Konyo Joma Wacho Dhok Mawendo e Alworau
1. En thuolo mane mayudore e kindegi seche ma watiyo tij lendo e alworawa?
1 Yesu Kristo nokoro ni wach maber ne idhi land e piny mangima “mondo obed ranyis ni ogendini duto.” Jogo duto matiyo tij lendo kod puonjo ong’eyo pek mar wechego. (Math. 24:14; 28:19, 20) Seche ma walendo kendo timo jopuonjre, wanyalo yudo joma oa e pinje mopogore opogore mawacho dhok mopogore gi marwa. Joma kamago bende owinjore omi thuolo mar winjo wach Pinyruoth kendo chung’ motegno kuom adiera kapok odiechieng’ malich mar Jehova ochopo. (Mal. 3:18) Ere kaka wanyalo konyo e alwora mar lendo ma nigi joma wacho dhok mawendo?
2. Gin yore mage ma waluwogo kido mag Jehova seche ma walendo ne joma wacho dhok machielo?
2 Neno Joma Wacho Dhok Machielo Kaka Jehova Nenogi: Mondo wanyis hera mar Jehova e yo maok wabuono ng’ato e alworawa mar lendo, nyaka wabed gi gombo matut mar konyo ji mondo giyud ng’eyo makare kuom Jehova, Nyasaye mar adier, maok wadewo dhok ma giwacho. (Zab. 83:18; Tich 10:34, 35) Kata obedo ni waketo pachwa ahinya kuom lendo ne joma wacho dhok ma kanyaklawa tiyogo, nyaka waket e paro dwaro mag joma wacho dhok machielo kendo nono yore ma wanyalo landogo ne jogo wach Pinyruodh Nyasaye. Buono joma wacho dhok machielo ok winjre gi dwaro mar Jehova mar lendo ne ji mawuok e ogendini duto. Ere kaka wanyalo konyo joma wacho dhok machielo?
3. Ang’o mosemiwa manyalo konyowa e tij lendo, kendo ere kaka wanyalo ikre mar tiyo kode?
3 Ti gi Bug Good News for People of All Nations: Bugni ogo mondo watigo seche ma waromo gi joma wacho dhok mopogore gi marwa. Bed gi bugni kinde duto, ng’e gik moting’o, kendo iikri mar tiyo kode. Mondo iyud mapiyo ite midwaro, gor lain e dhok mopogore opogore ma ijaromogo e alworau. Ka buge mogo e dhokgo yudore, nyalo bedo maber ka iting’o moko kuomgi mondo iwe ne ng’at mawacho dhok machielo bang’ tiyo gi weche mayudore e bug Nations.
4. Ere kaka inyalo ti gi bug Nations e tijwa mar lendo?
4 Ka seche ma in e tij lendo iyudo ng’at mawacho dhok machielo to ok ing’eyo ni en dhok mane mowacho, chak wuoyo kode ka inyise ng’e bugno. El kama nitie map e bugno, siemri kae to isiem ne wuon ot piny midakie, kendo inyise ni diher ng’eyo piny ma owuokie kod dhok mowacho. Bang’ ng’eyo dhok mowacho, el ite moting’o weche mantie, many ite mowinjore, nyis wuon ot weche mondik madongo mayudore malo mar ite ma ielono, kae to ikwaye mondo osom weche manie bwo weche mondik madongogo. Kosetieko somo, miye trakt mogo e dhok mowacho kata isiemne weche mobuk gi rangi ma rairo, mawacho ni diher duogo gi buk mogo e dhok mowacho. Kae to isiemne weche mondik madongo ni, “nyinga,” kendo ihul nyingi e yo mawinjore maler. Siemne kama ondik madongo ni “nyingi,” kae to irit dwoko mare. Tim chenro maber mar dok timo limbe.
5. Chenro mane monego otim mondo olim joma orwako wach mawacho dhok machielo?
5 Chenro mar Dok Timo Limbe: Nyaka tim kinda mar limo joma rwako wach mar Pinyruoth, kata obedo ni giwacho dhok machielo. Ka wafwenyo ni nitie ng’at ma diher ng’eyo Nyasaye kod Wachne, ma en Muma, onego wapong’ fom mar Tafadhali Fuatia Upendezi (S-43) kendo wachiwe mapiyo ne jagoro mar kanyaklawa mabiro ore ne ofis mondo jalendo mawacho dhokno olim ng’atno. Bang’ mano, ofis biro oro fomno ne grup mawacho dhokno. Bang’ yudo fomno, onego omany ng’atno maok odeko. Jagoro moyudo fomno nyalo miyo jarit tij lendo kopi mare mondo en bende ong’e dongruok ma grup mawacho dhokno timo. Fomni onego otigo mana ka ng’ato orwako wach gadier.
6. Ka wayudo ng’at mawacho dhok machielo, en ting’ mane ma wan-go?
6 Chakre kinde ma opong’ie fom mar S-43 nyaka chop kinde ma jalendo moyier mawacho dhokno limoe ng’at ma ne orwako wach, nyalo kawo kinde. Omiyo, kuom timo kinda mar konyo ng’at ma ne orwako wachno, jalendo ma nochiwo fom mar S-43 nyalo dhi nyime gi timo limbe ne ng’atno nyaka chop kama jalendo mawacho dhokno yudore. Ka nyalore, to otim kode puonjruok mar Muma. Kata kamano, e kinde ma podi itimo chenro mar yudo ng’at manyalo konyo jal morwako wachno, ere kaka jalendo ma ne oyude nyalo yudo buge mogo e dhok mowacho?
