Nyalo Dwarore ni Imany Joma Wacho Dhok Moro Sama In e Tij Lendo
1. Ang’o momiyo e alwora miwachoe dhok mopogore opogore ipogo ne kanyakla alwora mag lendo kaluwore gi dhok ma gitiyogo?
1 Chieng’ Pentekost e higa mar 33 E Ndalowa, bang’ ka jopuonjre Yesu noseyudo roho maler, ‘ne gichako wuoyo gi dhok mopogore opogore’ gi joma ne owuok e pinje mamoko. (Tich 2:4) Mano nomiyo ji madirom 3,000 obatisi. Gimiwuoro en ni nenore ni ng’eny welogo ne nyalo wacho dhok ma ne itiyogo ahinya e ndalogo kaka dho Hibrania kata Grik. To ema pod Jehova noyiero mondo olandnegi wach Pinyruoth e dhogi giwegi. Achiel kuom gimomiyo notimo mano en nikech ji jorwak wach maber mapiyo ahinya ka olendnegi e dhok ma ging’eyo maber. Kuom mano, e kindegi , e alwora miwachoe dhok mopogore opogore, ipogo ne kanyakla ka kanyakla alwora mag lendo kaluwore gi dhok ma gitiyogo e chokruogegi. (Tengenezo, ite mar 107, par. 2-3) Grube matiyo gi dhok mawendo ok mi alwora mar lendo, kata kamano, gilendo ne joma wacho dhok ma gitiyogono e alwora mar kanyakla matayogi kod mag kanyakla mamoko molworogi.
2. (a) Manyo ji tiende en ang’o, to gin kuonde mage ma inyalo timee? (b) Ere kaka kanyakla mopogore opogore nyalo konyore sama gilendo e alwora ma ji wachoe dhok mang’eny? (c) Ang’o monego watim ka waromo gi ng’at morwako wach to owacho dhok machielo?
2 Ka idak e alwora ma ji duto wachoe dhok achiel, inyalo lendo e ot moro amora. Kata kamano, pogruok bedoe kapo ni idak e taon ma ji wachoe dhok mopogore opogore. Kanyakla mamoko matiyo gi dhok machielo bende nyalo bedo ni lendo e alworano. Kata obedo ni kanyakla mamoko nyalo nyisou jomoko ma giyudo mawacho dhok mitiyogo e kanyaklau, un kaka kanyakla kata grup ema un gi ting’ mar manyo joma wacho dhok ma kanyaklau tiyogo. (Ne sanduk mawacho ni “Konyreuru.”) Omiyo nyalo dwarore ni uriw lwedo tij manyo joma wacho dhok mutiyogo. Ere kaka inyalo tim mano?
3. Ang’o manyalo konyo kanyakla kata grup ng’eyo kama ginyalo manyoe joma wacho dhok moro kod thuolo mowinjore gitigo e timo mano?
3 Chano Tij Manyo Ji: Thuolo mwatiyogo e manyo joma wacho dhok moro e alwora ma ji wachoe dhok mopogore opogore luwore gi chal mar alworano. Kuom ranyisi, ji adi e alworano ma wacho dhokno? Nitie jolendo adi e alworano? Kanyaklau kata grubu nigi nyinge adi mag ji mawacho dhokno? Ok ochuno ni nyaka kanyakla mamanyo joma wacho dhok moro odhi e alworagi duto, to ginyalo yiero mar lendo kuonde ma ji ng’enyie moloyo e alworagi kod kuonde mamoko maok ni mabor ahinya. Kata kamano, timo chenro maber en gima duong’ ahinya nimar mano nyalo konyowa miyo ji mang’eny thuolo mar luongo nying Jehova.—Rumi 10:13, 14.
4. (a) Tij manyo joma wacho dhok moro onego ochan e yo mane? (b) Gin yore kaka mage ma wanyalo tiyogo e manyo jogo mawacho dhok ma watiyogo e kanyaklawa?
