Ohinga mar Jarito LAIBRARI E INTANET
ohinga mar jarito
LAIBRARI E INTANET
Dholuo
  • MUMA
  • BUGE
  • MIKUTANO
  • hdu sula 22
  • Wich Ok Owil gi Momni

Hakuna video yoyote kwa sasa.

Samahani, haikuwezekana kupakia video.

  • Wich Ok Owil gi Momni
  • Kaka Itiyoga gi Chiwo ma Wagolo
  • Vichwa vidogo
  • Habari Zinazolingana
  • Kaka Ilosoga Vidio mag Dhok Mitiyoe gi Ranyisi
  • Kaka Vidio mag Dhok Mitiyoe gi Ranyisi Chopoga ne Ji
  • Bedo Momo Ok Osemona Puonjo Ji Wach Nyasaye
    Ohinga mar Jarito ma Lando Wach Pinyruoth (Mar Puonjruok)—(2017)
  • Laibrari Minyalo Ting’ e Lwedo
    Kaka Itiyoga gi Chiwo ma Wagolo
  • Nyalo Dwarore ni Imany Joma Wacho Dhok Moro Sama In e Tij Lendo
    Tijwa mar Pinyruoth—2012
  • Yore ma Wanyalo Tiyogo gi JW Library
    Ngimawa kod Tijwa Kaka Jokristo—Chenro mar Chokruok (2016)
Pata Habari Zaidi
Kaka Itiyoga gi Chiwo ma Wagolo
hdu sula 22
Nyaminwa moro neno vidio mar wes moro mar Muma molos e dhok mitiyoe gi ranyisi e tabletne.

KAKA ITIYOGA GI CHIWO MA WAGOLO

Wich Ok Owil gi Momni

JULAI 1, 2022

Jehova dwaro ni ji duto ong’eye kendo ni ging’e wach maber e wi Pinyruodhe, bed ni gin e chal mane. (1 Timotheo 2:3, 4) Mano e momiyo Joneno mag Jehova goyo Muma kod buge ma lero Muma e dhok mang’eny kaka nyalore, moriwo nyaka dhok ma momni nyalo winjo. Riwruogwa osegoyo buge mathoth e yor vidio e dhok mokalo 100 mitiyoe gi ranyisi.a Ere kaka ilosoga vidiogo kendo pogogi ne ji? To ere kaka osemed bero yo milosogigo?

Kaka Ilosoga Vidio mag Dhok Mitiyoe gi Ranyisi

Grup mar joma loko dhok mitiyoe gi ranyisi tiyo kanyachiel mondo gilok buk moro.

Buge ma yudore e dhok mitiyoe gi ranyisi iloso gi jolok dhok ma tiyo e grube mopogore opogore e piny ngima. Joma nie grubego nonoga bugego adimba ka pok gilokogi. Kae to ging’ado paro e wi yo maber ma ginyalo lokogo wechego e dhok mitiyoe gi ranyisi. Ka gisetieko timo mano, gimakoga vidio kae to gilosogo bugno. Gie sani, grube 60 loko buge ma lero Muma e dhok mitiyoe gi ranyisi pile, to grube mamoko 40 timo kamano kinde ka kinde.

Higni mosekalo, nitiyoga gi pesa mang’eny ahinya mondo olos vidio e dhok mitiyoe gi ranyisi. Nengo kamera mimakogo vidio kod gik mamoko milosogo vidio ne tek ahinya kopim gi kindegi. Bende, ne dwarore ni omak vidiogo e studio, kendo mano ne chuno ni walos studiowa wawegi kata walok ute ma noseger obed studio. Pesa duto ma ne dwarore mondo olosgo studio achiel ma chop kama jolok dhok nyalo chako tiyoe kode, ne nyalo romo siling’ 3,000,000.b

Mondo oti gi chiwo migologa e yo maber moloyo, riwruogwa osemanyo yore minyalo med bergo tij loko dhok mitiyoe gi ranyisi ma ok ochuno ni oti gi gik mang’eny ahinya. Wasemanyo gik minyalo tigo ma nyasani, ma tiyo maber, kendo ma nengogi bende ok tek. Kar tiyo gi studio, joma loso vidio e dhok mitiyoe gi ranyisi nyalo keto otamba ma ralum e kor ot sama gimako vidio ka gin mana e ofisgi kanyo. Sama iloso vidio ma nigi ji mopogore opogore, ok ochuno ni gidhi e studio, kar mano, ginyalo mako vidiogo ka gin e utegi kata e ofisegi.