7. Ang’o mosemiwa manyalo konyowa yudo buge e dhok ma joma waromogo wacho?
7 Buge Mogo e Dhok Mamoko: Kanyakla ok onego obed gi buge mang’eny ahinya mogo e dhok mamoko. Kata kamano, ka jarit tij lendo oneno ka joma wacho dhok machielo e alworau medo rwako adiera, onyalo neno ka owinjore bedo gi buge moromo e dhokno mondo jolendo otigo. Ka kanyakla onge gi bugego, unyalo oro kwayo. Nyalo kawo kinde ka buge ma ukwayo mogo e dhok moro pok ochopo. Kuom mano, nitie thuolo mar yudo weche manie bugego e adres mar intanet mar www.watchtower.org. Nitie buge mang’eny mogo e dhok mamoko ma jalendo kata jal morwako wachno nyalo yudo mapiyo e adresno. Onge kiawa ni tiyo gi adresni biro konyo ahinya seche ma ikonyo joma orwako wach to wacho dhok machielo.
8. Kanyakla nigi ting’ mane e konyo joma orwako wach to wacho dhok machielo?
8 Ting’ ma Kanyakla Nigo: Kuonde moko ma joma wacho dhok mawendo medore nyalo bedo ni onge kanyakla mani machiegni matiyo gi dhokno. Omiyo, joma rwako wach to wacho dhok machielo onego ogwel e chokruoge mag kanyaklau. Rwakogi gi mor kendo dewogi gadier nyalo jiwogi mondo gibi e chokruoge pile. E kinde mokwongo, nyalo bedo ni dhok kod kit ngima miyo wuoyo kodgi bedo matek; kata kamano, onge gima nyalo geng’o hera madier mar Jokristo ma Joneno mag Jehova nyiso e piny mangima. (Zef. 3:9; Joh. 13:35) Be inyalo wacho dhok moro e yo maber? Ka en kamano, kendo iikori mar limo joma wacho dhokno, nyis jagoro mar kanyaklau mondo omi oor wachno ne ofis. Mani biro konyo ahinya seche ma ofis dwaro jalendo manyalo konyo joma orwako wach.
9. En kinde mane minyalo ne ni owinjore chako puonjruok dhok machielo, kendo chenro mane monego otim?
9 Puonjruok Dhok: Ka ikonyo jogo mawacho dhok machielo, ber ka ijiwogi mondo gichak dhi e kanyakla matiyo gi dhok ma giwacho, kapo ni ginyalo timo kamano. Kata kamano, kapo ni mano ok nyalre, jolendo moko nyalo yiero mar puonjore dhokno kendo mano nyalo miyo gichiw kony madwarore ne joma rwako wach. Ka onge kanyakla man machiegni, ofis nyalo neno ni ber chako klas mar puonjruok dhok nikech medruok mar joma dar biro dak e piny moro, kata nikech dhok moro ma jopinyno wacho. Ka en kamano, ofis nyalo nyiso kanyakla duto man machiegni dwaro mantie, mondo oland ne kanyaklago chenro mar chako klas. Jogo machiwo kwayo mar puonjruok dhok machielo onego obed gi chenro mar dar mondo gidhi gikony grup kata kanyakla mawacho dhok michakono.
10. En kinde mane minyalo chakie grup mawacho dhok mawendo, to mano inyalo ng’e nade?
10 Chako Grup: Mondo ochak grup matiyo gi dhok moro, nitie gik moko ang’wen mochuno. (1) Nyaka joma rwako wach e dhokno bedie manyalo miyo ochak grup e dhokno. (2) Jolendo moko matin onego obedie mong’eyo dhokno kata mapuonjore dhokno. (3) Jaduong’ mowinjore kata jakony-tich onego obedie mabiro tayo grubno kendo kanyalore to ota chokruok achiel e juma e dhokno. (4) Bura mar jodongo onego obedie ma oikore tayo grubno. Ka gik mowach malo kanyogo ochopi e okang’ moro, jodongo nyalo ndiko ne ofis ka gichiwo weche madwarore kuom grubno kendo gibiro kwayo mondo kanyaklagi ong’ere kaka kanyakla matayo grup mawacho dhok mawendo. (Ne Tengenezo, ite mag 106-107.) Jaduong’ kata jakony tich makonyo e tayo grubno ibiro luongi ni “jarit-grup” kata “jakony-grup” matayo e rito grup.
11. Ang’o momiyo en thuolo makende ahinya konyo joma wacho dhok mawendo e alworawa?
11 Konyo joma wacho dhok mawendo e alworawa en gima dwarore ahinya e tijwa mar lendo mar piny ngima ma Yesu Kristo, jal ma en Ranyisiwa, nochako. Mad watim kar nyalowa mondo wane kaka Jehova yiengo ogendini kendo kelo ire owuon gik migombo. (Hag. 2:7, NW) Mano kaka timo kinda e riwo wachno lwedo en gima jiwowa! Mad Jehova gwedh kinda ma watimo ka wariwre e konyo joma wacho dhok mawendo e alwora mar kanyaklawa, ka wasiko waparo ni kata obedo ni dhok moko miyo bedonwa matek lendo ne ji, Nyasaye nyalo miyo nyak obedie!—1 Kor. 3:6-9.