Chiwo Kony e Kinde mag “Lwenje kod Humb Lwenje”

E kinde mag gikogi, wabiro winjo “lwenje kod humb lwenje.” (Mathayo 24:6) Kata kamano, sama owetewa romo gi chandruoge ma lwenje kelo, giyudoga kony. Ripot mar Adek mar Bura Matayo​—2022 nonyisowa kaka owetewa man e pinje mag Eastern Europe osebedo ka chiwo kony ne owetewa ma chandore nikech lweny e piny Ukraine. Ere kaka owetewago osebedo ka chiwo kony kata sama lweny dhi nyime? Ere kaka tij chiwo kony osejiwo owetewa man e pinyno?

Gin Ang’o ma Owetewa Ochando? Ere Kaka Ikowonegiga Gik ma Gichandogo?

Tarik 24, Februar 2022, ma en odiechieng’ ma lweny nomuochie e piny Ukraine, Komiti mar Jocheno nopwodho mondo ong’iew gik ma ne dhi konyo owetewa man e pinyno. Ofiswa ma Ukraine nochako ng’iewo mapiyo gik ma ne owete ochando, kendo pogo gigo ka gitiyo gi komiti 27 ma konyo e kinde masiche.

Mopogore gi gik ma ne ofiswa ma Ukraine ong’iewo, ofiswa maduong’ man Amerka nochako manyo yore mamoko ma ne ginyalo konyogo owete gi nyimine man Ukraine. Komiti mar Jocheno kod Komiti mar Gocho ma tiyo e bwo Bura Matayo, nokwayo Migawo Mochung’ ne Ng’iepo e Piny Ngima mondo oti kanyachiel gi owete ma ne wuoyo e lo ofisewa ma Ukraine kod ma Poland e neno kaka kony ne nyalo chopo ne owete gi nyimine. Owete manie e Migawo Mochung’ ne Ng’iepo, Migawo Mochung’ ne Kowo Buge, Migawo mar Chike, owadwa moro man e Komiti mar Bad Ofis ma Ukraine, kaachiel gi owete manie Migawo Mochung’ ne Ng’iepo e Piny Ngima, ne romoga pile mondo gichan kaka ne ginyalo kowo kony ne owetewa gi nyiminewa ma ne chandore.

Jay Swinney ma tiyo e Migawo Mochung’ ne Ng’iepo e Piny Ngima nowacho kama: “Mokwongo, ne dwarore ni wang’e gik ma owetego nochando. Ne dwarore ni water chiemo kod gige rito ler ma owetewago nong’iyogo. Ng’eyo gik ma owetewago nochando gadier, ne en mana achiel kuom gik ma ne chando pachwa ahinya. Ne dwarore ni wachan bende kaka konygo ne dhi chopo Ukraine e kinde lweny. Ne wadwaro tiyo gi yo mayot kendo mapiyo e tero gigo.”

Chop tarik 9 Mach 2022, ne waseng’eyo gik ma owetewago nochando. Ne oik katonde mang’eny ma noting’o chiemo kaka ring’o kod rech mobo maber, ochele, oganda, olayo kod chiemo mamoko kaka mago, kaachiel gi gige rito ler kaka sabun kod tissue papers. E kindego, ne iparo ni mondo jogo oyud gik ma ne gidhi tiyogo kuom jumbe ang’wen, ne dhi dwarore ni riwruokwa oti gi siling’ ma dirom 6,500 ma Kenya kuom ng’ato achiel. To nikech owete gi nyimine mang’eny ne ochando gigo, Komiti mar Jocheno nopwodho pesa momedore ma ne inyalo tigo e ng’iewo gigo. Kata kamano, ere kaka gigo ne dhi chopo ne owete gi nyimine ma ok oket ngima owete ma ne teronegi kama rach?

Tarik 13 dwe mar Mach, owete ariyo ma wuok Poland notemo tero gik moko ka gia e ofiswa ma Poland nyaka kar keno man machiegni gi Lviv e piny Ukraine. Odiechienge moko ka ne pok owetego ochako wuoth, owetewa ma wuok e ofiswa ma Poland kod Ukraine nokonyo owete ariyogo timo ikruok maber. Ofiswa notimo gik moko duto ma ne dwarore ka luwore gi chik mondo owete ariyogo obed gi tich mayot sama gikalo boda. Bende, ne gibawo weche ma nyiso ni gin joma tero kony e mtokni ma ne gin-go, kendo ne gitudore gi owete ma ne ni Ukraine mondo okonygi ng’eyo nderni ma ne nyalo terogi mapiyo. Nikech ikruok ma notim maber kamano, kendo nikech Jehova noguedho chenro duto, owetego notiyo gi seche matin ne 24 e tero gigo ne Komiti Makonyo e Kinde Masiche ma ne ni Lviv kendo ne gidok Poland ma ok giyudo hinyruok moro amora.