Grup moro mar joma loko dhok mitiyoe gi ranyisi mako vidio mar buk moro. Ng’ama loko dhok sama imako vidio ochung’ e nyim otamba ma ralum.

Bende, waseloso programbe moko mag kompyuta ma nyalo konyo jolok dhok mitiyoe gi ranyisi. Programbego osekonyo joloko mondo giti gi seche matin e loso vidio kopim gi seche ma ne gitiyogo chon. Kuom ranyisi, ka chon loso vidio moro ne nyalo kawo seche ang’wen, sani koro onyalo mana kawo seche ariyo kama. Owete gi nyimine mor ahinya gi yo mosemed bergo tij lokono. Owadwa moro miluongo ni Alexander wacho kama: “Vidio mang’eny tinde yudore e dhok mitiyoe gi ranyisi moloyo chon. Wachno mora matek. Anenoga vidiogo pile ka pile.”

Tinde inyalo ti gi pesa matin ne siling’ 500,000 mondo ochak tij loko buge e dhok moro mitiyoe gi ranyisi. Mano osemiyo sani nitie vidio mang’eny mag dhok mitiyoe gi ranyisi.

Kaka Vidio mag Dhok Mitiyoe gi Ranyisi Chopoga ne Ji

Bang’ ka joma loko vidiogo osetieko tijgi, vidiogo onego ochop ne ji kuonde mopogore opogore. Chon ne walosoga kasede kod DVD mag vidio. Kata kamano, nengogi ne tek ahinya kendo ne gikawo thuolo mang’eny loso, to bende ne en tich mang’eny ne joma losogi. Ka ne oselos kaset kata DVD, niterogi e kambi machielo mondo koro ogogi mang’eny. Bang’ ka nosetiek gogi, ne iketogiga e meli mondo okowgi ne kanyakla mopogore opogore. E higa mar 2013 kende, ne watiyo gi pesa ma romo siling’ 200,000,000 e loso DVD mag dhok mitiyoe gi ranyisi.

Masin minyalo ting’ mayot kendo ma nyalo tugo DVD, kod DVD mag buge mopogore opogore molos e dhok mitiyoe gi ranyisi.

Momni ne mor ahinya yudo DVD ma kamago. Kata kamano, ne ok yot ahinya tiyo gi vidiogo nikech kasede kod DVD ma niketogie kwan-gi ne medore ameda. Seche moko ninyalo ti gi DVD mokalo achiel mondo olosgo buk moro mar Muma. Owadwa moro ma wuok Brazil miluongo ni Gilnei wacho kama: “Sa asaya ma ne wadwaro nyiso ng’ato ndiko, ne wakwong wamanyo kaset ma ndikono nitie, kae to e ka wachako manyo ndikono ei kaset. Ne ok en tich mayot ahinya.” Nyaminwa moro miluongo ni Rafayane, ma ne tiyoga gi DVD mag dhok mitiyoe gi ranyisi wacho kama: “Ne ok en gima yot ahinya mondo ng’ato opuonjre Muma owuon. Ne watiyoga gi thuolo mang’eny ahinya e manyo ndiko kod buge ma lero ndikogo.” Owete gi nyimine ma ne dhiga e tij lendo ne nyaloga ting’o DVD kod vidio mag kaset ma ne ginyalo nyiso wuon ot e TV. Owete ne ting’oga nyaka masinde mag tugo DVD. Kata kamano, bang’ kinde, ne ochak los masinde ma ting’o yot minyalo tuggo DVD kendo thoth owete ne tiyoga gi masindego. Owadwa moro ma nyinge Bobby modak piny Amerka wacho kama: “Bang’ ka nisesomo ne ng’ato ndiko moro kendo idwa somone machielo, ne nyaka iwuog e DVD ma intie kidhi e machielo. Mano ne kawo thuolo mang’eny kendo ne miyo ok wati gi Muma kaka dwarore.”