4 Mondo kik wanwore e alwora ma wamanyoe joma wacho dhok moro, dwarore ni bura mar jodongo, to moloyo jarit tij lendo ochan kendo ota tijno e yo mong’ith. (1 Kor. 9:26) E grup matiyo gi dhok mawendo, owadwa mowinjore, kaber to jaduong’-kanyakla kata jakony tich moyier gi bura mar jodongo e kanyakla matayo grubno, nyalo tayo tijno. Kanyakla gi grube mang’eny oseloso chenro maber mar manyo nyinge jogo e buge moting’o adres mag ji kata e Intanet. Kae to bang’e, ginyalo manyo jogo kuom goyonegi simo kata limogi mondo ging’e joma owinjore. Kanyalore, bura mar jodongo e kanyakla matayo grubno nyalo chano mondo jokanyakla duto oriw lwedo tij manyo joma wacho dhok moro kinde ka kinde.—Ne sanduk mawacho ni “Kaka Inyalo Nwang’o Joma Wacho Dhok Mutiyogo e Kanyaklau.”
5. (a) Paro mage ma jolendo nyalo tiyogo sama gimanyo joma wacho dhok moro? (b) Ang’o ma wanyalo wacho sama wamanyo ji?
5 Kinde duto ka wan e tij manyo joma wacho dhok moro, onego wabed gi gima wadwaro chopo. Nikech manyo ji bende en lendo, nyalo bedo maber ka warwakore kaka wajorwakre ka walendo. Jolendo moko oseyudo ni ka giiko weche moko ma gidhi wacho kendo tiyo gi dhokno sama gimanyo ji, mano konyogi bedo gi ilo kendo miyo gimedo lony e dhokno. Ripodewa mag tij lendo nyalo riwo seche ma watiyogo e manyo ji, to ok seche ma watiyogo e chano alwora kod goro map. Sama wayudo ng’at ma wacho dhokno, onego watem walandne wach maber, kae to mapiyo bang’ mano, wanyalo tudore gi jarit tij lendo kata ng’at matiyo e loe, mondo omed nying ng’atno e rekod mag alwora. Mano dwarore kata bed ni ng’atno ok orwako wach. Kata obedo ni tij manyo joma wacho dhok moro dwarore ahinya, wiwa ok onego owil gi yore mamoko mag lendo.—Ne sanduk mawacho ni “Gima Wanyalo Wacho Sama Wamanyo Ji.”
6. Gin pek mage makende ma wayudo e tij manyo momni?
6 Manyo Momni: Manyo momni nigi pek makende kendo dwaro kinda kod sinani. Ok wanyal fwenyo ni ng’ato en momo kuom luongo nyinge, ng’iyo kaka onenore gi oko, kata kaka orwakore. E wi mano, joodgi kod osiepene samoro ok nyal dwaro ni uwuo kode, kata ginyalo dikore chiwo weche moko ne jolendo e wi jalo. Paro maluwogi nyalo konyowa ahinya sama wamanyo momni, to bende ginyalo konyo e manyo joma wacho dhok machielo.
7. (a) Jomage mwanyalo nono mondo wang’e kapo ni nitie momni e alwora moro? (b) Wanyalo timo ang’o mondo jal mwapenjono kik chich kodwa?
7 Kanyakla kata grube matiyo gi dhok mar ranyisi oseyudo nyak e manyo momni e taonde kuonde ma ji odakie. Ng’ato nyalo nyisi ni ong’eyo jirande moro, jatich wadgi, kata jaskul wadgi matiyo gi dhok mar ranyisi. Nyalo bedo ni ong’eyo sain manyiso kuonde ma nyithindo ma momni yudoree. Samoro bende ng’ato nyalo nyisi ni nitie watne ma momo. Bed king’eyo ni jomoko nyalo chich kodi sama imanyo momni. Kata kamano, inyalo golo ne wuon ot luoro ka iwuoyo gi mor, kendo ka itiyo gi weche machuok, moriere, kendo manyiso luor. Jolendo moko oseyudo nyak kuom tang’o ne wuon ot Muma kata DVD mag dho ranyisi sama gipenje kong’eyo kama ng’at ma momo yudoree. Kae to giwachone ni ginyalo hero puonjo momni Muma. Kapo ni wuon ot ok dwar nyisi kama watne kata osiepne moro ma momo yudoree, samoro onyalo yie kawo nambani mar simo kata kalatas gwelo ji e chokruoge mondo omiye.
