Tich Adek, Julai 16
Jehova ong’eyo ni paro mag jorieko gin gik manono.—1 Kor. 3:20.
Onego watem matek mondo wakwed pach dhano. Ka wachako neno gik moko e yo ma dhano nenogigo, wanyalo po ka waweyo Jehova kod chikene. (1 Kor. 3:19) “Rieko mar pinyni” kinde mang’eny chopoga mana gombo mag ringruok. Moko kuom Jokristo ma nodak Pergamo kod Thuatira nochako luwo pach joma nodak e taondego e weche mag lamo sanamu kod timbe mag terruok. Yesu nosiemo kanyakla ariyogo nikech ne gimbeko chike Nyasaye e wechego. (Fwe. 2:14, 20) E kindewagi, ithung’owaga mondo waluw pach dhano. Joodwa kod osiepewa nyalo nyisowa ni wadwa rido chike ahinya. Kuom ranyisi, ginyalo nyisowa ni waluw gima chunywa nyisowa, kendo ni chike mag Muma ma tayo timbe makare gin ma nyachon ahinya. Nitie sama wanyalo chako neno ni yo ma Jehova tayowago ok winjre maler. Wanyalo kata chako ‘kadho weche mosendik.’—1 Kor. 4:6. w23.07 16 ¶10-11
Tich Ang’wen, Julai 17
Osiep madier nyiso hera ndalo duto kendo en owadu ma ne onyuol mondo okonyi chieng’ chandruok.—Nge. 17:17.
Ne dwarore ni Maria ma ne en min Yesu oyud teko. Nodhi mako ich kata obedo ni ne oonge dichwo. Ne pok opidhoga nyithindo, to koro ne dwarore ni odhi opidh wuoyi ma ne dhi bedo Mesia. Bende, nikech ne en nyako ma silili, ere kaka nodhi lero wechego ne Josef ma nosetimogo singruok mar kend? (Luka 1:26-33) Ere kaka Maria noyudo teko? Nokwayo jomamoko mondo okonye. Kuom ranyisi, nokwayo Gabriel mondo omiye weche momedore e wi migawono. (Luka 1:34) Kinde machuok bang’ mano, nodhi nyaka “e piny motimo gode” e dala moro mar Juda mondo olim Elizabeth watne. Elizabeth nopwoyo Maria kendo Jehova notayo Elizabeth gi rohone maler mondo ojiw Maria gi wach moro ma nokor e wi nyathi ma Maria ne dhi nyuolono. (Luka 1:39-45) Maria nowacho ni Jehova “osetimo gik madongo gi bade.” (Luka 1:46-51) Jehova notiyo gi Gabriel kod Elizabeth mondo omi Maria teko mar timo dwache. w23.10 14-15 ¶10-12
Tich Abich, Julai 18
Ne omiyo wabedo pinyruoth kendo jodolo ma tiyo ne Nyasache kendo Wuon mare.—Fwe. 1:6.
Nitie jolup Kristo manok mowal gi roho maler kendo gin gi winjruok makende gi Jehova. Gin ji 144,000 kendo gibiro bedo jodolo e polo kanyachiel gi Yesu. (Fwe. 14:1) Ka Maler e i hema mar lamo ochung’ ne chalgi sama gin e piny kae kaka yawuot Nyasaye mowal gi roho. (Rumi 8:15-17) Ka Maler Moloyo ochung’ ne polo owuon kama Jehova odakie. “Pasia” ma nopogo Ka Maler gi Ka Maler Moloyo, ochung’ ne ringre Yesu ma ne en-go e piny ka, ma ne en kaka rageng’ ma mone dhi e polo mondo obed Jadolo Maduong’ e hekalu mar ranyisi. Ka ne Yesu ochiwo ringrene kaka misango ne oganda dhano, noyawo ne Jokristo mowal yo mar dhi e polo. Jokristo mowalgo bende nyaka we ringregi e ka giyud pokgi e polo.—Hib. 10:19, 20; 1 Kor. 15:50. w23.10 28 ¶13