wamany huma mag pinyni. Yesu nonyiso jotend din ma ne manyo huma e kindene niya: “Ere kaka unyalo bedo gi yie, kurwako duong’ moa kuomu uwegi?” (Johana 5:44) Somo mar yunivasiti nyalo miyo ng’ato obed gi sunga, to mano en gima Nyasaye osin-go.​—Ngeche 6:16, 17; 1 Petro 5:5.

• Paro ma ok kare: Ng’ato ka ng’ato nigi ratiro mar timo gima oneno ni berne

  Joneno mag Jehova luwo puonj mag Nyasaye manyiso ber gi rach. (Isaya 5:20) Kata kamano, kaluwore gi weche ma ne ondik e buk miluongo ni Journal of Alcohol and Drug Education, aola mag mbese e yunivasiti miyoga jopuonjre mang’eny “timo yiero moko maricho mopogore gi adiera ma ging’eyo e wi ber gi rach.”h Muma bende nigi puonj machal gi mano ma wacho ni: “Bedo osiepe joma richo ketho timbe mabeyo.” (1 Jo-Korintho 15:33) E yunivasiti mang’eny, timbe maricho ma Nyasaye odagi kaka mer, tiyo gi yedhe ma mero, kod terruok gin timbe monya ahinya kendo ji mang’eny ohero timbego.​—1 Jo-Korintho 6:9, 10; 2 Jo-Korintho 7:1.

• Paro ma ok kare: Somo mamalo e yo maber ahinya mar gero piny

  Wang’eyo ni nitie joma manyoga somo mamalo, ok ni mondo giyud mwandu, huma, kata raha ma ok owinjore, to giyud kaka ginyalo konyore giwegi kendo konyo piny. Timo kamano ok rach, kata kamano, Joneno mag Jehova timoga yiero mopogore. Mana kaka Yesu, wageno ni Pinyruodh Nyasaye kende ema biro loso piny obed maber. (Mathayo 6:9, 10) Kata kamano, ok warit arita ka waling’ ni Pinyruoth biro tieko chandruoge manie piny. Kar mano, watimo mana kaka Yesu notimo, ka walando ‘wach maber mar Pinyruoth’ e piny duto, ka higa ka higa wakonyo ji mang’eny mondo gilok ngimagi obed maber.i​—Mathayo 24:14.