8. Ere kaka kanyakla moro nyalo konyo kanyakla matiyo ti dho ranyisi man machiegni kodgi?
8 Odiechieng’ achiel kata odiechienge ariyo e higa, kanyakla matiyo gi dho ranyisi nyalo gwelo kanyakla moro man machiegni matiyo gi dhok machielo mondo oriwgi lwedo manyo momni e taon ma gilendoe. E romo mar dhi lendo mitayo gi kanyakla matiyo gi dho ranyisi, unyalo timo ranyisi moko kaka onego omany momni. Jolendo modhi riwo lwedo tijni inyalo mi jalendo mawuok e kanyakla matiyo gi dho ranyisi kaachiel gi map manyisogi kama gidhi lendoe.
9. Ere kaka unyalo manyo momni kuonde ma gijoyueyoe kata manyoe kony?
9 Unyalo manyo momni bende kuonde ma gijoyueyoe ka gigoyo mbaka kata kuonde moko ma gidhiga dwaroe kony e alworau. Jolendo onego orwakre e yo mowinjore gi kuonde ma gidhi manyoe jogo. Nyalo bedo maber ahinya kuwuoyo gi ng’ato achiel kata ji ariyo kuomgi kar lendonegi giduto kanyachiel. Kapo ni girwako wach, unyalo chano kaka ubiro tudoru kendo.
10. Ere kaka jolendo nyalo manyo joma tiyo gi dho ranyisi e kuonde ohala?
10 Yo machielo mar manyo momni en bedo gi map manyiso kuonde ohala duto kae to dhi kuondego e seche mowinjore. Map achiel nyalo ting’o stesende mag petrol. Machielo nyalo ting’o kuonde luoko lewni, otende, kuonde yueyo, kata ohala moro amora. Kapo ni map ka map oting’o ohelni machalre, jolendo nyalo tiyo gi yo achiel mar lendo mondo gimed lony ma gin-go. Kuom ranyisi, nikech otende mang’eny jobedo gi welo ma momni, wanyalo lero ne jal matiyo e kar rwako welo e yo machuok tich ma watiyo kendo weyone DVD molos ne momni, kaachiel gi kalatas mar gwelo ji e chokruoge mag kanyakla mondo omi wendgi ma momni. E kuonde moko mag ohala, wanyalo penjo kapo ni joma tiyo kuondego kata jong’iewogi moko tiyo gi dho ranyisi. Kapo ni nitie skund momni e alworau, unyalo chiwonegi moko kuom DVD magwa mondo giket e laibrarigi.
11. Ang’o momiyo manyo joma wacho dhok moro en gima duong’ e tijwa mar lendo?
11 Tich Maduong’: Yudo weg udi mawacho dhok mutiyogo e kanyaklau seche moko ok yot. E wi mano, nitie alwora moko ma nyalo lokore apoya nikech jomoko siko ka dar kata donjo e alworano, to mano miyo rito rekod mag alwora bedo matek. Kata kamano, e alwora moko, tij manyo joma wacho dhok moro en gima duong’ ahinya. Jehova ma e momiyowa migawoni, ohero ji duto. (Tich 10:34) Dwarone en ni “ji duto okwo, kendo ging’e adiera chuth.” (1 Tim. 2:3, 4) Kuom mano, wadhiuru nyime tiyo kanyachiel gi Jehova kod owetewa e manyo joma wacho dhok mopogore opogore ma nigi “chuny makare kendo maber.”—Luka 8:15.
