Konyo Jomisonari ma Lendo “Nyaka Kuonde Maboyo Mogik e Tung’ Piny”

Yesu nonyiso jolupne kama: “Unubed jonenona . . . nyaka kuonde maboyo mogik e tung’ piny.” (Tich Joote 1:8) E kindewagi, Joneno mag Jehova nigi kinda e chopo weche ma Yesu nowachogo. Kata kamano, nitie kuonde moko, moriwo nyaka kuonde ma ji ng’enyie, kendo ma ji odakie modhugore odhugore ma pok olendie e okang’ ma kare chuth. Kae to bende, nitie pinje moko ma Joneno nokie. (Mathayo 9:37, 38) En ang’o ma wasebet ka watimo mondo walend ne ji mang’eny kaka nyalore kuonde kaka mago?

Mondo okonywa luwo weche ma Yesu nochiko, Komiti Mochung’ ne Tij Lendo manie bwo Bura Matayo Joneno mag Jehova osetimo chenro mondo oor jomisonari kuonde mopogore opogore e piny mangima. Chop sani, nitie jomisonari ma kwan-gi romo 3,090 e piny mangima.a Thothgi oseyudo tiegruok e skunde mipuonjoe ji Muma, kuom ranyisi, Skul mar Joland-Injili mar Pinyruoth. Jomisonarigo oyie dar e pinjegi mondo gidhi gidag e pinje mamoko. Wamor ahinya gi chuny ma gisenyiso, lony ma gin-go, kod weche mabeyo ma giseneno e ngimagi ma konyo e tij lando wach maber, kendo giketo ranyisi maber ne jopuonjre manyien mag Yesu.

Konyo Jomisonari Konyo Jomamoko Bende

E ofisewa mopogore opogore, nitie Komiti Mochung’ ne Tij Lendo, to e bwoye nitie Migawo Mochung’ ne Joma Lendo gi Thuologi Duto. Migawono tiyo kanyachiel gi owete manie Komiti mar Bad Ofis mondo gikony jomisonarigo e yudo gigegi mochuno, kuom ranyisi, ute ma ginyalo dakie, thieth, kod pesa moro matin ma nyalo konyogi e wechegi mamoko. E higa mar tijwa ma 2020, Joneno mag Jehova notiyo gi pesa ma dirom bilion 2.7 (ma Kenya) e rito jomisonari. Wadwoko erokamano ahinya ne kony kaka mago nikech mano miyo jomisonari keto pachgi kod tekogi e tij lendo, kendo tego kanyakla mopogore opogore moorgie.

Ere kaka jomisonarigo osekonyo e tij lendo? Frank Madsen ma en achiel kuom owete manie Komiti mar Bad Ofis ma Malawi wacho kama: “Nikech jomisonari nigi chir kod lony, gisekonyo kanyakla mopogore opogore e lendo kuonde ma nigi arita mager ma donjoe tek kod kuonde ma ji wachoe dhok ma wendo. Bende, nikech kinda ma gitimoga e puonjore dhok miwacho e alwora ma gintie kendo ng’iyo gi kit ngima ma kanyo, giseketo ne jomamoko ranyisi maber. Ranyisigigo osemulo chuny rowere mathoth kendo jiwogi mondo gin be giti ne Nyasaye kuom thuologi duto. Wagoyo ne Jehova erokamano kuom miyowa jomisonari kaka mago.”

Owadwa moro manie Komiti mar Bad Ofis bende wacho kama: “Jomisonarigo nyiso ayanga ni jo Jehova nigi winjruok e kindgi kata bed ni giwuok kuonde mopogore opogore e piny ngima. Kata joma ok gin Joneno mag Jehova nyalo neno maler ni wan gi winjruok e kindwa, kendo kido kod timbe mopogore opogore ma ng’ato nopon-go ok pogwa, nikech waluwo puonj mag Muma ma miyo wadak kaka owete gi nyimine e piny mangima.”

Ere kaka jomisonari konyoga jolendo manie alwora ma oorgie? Owadwa moro miluongo ni Paulo modak Timor-Leste, mor ahinya gi jomisonari ma noor e kanyaklagi. Owacho kama: “Alwora ma wadakie liet ahinya. Jomisonari ma nobiro e alworawano noa kuma piny ng’ichie ahinya. Kata kamano, ne ok giweyo chal ma kamano omon-gi dhi e tij lendo. Kinde duto gibiroga e romo mag dhi lendo mitimoga gokinyi, kendo ajanenogiga ka gitimo dok limbe e chuny odiechieng’ tir sama chieng’ liet ha, kendo godhiambo bende. Gisekonyo ji mang’eny moyudo adiera, moriwo nyaka an. Gitiyo ne Jehova gi ngimagi duto, gi kinda, kendo ka gimor. To mano osejiwo jo kanyakla duto mondo gin bende giti ne Jehova gi chunygi duto.”

Nyaminwa Ketti ma en painia e piny Malawi wacho kaka jomisonari moko nokonyo ode. Owacho kama: “Ka ne oor owadwa moro gi chiege ma ne gin jomisonari e kanyaklawa, noyudo an kenda e Janeno e oda. Ne gikonya ahinya kendo ne gibedo osiepe machiegni gi jooda. Ranyisigi maber nokonyo nyithinda neno kaka tiyo ne Jehova e gima kelo mor, kendo miyo ng’ato bedo gi ngima maberie moloyo. Wagoyo erokamano ahinya ne jomisonari nikech kony kaachiel gi ranyisi maber ma giketo. Mano nomiyo nyiga adek obedo jopainia mapile, kendo jaoda bende tinde osechako biro e chokruok.”

Pesa ma iritogo jomisonarigo wuok kanye? Pesago a kuom chiwo migolo misirogo tij piny ngima, ma thothgi igolo kitiyo gi yore ma yudore e donate.jw.org. Wagoyonu erokamano ahinya kuom chiwo kaka mago.