Kedo ne Ratiro mar Lamo e Gwenge ma Ji Pod Odak e Kit Ngima mar Anyuolagi Machon

E kind tara gi tara mag joma odak Latin America, nitie ji mathoth ma odak e gwenge ma ji wachoe dhogi giwegi kendo nigi kit timbe mag anyuolagi machon. Moko kuomgi gin owetewa gi nyiminewa. Mondo gikony joma odak e alworago puonjore adiera, owete gi nyimine oseloko buge mogo gi Joneno mag Jehova e dhok mokalo 130 miwacho e piny Latin America.a Kata kamano, nitie owete gi nyiminewa ma romoga gi akwede nikech ne giyiero tiyo ne Jehova kendo gitamore donjo e timbe mag anyuola ma ok luwre gi Ndiko. Ere kaka chiwo migolo osekonyo joma kamago?

Osekonygi Dok e Miechgi

E piny Mexico, owete gi nyimine ma Jo-Huichol modak Jalisco notamore donjo e timbe moko mag anyuola ma Ndiko okwero.b Wachno nochwanyo jomoko modak e alworano. Tarik 4 dwe mar Desemba, 2017, jomoko nomonjo Joneno mag Jehova moko kaachiel gi joma ne gin-godo. Jogo nomwomore kuom Jonenogo ma giriembogi e gweng’no, kendo ne giketho gikgi ka gisiemogi matek ni ka gichak gidok e gweng’no, to ne gidhi negogi.

Joneno mag Jehova ma nodak machiegni gi alworano, nochiwo kony ma ne dwarore ne owete gi nyiminego. Kata kamano, en ang’o ma ne inyalo tim mondo okonygi dok e miechgi? Owadwa moro miluongo ni Agustín nowacho kama: “Ne waonge gi pesa moromo ma ne wanyalo chulo loya mondo okonyowa yalo kesno, kendo ne wakia ng’ama ne wanyalo penjo mondo okonywa e kesno.”

Nikech owetewa gi nyiminewa koro ne onge gi thuolo mar lamo e gweng’no, owete manie ofis ma Central America nokawo okang’ mapiyo mar konyogi. Mokwongo, ne gikwayo jotelo manie gweng’no mondo onon ane wachno. Kae to Komiti mar Jocheno mar Bura Matayo Joneno mag Jehova noyie mondo giti kaachiel gi migawo mar chike manie ofis maduong’ mar Joneno mag Jehova mondo gikony owete gi nyiminego yalo kesno. Gikone, kesno nochopo e Supreme Court of Justice of the Nation, ma e kot maduong’ mogik e piny Mexico.

Owetewa ma tiyo kaka loya ma nowuok e pinje mopogore opogore nokedonegi ka gilero ni mana kaka onego omi luor joma nie gwengego e kaka joma ni e gwengego giwegi bende onego ochiw luor ne jowetegi ma gidakgo e alworano kendo chiwo luor ne thuolo ma ng’ato ka ng’ato nigo mar timo yiero, nikech ng’ato ka ng’ato nigi ratiro mar timo yiero bed ni odak kanye.

Tarik 8 Julai, higa mar 2020, kot maduong’ mogik mar piny Mexico nong’ado ni Joneno mag Jehova noloyo e kesno. Kotno nogolo chik ni Joneno mag Jehova ma noriemb e miechgi oyienegi dok kuondego. Agustín ma ne wasewuoyo kuome motelo nowacho kaka en, kaachiel gi jomamoko ne giwinjo e wi wachno. Owacho kama: “Wamor ahinya gi gik ma owetewa gi nyiminewa otimonwa. Ka di ne ok gikonyowa onge kuma de wayudie kony ma kamano.”

“Kony Maduong’ ne Joma Nok”

Owetewa ma ni Otavalo Valley e gweng’ moro miluongo ni San Juan de Ilumán, e piny Ecuador bende noyudo akwede ma kamano. E higa mar 2014 bang’ ka ne giseyudo barua ma yienegi gero Kingdom Hall, ne gichako tij gedono. Kata kamano, jadolo moro nomonjogi ka en gi ji mokalo 100 kendo ne gichunogi mondo giwe tij gedono. Jogweng’no nochiko Joneno mag Jehova mondo giwe timo lamogi e gweng’no.

Owete manie migawo mar chike e bad ofis ma Ecuador kod e ofiswa maduong’ notiyo kanyachiel mondo gikony owetewago e yudo thuolo mar lamo kendo. Owetewago notero wachno e kot. Mano nomiyo jo gweng’no oweyo kwedo owetewago, kendo ne giyienegi dhi nyime gero Kingdom Hall kendo chokore ne lamo e alworano. Kata kamano, nikech owetewa ne dwaro mondo gi ma kamano kik chak timre kendo, owetewa ma noyalo kesno nokwayo kot mondo ong’ad bura e wi penjo maduong’ni: Be en gima owinjore mondo joma odak e alworano otam jowetegi e ratiro mar lemo kama gidakie?

Tarik 16 Julai, e higa mar 2020, kot ma nono weche chike e piny Ecuador nowinjo kesno. Owete moko ma gin loya e pinyno, nowuoyo e lo kanyaklano. Bende, nitie owete ang’wen ma gin loya ma wuok e pinje mopogore opogore ma bende ne owuoyo e lo kanyaklano. Nikech chike ma noketi mondo ogeng’ landruok mar tuwo mar korona, notim romono e yor vidio. Ma e kes mokwongo ma kot noyie ne loya mag Joneno mag Jehova mondo owuo ka gin e pinje mopogore opogore e yor vidio.c Loyawago nowuoyo e wi chike mopogore opogore ma nyiso ni joma a e piny moro ok onego oma ratiro ma gin-go nikech gin be gin jopinyno.

Owetewa ma a Otavalo Valley rito gi siso bura ma kot biro ng’ado. Kata kamano, gimor gi kony ma giseyudo chop sani. César ma en jaduong’-kanyakla e kanyakla mar Ilumán Quichua wacho kama: “Jehova kende kokalo kuom riwruok mar ogandane e ma nyalo chiwo kony maduong’ ne joma nok.”

Loya ma nowuoyo e kesgo ne gin Joneno mag Jehova, kendo ne gimor timo kamano ma onge chudo moro amora. Kata kamano, yawo kesgo, ikogi, kendo wuoyo e wi kesgo e kot nokawo thuolo kod pesa mang’eny. Loyawago kod owete mamoko notiyo gi seche mohingo 380 ka giiko weche ma ne gidhi sirogo kesgo, kendo ne gitiyo gi seche 240 mamoko ka giloko barupe ma ne idhi tigo e winjo kesgo e dho Mexico. Loya ma dirom 40 kama ma a kuonde mopogore opogore e piny mangima notiyo gi seche ma romo miche mogwaro e yalo kes ma Ecuadorno. Pesa ma ne watiyogo e weche motudore gi kes ma chal kaka mago nowuok kanye? Pesago nowuok kuom chiwo migologa kitiyo gi yore mopogore opogore ma yudore e websait mar donate.jw.org. Wagoyonu erokamano ahinya kuom chiwo magu.