Kata obedo ni wuoth mokwongono nodhi maber, owetego notero mana kony matin ma ne ok rom kata tan achiel (tan mag Amerka). Pod ne dwarore ni oter kony ma romo tan 220! Ere kaka ne idhi ter kony mang’eny kamano kendo mapiyo kaka nyalore?

“Jogi biro chiwore”

Bang’ somo ripode e jw.org ma ne nyiso kaka owetewa ne chandore nikech lweny ma timore Ukraine, ji mopogore opogore ma wuok e piny ngima ne dwaro chiwo kony. Thoth joma nodak kuonde ma boyo nogolo chiwo mag pesa misirogo tij piny ngima, nikech ne gin gadier ni pesago ne idhi tigo e yo maber. Jomamoko ma nodak machiegni gi Ukraine to nochiwo thuologi, tekogi, kod mwandugi. Ne ane ranyisi moko matin.

E piny Poland, owete gi nyimine mochiwore nochano gik ma jowetegi nochiwo e katonde matindo tindo, kendo nyithindo noloso kad ne owete man Ukraine. Owadwa Bartosz Kościelniak ma tiyo e Migawo mar Ng’iepo e ofiswa ma Poland nowacho kama: “Asegasomo nyading’eny weche ma yudore e Zaburi 110:3 ma wacho ni, ‘jogi biro chiwore.’ Kata kamano, ka naneno chuny mar chiwruok ma owete nonyiso mapiyo, kendo kaka ne giikore timo gimoro amora mondo gichiw kony, naneno adiera mar ndikono.”

Owadwa moro ma nigi kambi mar kowo gik moko e pinje mopogore opogore, nochiwo lochene kendo noolo nyaka mafuta e lochenego mondo okowgo gik moko. Owadwano nowacho kama: “Ma e yo ma anyalo nyisogo kaka ahero owetena kaachiel gi Jehova. Amor ahinya ni nachiwora konyo e yo kamano.” Owete gi nyimine nochiwo mafuta ma dirom lita 7,700, kendo ne gichiwo thuologi kod tekogi ka giriembo mtokni ma ne oting’o gik ma ne itero ne owete kuom kilomita 48,000 kama!

Owete gi nyimine nonyiso chuny mar chiwruok kod hera matut, kendo nikech mano, ka nochopo tarik 15 Mach, ne wasetero kony ma dirom tan 110! Odiechienge 15 kende e ma nosekalo chakre owete ariyo mokwongoka tero kony ma ne nyalo romo tan achiel kama. Gik ma notergo noriwo chiemo, gige rito ler, kod gige thieth. Bende, nikech owete nochiwo gik mang’eny, ne watiyo gi pesa matin-ne ma ne wasechano tiyogo. Nyaka chop sani, Joneno mag Jehova oseoro gik ma dirom tan 209 e piny Ukraine. Ere kaka chiwogo osemulo chuny owetewa man Ukraine?

“Giting’o Nyaka Herau Bende!”

Mapiyo bang’ ka ne gigo osechopo Lviv, komiti mopogore opogore makonyo e kinde masiche e piny Ukraine notemo matek mondo oter gigo ne joma ochando. Gigo osekow e taonde mopogore opogore, kendo e taonde moko ma ni mabor ma dirom kilomita 1,300 kiwuok Lviv. Kata obedo ni owete notimo duto ma ginyalo mondo oter gigo mapiyo, pod gigo nodeko chopo kuma ne idwarogie.a

Owadwa Markus Reinhardt manie Komiti mar Bad Ofis ma Ukraine wacho kama: “E kinde ma weche tekiegi, owete mang’eny oseneno kaka Jehova oherogi, kendo giseneno ber mar luwo kaka riwruokne chikowa, moriwo nyaka luwo weche minyisowa ni watim ka pok masira moro otimore. Ijiwowaga ni wabedie gi chiemo ma nyalo chwalowa kuom jumbe moko kod pi. Ka luwore gi wachno, jaduong’-kanyakla moro miluongo ni Anton modak Kyiv nowacho niya: ‘Riwruok mar oganda Jehova oseikowa ne kinde matek, kendo wamor ahinya gi wachno. Bedo gi chiemo, pi, kod redio moro osekonyowa ahinya.’ Wamor ahinya ni owete gi nyimine noluwo kaka nochikgi nikech mano nokelo yot sama ofis ne chano kaka ne inyalo kownegi gik ma ne gichando.”

