Tich Abich, Septemba 26
Gokinyi mang’ich, [Yesu] nodhi kamoro kar kende mochako lemo kanyo.—Mar. 1:35.
Yesu noketo ne jopuonjrene ranyisi maber e wi wuoyo gi Jehova e lamo. E kinde ma ne en e piny kae, nolemoga nyading’eny. Ne nyaka oketga thuolo tenge mag lamo nikech thothne nodichga kendo ji ne sikoga bute. (Mar. 6:31, 45, 46) Nomondoga okinyi mang’ich mondo oyud thuolo mar lemo ka en kar kende. Nitie kinde moro ma nolemo otieno mangima ka ne pok otimo yiero moro maduong’. (Luka 6:12, 13) Bende, e otieno mogik ka ne pok onege, nolemo nyadinwoya koketo pache e tieko migawo maduong’ ma nokele e piny kae. (Mat. 26:39, 42, 44) Ranyisi mar Yesu puonjowa ni kata ka wadich manade, pod dwarore ni waket thuolo tenge mar wuoyo gi Jehova e lamo. Mana kaka Yesu, nyalo dwarore ni walos thuolo mag lamo e seche mag okinyi mang’ich kata bang’e gotieno. Sama watimo kamano, wanyiso Jehova ni wageno mich mar lamo. w23.05 3 ¶4-5
Ngeso, Septemba 27
Nimar hera mar Nyasaye oseol ei chunywa kokalo kuom roho maler ma nomiyowa.—Rumi 5:5.
Ne ane wach motigo e ndikono ni “hera mar Nyasaye oseol.” Buk moro ma wuoyo kuom weche motigo e Muma lero wechego kama: “Herane olore kuomwa mana kaka aora.” To mano doko ranyisi maber motigo e lero okang’ ma Jehova oherogo Jokristo mowal! Jokristo mowal ong’eyo ni ‘Nyasaye oherogi.’ (Juda 1) Jaote Johana nonyiso kaka Jokristo mowal winjo e chunygi nikech wachno ka nondiko kama: “Neuru hera ma Wuoro osemiyowa mondo oluongwa ni nyithind Nyasaye!” (1 Joh. 3:1) Be Jehova ohero mana Jokristo mowal kende? Ooyo, Jehova osenyiso ni oherowa waduto. Ang’o maduong’ ma Jehova osetimo ma nyiso ni oherowa? Nomiyowa misango mar rawar. Mano nonyiso kaka Jehova ohero dhano e okang’ malach.—Joh. 3:16; Rumi 5:8. w24.01 28 ¶9-10
Jumapil, Septemba 28
Wasika biro ringo ka aluongi mondo ikonya. An gadiera chuth kuom wachni: Nyasaye en jakora.—Zab. 56:9.
Ndikono nyiso gima nokonyo Daudi loyo luoro ma ne en-go. Kata obedo ni ngimane ne ni kama rach, noparo matut kuom gik ma Jehova ne dhi timone. Daudi nong’eyo ni Jehova ne dhi rese e kinde mowinjore. Jehova nosewacho ni Daudi e ma ne dhi bedo ruodh Israel bang’ Saulo. (1 Sa. 16:1, 13) Daudi ne nenoga singo mag Jehova ka gima gisetimore. Ang’o ma Jehova osingonwa? Ok wagen ni obiro geng’onwa chandruoge duto ma waromogo sani. Kata kamano, e piny manyien Jehova biro golo tembe kod chandruoge ma waromogo e kindegi. (Isa. 25:7-9) Jachuechwa nigi teko mar chiero jomotho, changowa, kendo tieko joma kwedowa.—1 Joh. 4:4. w24.01 6 ¶12-13