Ka Wuon Ot Wacho Dhok Machielo
1. Ang’o momiyo dwarore ahinya mondo winjruok obedie kuom kaka ilendo e alwora?
1 Jolendo mag Pinyruodh medo nwang’o ji morwako wach ma wacho dhok moro mopogore gi ma kanyakla tiyogo. Mondo okony tij lendo ne joma kamago, ofise mathoth nwang’o ni dwarore ahinya ni ochak grup kod kanyakla mawacho dhok machielo. Nikech nyalo bedo ni nitie dhok mang’eny ma ji wacho e alwora achiel, kanyakla mang’eny mawacho dhok mopogore opogore nyalo lendo e alwora achiel. Ere kaka kanyaklago nyalo bedo gi winjruok mondo gine ni tij lendo itimo e yo mochan maber kendo gi kuwe?—1 Kor. 14:33.
2. Seche ma walendo ot ka ot, ere kaka wanyalo bedo gi winjruok gi grup kata kanyakla mar dhok mopogore e alwora ma walendoe?
2 Winjruok Maber: Seche molendo e lela kata seche molendo ka ok ochan, jalendo onego obed thuolo mar lendo ni ng’ato ang’ata, moriwo jogo manyalo bedo ni wacho dhok machielo, kendo chiwo buge e dhok ma ng’atno ohero somo. Kata kamano, seche ma walendo ot ka ot e alwora mabende ilendoe gi grup kata kanyakla moro ma wacho dhok machielo, jalendo onego olend mana e udi mag jogo ma wacho dhok mar kanyakla ma jalendono dhiye. Ka kanyakla mopogore opogore lendo e alwora achiel, bedo gi weche mondik maber en gima dwarore ahinya. Jorit tij lendo onego otudore gin giwegi mondo gichan weche e yo makonyo ji duto. (Nge. 11:14) Kata kamano, kapo ni oyud ng’ato mawacho dhok machielo seche milendo ot ka ot kendo onge kanyakla mawacho dhokno machiegni, jalendono onego otem chiwo neno kendo dhi nyime gi konyo ng’atno morwako wach.
3. Ang’o monego watim seche ma wayudo jolendo mowuok e grup kata kanyakla mar dhok mopogore ka lendo alwora ma walendoe?
3 Watiyo Tich Achiel: Ang’o minyalo tim seche ma jolendo mowuok e kanyakla mopogore opogore onwang’o ni gilendo e alwora achiel odiechieng’ achiel? Kuom adier, hera mar Jokristo biro loyo pogruok moro amora e dhok, kendo giduto gibiro keto e paro dwaro mag ji manie alworano. (Joha. 13:34, 35) Kuom mano, jogo matayo tij lendo biro nyiso muolo kod hera e ng’ado kapo ni grup achiel onego odhi e alwora mopogore kuom kinde machuok.—Jak. 3:17, 18.
4. Wach mane ma ne okor machopo kindegi?
4 Muma ne okoro ni ji mawacho dhok mopogore opogore ne dhi winjo wach maber. (Fwe. 14:6, 7) Winjruok maber kuom jogo duto ma wachni mulo, nyalo konyo e geng’o nwoyo lendo kama ne oselendie kendo ji manyien mang’eny ibiro lendnegi wach maber, moriwo jogo mawacho dhok machielo.—Efes. 4:16.