E higa mar 2013, riwruogwa noloso app moro miluongo ni JW Library Sign Language ma owete gi nyimine nyalo tiyogo e download vidio kendo tugogi e simbegi kata tabledegi. Ka nokwong lose, ne en mana gi dhok mitiyoe gi ranyisi ma Amerka kende. Kata kamano, e higa mar 2017, nomed bere mondo koro oting’ dhok mamoko mitiyoe gi ranyisi. Owete gi nyimine e piny ngima ne mor ahinya gi wachno. Owadwa moro miluongo ni Juscelino ma wuok Brazil, wacho kama: “Naparo mana ni aleko! Wachno nomiyo asiko ka aparo kaka Bura Matayo nyiso ni odewo ahinya momni kendo gidwaro ni watim dongruok e winjruokwa gi Nyasaye mana kaka joma nigi nyalo mar wuoyo. Namor ahinya, kendo app mar JW Library Sign Language osemiyo amedo bedo gi siso mar puonjora Muma moloyo.”

Nyaminwa moro tiyo gi app mar “JW Library Sign Language” mondo one vidio mar “Daniel: Nonyiso Yie e Ngimane Duto​—Kare mar 2.”

Ng’ato tiyo gi app mar JW Library Sign Language

Tinde waloso vidio mag dhok mitiyoe gi ranyisi e yor dijitol kendo waketogi e websaitwa kod e app mar JW Library Sign Language. Nikech mano, bugewa mag dhok mitiyoe gi ranyisi inyalo loki, maki, kendo chopogi ne ji mana bang’ ndalo matin, to ok dweche kata higni kaka chon. Kendo, gima morowa en ni sani buge mag dhok mitiyoe gi ranyisi inyalo gol riat gi buge mamoko misomo.

Ne ane weche moko ma owetewa gi nyiminewa ma momni osewacho. Nyaminwa moro miluongo ni Klízia nowacho kama: “To mano doko riwruok ma jaber nikech gidewo ahinya momni, kendo gichiwore losonegi yo ma ginyalo yudogo chiemb chuny e yo mayot kamano! Onge gima pinyni chiwo minyalo pim gi gima riwruok mar oganda Jehova osetimonwa.” Vladimir wacho kama: “Vidiogo konya ng’eyo kaka Jehova ohero momni ahinya mana kaka ohero joma nigi nyalo mar wuoyo kendo winjo wach.”

Vidiowa mag dhok mitiyoe gi ranyisi niga gi wechegi: “Vidioni ogo mondo okony tich ma dhi nyime mar puonjo Muma e piny mangima, kendo tijno itimo kokalo kuom chiwo ma onge achune.” Wagoyonu erokamano ahinya nikech chiwo magu ma thothgi ugologa kokalo kuom websaitwa mar donate.jw.org. Chiwogo konyo e loso Mumbni kod buge ma lero Muma ne ji duto, moriwo nyaka joma wacho dhok mitiyoe gi ranyisi.

a Nikech dho momni iwacho kitiyo gi ranyisi mag lwedo kod mag wang’, buge miloso e dhokgo igolo e yor vidio, to ok buge mondiki.

b Pes motigo e sulani gin ma Kenya.

Kaka Osemed Bero Tij Loko Dhok Mitiyoe gi Ranyisi

1992: Higa ma nohang goloe vidio mar kaset e dhok mitiyoe gi ranyisi

2002: Higa ma nokwong gol DVD e dhok mitiyoe gi ranyisi

2013: Higa ma nogolie app miluongo ni JW Library Sign Language

2017: Nomed ber app mar JW Library Sign Language mondo obed gi nyalo mar ting’o dhok mamoko mitiyoe gi ranyisi

2020: Nogol Muma mar Loko mar Piny Manyien moting’o buge duto mag Muma e dhok mitiyoe gi ranyisi ma Amerka. E piny ngima, mano e Muma mar dhok mitiyoe gi ranyisi ma nohang gol moting’o buge duto

    Buge mag Dholuo (1993-2025)
    Toka
    Ingia
    • Dholuo
    • Shiriki
    • Kaka Daher
    • Copyright © 2025 Watch Tower Bible and Tract Society of Pennsylvania
    • Chikewa
    • Rito Weche
    • Mpangilio wa Faragha
    • JW.ORG
    • Ingia
    Shiriki