Owete gi nyimine nowinjo nade ka ne gik ma nokownegigo ochoponegi? Mykola kod Zinaida modak Kharkiv, nowacho kama: “Yo mudewowago mulo chunywa ahinya. Erokamano uru ahinya kuom chiemo kod yedhe. Kuom adier, wanyalo neno lwet Jehova e chenroni duto.” Valentyna ma bende odak e alworano nowacho kama: “Chakre chieng’ ma lweny notugoree, ji osebedo ka riedo e lainde mabocho bocho mana ni mondo ging’iew chiemo. Ne ok yotga kinde duto ng’iewo gik ma ne wadwaro. Jehova noneno wachno. Nooro owete mondo okelnwa gik moko e i utewa, kendo ne gikelonwa mana gik ma ne wachando! Kinde ma weche tekie kamano, e kinde ma ng’ato nyalo nenoe kaka Jehova kod riwruokne dewe e yo makende ahinya. . . . En gima duogo chuny ahinya neno kaka Jehova konyi kendo siri e kinde ma imoko chuth.”

Yevhen, Iryna, kod Mykyta, ma noringo koa Mariupol nowacho kama: “Wagoyonu erokamano kuom yore duto ma nunyisogo ni udewo joodwa gadier. Kony ma numiyowa nobiro mana e wang’ sa. Ka ne wayawo katonde ma nokownwa, ne waparo mana ni okelnwa gige ringruok kende, kata kamano, ne wafwenyo ni ne giting’o nyaka herau bende!”

Kuom adier, wanyalo neno kaka roho mar Jehova notayo chenro duto mar tero kony ne owete gi nyimine ma nodak e alwora ma nitie “lwenje kod humb lwenje.” Chiwo magu mugolo mondo osir tij piny ngima, ma thothne ugologa kutiyo gi websaitwa mar donate.jw.org, nokonyo ahinya e weche kaka mago. Wagoyonu erokamano ahinya kuom chiwo magu!

Chiwo Kony e Yo Mapiyo Kendo e Yo ma Ok Kel Hinyruok

1. 

   Februar 24, 2022: Komiti mar Jocheno nopwodho pesa ma ne idhi tigo e ng’iewo gik moko ne owetewa man Ukraine, kendo mano nomiyo ofiswa ma Ukraine ochako chiwo kony ne owetewago

2. 

   Februar 24–Mach 8, 2022: Ofiswa ma Ukraine nong’iewo gik ma ne yudore kuno ma gichako pogogi ne owete gi nyimine ka gitiyo gi komiti mopogore opogore ma konyo e kinde masiche. Ofiswano bende nochako ikore ne kony ma ne gidhi yudo koa Poland

3. 

   Mach 9, 2022: Komiti mar Jocheno nopwodho mondo ochak ter kony e piny Ukraine

4. 

   Mach 10–12, 2022: Notim chenro mondo one ane kinyalo ter chiemo kod kony mamoko Lviv Ukraine kowuok Poland

5. 

   Mach 13, 2022: Noter chiemo kod kony mamoko Lviv Ukraine kowuok Polando

6. 

   Mach 14–16, 2022: Joma ochiwore e Migawo Mochung’ ne Gedo noromo e Od Chokruok mar Alwora man but Poznan mondo gipang chiemo kod gige rito ler

7. 

   Mach 17, 2022: Odiechienge ang’wen bang’ ka nosetem ka be inyalo ter kony Ukraine, ne okow tan 14 e boda mar Ukraine

8. 

   Mach 21–27, 2022: Ne otim kamano bende gi gik ma nodong’. Nochokgi Poland, mokowgi Ukraine, kae to opoggi ne owete gi nyimine kuom seche matin ne 24

9. 

   Mach 28, 2022: Mana kuom ndalo 20 kende, bang’ ka nosepwodh mondo okow kony e Piny Ukraine, noter gik mokalo tan 110. Gigo noriwo chiemo, gige rito ler, kod yedhe

Chop sani, Joneno mag Jehova osekowo gik mokalo tan 209 mondo okonygo owete gi nyimine man Ukraine.