Ute ma Miyo Japuonjwa Maduong’ Luor

Jehova ohero puonjo joge. Riwruok mar ogandane oseloso skunde mopogore opogore ma tiego jopuonjre mondo gichop migepe mopogore opogore. Achiel kuom skundego en Skul mar Joland-Injili mar Pinyruoth (SKE). Higni matin mokalo, riwruok mar oganda Jehova ok oseketo pachgi mana kuom medo bero skundego kende, to bende giseketo pachgi e bero kuonde mitimoe skundego. Dwarogi maduong’ en medo bero alwora ma jopuonjre gi jopuonjgi somoe. Ere kaka chiwo magu konyowa e chopo dwarono?

Jopuonjre Momedore Kendo ma Somo e Alwora Maber Moloyo

Kuom higni mang’eny, skunde mitiegoe jo Nyasaye osebed kitimo e Ute Romo kod Ute Chokruoge mag Alwora. Kare ang’o momiyo tinde igero kuonde manyien kata iloso ute moko mondo obed kuonde minyalo timie skundego kende? Ne ane weche moko adek momiyo itimo kamano.

Nitie dwaro momedore. Owadwa Christopher ma en jakony e Komiti Mochung’ ne Tij Lendo manie bwo Bura Matayo, nowacho kama: “Ripot mowuok e ofise mopogore opogore nyiso ni nitie dwaro maduong’ mar jolendo. Kuom ranyisi, e higa mar 2019, bad ofis ma Brazil nofwenyo ni ne dwarore ni otieg jolendo momedore 7,600 e SKE mondo okony e chopo dwaro mopogore opogore e alwora manie bwo bad ofisno.” Bad ofis ma Amerka nowacho ni nitie dwaro maduong’ mar jopainia molony ma nyalo tiego jomamoko kaka ginyalo lendo e lela ka gitiyo gi troli e taonde madongo, lendo kuonde ma meli gowoe kata e dho wedhe, kata lendo e jela. Bende, nitie dwaro mar owete ma nyalo konyo e Migawo Mochung’ ne Gedo (LDC) kod Komiti Matudore gi Osiptende (HLC). Owete gi nyimine mosetieg e skul mar SKE, nyalo konyo e chopo dwaro kaka mago.

Nitie owete gi nyimine mang’eny ma gombo dhi e skundno. Ofise mang’eny oseyudo kwayo mag jolendo mang’eny, moloyo ma ginyalo yienegi dhi e skundno. Kuom ranyisi, e piny Brazil, ofis noyudo kwayo mag ji ma dirom 2,500 e higa achiel. Nikech nok mar ute minyalo timie skundno, ofis noyie ne jopuonjre 950 kende dhi e skundno.

Yudo kuonde dak mowinjore. E kinde ma nitiyo gi Ute Romo kod Ute Chokruoge mag Alwora e timo skundni, jopuonjre mopogore opogore ne yudoga kuonde dak e ute owete gi nyimine modak e alwora mitimoe skul. Chenrono tiyo maber kuonde mitimoe klese manok higa ka higa. Kata kamano, kuonde mitimoe klese mang’eny to nyalo bedo matek ahinya ne owete gi nyimine modak e alworano rwako jopuonjre kendo dak kodgi kuom dweche mang’eny e higa. Nitie ute moger machiegni gi kuonde ma jopuonjre somoe, kendo molos mondo ochop dwaro mag jopuonjrego kende.

Loso ot ma nigi klas achiel kod ute ma jopuonj kod jopuonjre ma dirom 30 nyalo dakie kaachiel gi gik mamoko ma dwarore, nyalo kawo dola milionde modhuro (ma Amerka) ka luwore gi alwora ma odno nitie kod weche mamoko.

Kaka Ute Mitimoe Skundego Chalo

Kinde mang’eny, skundego igeroga oko mar taon kama okuwe, kendo kama yore mag wuoth yudoree mayot. Iyieroga kuonde ma nitie jolendo mang’eny ma nyalo konyo e tije mopogore opogore sama skul dhi nyime, kod ma nyalo konyo e rito utego kaachiel gi gik mitiyogo.

Utego nigi laibrari, kuonde somo, kompyuta, printa, kod gik mamoko. Thoth utego nigi kama olosi ma jopuonjre kod jopuonjgi nyalo chiemoe kanyachiel. Bende, ilosonegiga kama ginyalo rieyoe dendgi kendo yueyoe.

Klese bende iloso e yo makende ahinya. Troy ma tiyo e Migawo Mochung’ ne Gedo e Piny Ngima man Warwick, New York lero kama: “Ne watudore gi Migawo Mochung’ ne Skunde mag Tij Nyasaye mondo okonywa ng’eyo kaka ne wanyalo gero klese ma jopuonjre nyalo somoe maber, ma onge gima chochogi. Owetego nokonyowa ng’eyo ni onego wager klas ma rom nade, wachane nade, teyni ma dwarore, kod gige tugo vidio gi mag kowo dwol.” Owadwa Zoltán ma en japuonj mar SKE e piny Hungary, nowuoyo kuom gige kowo dwol kowacho kama: “Ka ne wachako skundni, ne waonge maikrofon, omiyo, kinde ka kinde ne chuno ni wapar ne jopuonjre ni giting’ dwondgi malo. To nikech sani koro nitie maikrofon e mesa ka mesa, chandruogno koro orumo!”

“Welo Modhial mag Jehova”

Ute ma ne omed bergo osekonyo nade jopuonjre kod jopuonjgi? Angela ma nodhi e skul mar SKE e taon mar Palm Coast, Florida, e piny Amerka wacho kama: “En kama okuwe ahinya. Gik moko duto ochan maber, moriwo klese kod kuonde nindo mondo okonywa keto pachwa duto e somo kod puonjruok.” Owadwa Csaba ma en japuonj mar SKE e piny Hungary, mor ahinya gi thuolo ma giyudoga mar chiemo kanyachiel gi jopuonjre. Owacho kama e wi kinde kaka mago: “Jopuonjre bedoga thuolo kodwa, kendo ginyalo wacho gik ma gikaloe, to mano miyo wang’eyogi maber. Nikech mano, wanyalo chopo e chunygi sama wapuonjogi.”

Jopuonjre kod jopuonjgi neno ute momed bergo kaka gueth mowuok kuom Jehova, ‘Japuonjwa Maduong’.’ (Isaya 30:20, 21) Nyaminwa moro ma wuok e piny Philippines ma nodhi e skul mar SKE mitimo e ot ma nolok mondo obed mar skul, nowacho kama: “Alwora mar skul noparonwa ni ok wan mana jopuonjre, to kar mano, wan welo modhial mag Jehova. Odwaro ni wabed mamor sama wapuonjore Wachne adimba.”

Ute mitimoe skunde mag tij Nyasaye inyalo ger, losi, kendo riti nikech chiwo magu ma thothne ugologa kutiyo gi websaitwa mar donate.jw.org. Erourukamano ahinya.