Geng’o Landruok mar Korona e Ute Romo Magwa

E chak dwe mar Mach 2022, noket lendo moro e jw.org ma wacho kama: “Bura Matayo owacho ni ibiro jiw kanyakla duto mondo ochak timo chokruoge aching’ kochakore April 1, mak mana ka chike mag sirkal manie alwora moro pod odagi chokruoge mitimo aching’.” Lendono nomoro Joneno mag Jehova e piny ngima. Kata kamano, tuo mar korona ne pok orumo.a Gin okenge mage ma nidhi kaw mondo joma biro e chokruogewa kik gam tuono mayot? Bang’ kawo higni ariyo kama, ka ok wadhi e chokruogewa aching’, be Ute Romo magwa ne dhi bedo kuonde mowinjore gi timo chokruoge adier?

Kata mana e kinde ma ne pok oland ni wadok e Ute Romo, owete nosechako timo ikruok chon kaka nidhi tim mano.

Chano Weche ka Luwore gi Alwora Mopogore Opogore

Dwe achiel kende bang’ ka ne waweyo timo chokruoge e Ute Romo magwa e higa mar 2020, Migawo Mochung’ ne Tij Gedo e Piny Mangima, ma ni Warwick, New York, nochako nono kaka tuo mar korona ne nyalo loko yore ma watiyogo gi Ute Romo magwa kod okenge ma ninyalo kaw mondo tuono kik bi landre sama wachako timo chokruoge aching’ e utego.

Okenge ma ne dwarore ni okaw e alwora moro ne nyalo pogore gi alwora mamoko. Matthew De Sanctis manie Migawo Mochung’ ne Tij Gedo e Piny Mangima lero kama: “E pinje moko, chandruok maduong’ en bedo gi gige logo mowinjore. E Ute Romo ma onge gi pi freji, chuno ni owete ong’iew pi kata gitwom e aora. E pinje moko, sirkende noketo chike ma dwaro ni e kuonde ma ji chokoree, gibed gi chenro maber mar rito ler, gine ni nitie muya maler, kendo gindik weche moko ma paro ne ji gik monego gitim mondo kik gigam tuo mar korona.”

Owetewa notimo nang’o? Matthew wacho ni ne gifwenyo ni e Ute Romo mang’eny, ne nyalore mondo giket gik geng’o landruok mar tuo “e nengo mayot.” Kuom ranyisi, e piny Papua New Guinea, nolos kuonde logo kitiyo gi ndope kata mbugru mag lita 20 moketnegi freji. Mano nyiso ni e Ute Romo mang’eny, pesa ma romo siling’ 4,000 kende (ma Kenya) noromo keto gik moko te ma ne dwarore e rito ler. Bende, nong’iew gik milogoe (handwashing stations) 6,000 gi wiye e kambi moro ma ni Asia mondo otigo e Ute Romo ma ni Afrika.

Gik mamoko ma ne nyaka loki ne gin fan kod gik ma kelo muya maler e Ute Romo. Kanyakla moko nong’iewo ludhe mag maikrofon mondo joma chiwo paro kik mul maikrofon gi lwetgi. Notim kinda bende e yweyo gi yath kuonde ma ji mulo nyading’eny, kuom ranyisi pata mag dhoudi kod freji mag pi. Kanyakla moko to noketo e choche freji man gi sensa ma olo pi logo kende sama ng’ato oketo lwete. E piny Chile, timo lokruogego e Od Romo achiel kende ne kawo pesa ma romo siling’ 140,000 (ma Kenya).

Sama owete ne temo ahinya mondo gitim lokruoge ma ne dwarorego, ne gitemo bende mondo kik giti marach gi chiwo ma owete golo. Kuom ranyisi, e pinje moko ka ne sirkal odwoko piny nengo gige logo kod ludhe mag maikrofon, owete notiyo gi thuolo ma kamago e yo maber. Bad ofisewa mopogore opogore notiyo kanyachiel e ng’iewo gik mang’eny dichiel mondo odwok nengo piny. Thothne, bad ofisewa kod Migawo Mochung’ ne Ng’iepo e Piny Ngima ne temoga ahinya mondo ging’iep achiel kachiel kuom joma loso gik ma gidwaro, to mano nokonyo e dwoko nengo gigo piny, kendo miyo gigo ochopnegi mapiyo.

“Naweyo Bedo Maluor”

Chenro mar geng’o landruok mag tuoche e Ute Romo magwa nogolo ne owetewa gi nyiminewa moko luoro mar dok e chokruok aching’. Nyaminwa Dulcine ma a e piny Peru wacho ni ‘bet noluor matin’ ka nowinjo ni koro wachako dok e Ute Romo magwa. Owacho kama: “Mapiyo ka ne tuo mar korona ochakore, nayudo tuono. Omiyo, ne ok an thuolo ahinya dok e Od Romo nikech naluor ni nanyalo yudo tuono kendo. To ka nachopo e Od Romo, nafwenyo ni jodong-kanyakla nosetimo chenro mang’eny mag geng’o landruok mar tuoche e Od Romo, kuom ranyisi, keto kuonde mag logo maber, bedo gi ludhe mag maikrofon, kaachiel gi yweyo Od Romo gi yath ka pok chokruok ochakore kod bang’ chokruok. Omiyo, naweyo bedo maluor.”b

Nyaminwa Sara manie piny Zambia to ne nigi pek moro mopogore. Olero kama: “Dweche moko mokalo, tuo mar korona nonego jaoda. Naparora e wi kaka nadhi winjo e chunya ka adok e chokruok ka koro aonge jaoda.” Weche nobedo nade? Owacho kama: “Dhi e chokruoge mitimo aching’ osemiyo amedo bedo gadier ni Jehova ni kodwa e ndalo mag gikogi. Aneno ni jodong-kanyakla kod owetewa gi nyiminewa jiwa, ginyisa hera, kendo sira moloyo kinde moro amora mosekalo.”

Owetewa gi nyiminewa e piny ngima mor ahinya ni koro gin gi thuolo mar timo chokruoge e Ute Romo. Erourukamano ahinya kuom chiwo magu ma thothne ugolo kokalo kuom websaitwa mar donate.jw.org. Chiwogo e ma nomiyo watimo lokruoge ma ne dwarore e kuondewa mag lamo mondo gibed kuonde mowinjore timoe chokruok, kendo ma ji ok nyal gamoe tuo e yo mayot.