[Picha manie ite mar 5]
Konyreuru
Kapo ni kanyakla kata grup nyalo dwaro ni mondo okonygi manyo joma wacho dhok ma kanyaklagi tiyogo, jarit tij lendo nyalo tudore gi jodongo mag kanyakla mamoko manie alworagi mitiyoe gi dhok mamoko. Nyalo bedo maber ka gitudore mana gi kanyakla man machiegni kata ma nigi jolendo mogwaro mawacho dhokno. Kanyakla mokwa mondo okony nyalo nyiso jolendogi ni ka giyudo ng’ato mawacho dhokno, onego gindik nying ng’atno kata kama oyudoree, kae to gimi jarit tij lendo mondo omi kanyakla kata grup ma nokwayogi kony. Jorit tij lendo mag kanyakla matiyo e alwora achiel nyalo chano yo mowinjore maber mar lendo ne ji mawacho dhok mopogore opogore e alworagi kendo nyisogi kama ginyalo dhiye e chokruoge.
Kapo ni jolendo oyudo ng’at mawacho dhok machielo to orwako wach (kata ng’at ma momo), onego gipong’ mapiyo fom mar Tafadhali Fuatia Upendezi (S-43) kendo imiye jagoro mar kanyaklau. Mano biro miyo okony ng’atno mapiyo.—Ne km 5/11 ite mar 3.
[[Picha manie ite mar 6]
Kaka Inyalo Nwang’o Joma Wacho Dhok Mutiyogo e Kanyaklau
• Penj jomoko kaka jopuonjreni mag Muma, joodu, jotich weteni, kod jomamoko.
• Ti gi buge manyiso nembni mag simo e manyo nyinge mag joma wacho dhok moro. Bugego seche moko chano nyinge ji kaluwore gi kuonde ma gidakie kendo ginyalo yudore e Intanet kata e kambi mag simo.
• Inyalo penjo gi rieko kuonde machalo kaka laibrari me alworau, ofise mag sirkal, kaachiel gi kolej mopogore opogore.
• Som gasede mayudore e alworau mondo ine kabe nitie romo moro ma joma wacho dhokno ochano e alworau.
• Inyalo dhi e dukni kata ohelni manie alworau ma joma wacho dhokno ohero ng’iepoe.
• Inyalo kwayo joma ochung’ne kar ohala moro, yunivasiti, kata kar idho mtokni ma joma wacho dhokno joyudoree mondo iket mesa moro moting’o buge kuondego.
• Kapo ni chik mar pinyu oyienu, inyalo ng’iewo buk moting’o adres mag ji kata program mar kompyuta manyalo konyi manyo e Intanet kuonde ma ji yudoree.
[[Picha manie ite mar 7]
Gima Wanyalo Wacho Sama Wamanyo Ji
Ka iwuoyo achiel kachiel ka in gi mor, ji ok bi chich kodi. Nyalo bedo maber ka ikwongo nyiso ji buge mogo gi dhogi.
Bang’ mos, inyalo wacho kama: “Wamanyo joma wacho dho ______ mondo wawuo kodgi kuom geno ma Muma chiwo. Be ing’eyo ng’at moro mawacho dhokno?”
Sama imanyo momni, inyalo wacho kama: “Amosi. Daher tang’onie gimoro. [Ti gi masin mar vidio e nyise ndiko moro e New World Translation e DVD.] Wechegi ogol e Muma mar dho Amerika Mitiyoe gi Ranyisi. Mopogore gi Muma, wan gi vidio mang’eny maok usi molos mondo okony momni bedo gi winjruok maber gi Nyasaye. Be ing’eyo ng’at moro ma momo kata ma ite nok to ong’eyo dhok mitiyoe gi ranyisi?” Ka wuon ot ok nyal paro ng’at ma kamano, inyalo nyise kuonde ma nyalo bedo ni oseromoe gi ng’at ma momo, kaka kar tich, e skul, kata e gweng’gi.