Be Jachien Nitie Adier?

Dwoko ma Muma chiwo

Ee, Jachien nitie. En e “jaloch mar pinyni,” kendo chuech mar roho ma nong’anyo ne Nyasaye mobedo ng’at marach. (Johana 14:30; Jo-Efeso 6:11, 12) Muma leronwa kit Jachien kotiyo gi nyinge ma luwogi:

• Satan, tiende ni “Jakwede.”​—Ayub 1:6.

• Jachien, tiende ni “Jaketh nying.”​—Fweny 12:9.

• Thuol, tiende ni “Jawuond ji,” kaka itiyo kode Muma.​—2 Jo-Korintho 11:3.

• Jatem.​—Mathayo 4:3.

• Jamiriambo.​—Johana 8:44.

Jachien ok en gimoro manie i ng’ato ma miyo otimo gik maricho

Jomoko paro ni Satan Jachien en gimoro manie i dhano ma miyo gitimo gik maricho. Kata kamano, Muma nyisowa mbaka moro ma ne nitie e kind Nyasaye gi Satan. Nyasaye en ng’at makare chuth, omiyo, ok nyal bedo ni ne owuoyo gi gimoro marach manie iye. (Rapar mar Chik 32:4; Ayub 2:1-6) Satan bende ne otemo Yesu, ma en ng’at ma onge richo. (Mathayo 4:8-10; 1 Johana 3:5) Omiyo, Muma nyisowa ni Jachien en ng’at ma nitie adier to ok ni en gimoro marach manie i ng’ato.

Be en gima onego okawwa gi wuoro ni ji mang’eny ok oyie ni Jachien nitie? Ooyo ngang’, nikech Muma wacho ni Satan tiyo gi wuond e chopo dwache. (2 Jo-Thesalonika 2:9, 10) Yo achiel maduong’ ma otiyogo en wuondo ji mang’eny mondo gipar ni en ng’at ma onge.​—2 Jo-Korintho 4:4.

Miriambo mamoko miwacho kuom Jachien

Miriambo: Lucifer en nying machielo mar Jachien.

Adiera: Dho Hibrania motigo e Mumbni mamoko ni “Lucifer,” tiende en “sulwe marieny.” (Isaya 14:12) Weche molworo ndikono nyiso ni iwuoyo e wi anyuola mag ruodhi mag Babulon, ma Nyasaye ne dhi tieko nikech timgi mar ng’ayi. (Isaya 14:4, 13-20) “Sulwe marieny” ne otigo e jaro loch mar Babulon bang’ ka lojno ne osepodho.

Miriambo: Nyasaye tiyo gi Satan e ng’ado ne ji bura

Adiera: Jachien en jasik Nyasaye to ok jatichne. Satan Jachien kwedo jotich Nyasaye kendo owacho weche mag miriambo kuomgi.​—1 Petro 5:8; Fweny 12:10.