Kaka Hera Konyowa Loyo Luoro

1. Moko kuom gik ma miyowaga luoro gin mage?

NE ANE moko kuom gik mosetimore ne Joneno mag Jehova wetewa. Owadwa Nestor kod María jaode ne gombo dhi lendo kama jolendo dwaroree moloyo.b Mondo ne gitim kamano, ne dwarore ni gichak puonjore dak gi pesa matin. Kata kamano, ne giluor ni samoro mor ma ne gin-go ne dhi lal ka po ni gichako dak gi pesa matin. Biniam nobedo Janeno e piny mikwedoe tij Joneno mag Jehova, kendo nong’eyo ni mano ne nyalo miyo osande. Wachno ne miye luoro. Kata kamano, paro apara gik ma joodgi ne dhi timone ka po ni ne ginyalo fwenyo ni odonjo e din manyien, ne miye luoro moloyo. Valérie noyud gi kansa moro marach ahinya, kendo notimo kinda mondo oyud laktar ma ne nyalo yang’e ma ok omede remo. Noluor ni nonyalo tho.

2. Ang’o momiyo dwarore ni watim kinda mondo kik luoro lowa?

² Dibed ni in bende isekalo e gik ma wawuoyego? Thothwa osekaloe. Ka po ni waweyo ma luoro ochikowa, wanyalo timo yiero maricho ma nyalo ketho winjruokwa gi Jehova. Mano e gima Satan dwaro ni watim. Otiyoga gi luoro ma wan-go mondo omi waketh chike Jehova, moriwo nyaka chik momiwa ni waland wach maber. (Fwe. 12:17) Satan en ng’at marach ma ok kech ng’ato ang’ata, kendo en gi teko. Kata kamano, nitie gima inyalo timo mondo kik ohinyi. Mano en ang’o?

3. Ang’o ma biro konyowa loyo luoro ma wan-go?

³ Ka wan gadier ni Jehova oherowa kendo ni en jakorwa, wanyalo loyo Satan. (Zab. 118:6) Kuom ranyisi, jal ma ne ondiko Zaburi 118 ne kalo e chandruoge moko e ngimane. Ne en gi jowasigu mang’eny moriwo nyaka joma ne ni e telo (wes 9, 10). Nitie kinde ma gik maricho ne thung’e ahinya (wes 13). Jehova bende nosekume gi kum malit ahinya (wes 18). To e ma pod jandik-zaburino nowero niya: “Ok abi luor.” En ang’o ma nokonye bedo gi chuny mokuwe? Nong’eyo ni kata obedo ni Jehova Wuon-gi manie polo nosekume, pod Wuon-gino nohere ahinya. Jandik-zaburino ne ni gadier ni kata obedo ni nokalo e chandruok ma chalo nade, Jehova Nyasache ma jahera ne dhi bedo kode kendo konye kinde duto.​—Zab. 118:29.

4. Gin luoro mage ma wanyalo loyo ka wan gadier ni Jehova oherowa?

⁴ Dwarore ni wabed gadier ni Jehova oherowa. Bedo gadier gi wachno biro konyowa loyo luoro ma wanyalo bedogo e weche adekgi: (1) Bedo maluor ni ok wabi pidho joodwa, (2) luoro dhano, kod (3) luoro tho. Joneno wetewa ma ne wawuoye e paragraf mokwongo noloyo luoro ma ne gin-go nikech ne gin gadier ni Nyasaye oherogi.

BEDO MALUOR NI OK WABI PIDHO JOODWA

5. Gin weche kaka mage ma nyalo miyo wiye udi parruok? (Ne picha manie nyim gaset.)

⁵ Wi ot ma Jakristo kawoga mapek ting’ ma en-go mar pidho joode. (1 Tim. 5:8) Ka po ni in wi ot, samoro e kinde mag tuo mar korona, niluor ni ninyalo lalo tiji. Nyalo bedo ni niluor ni samoro ne ok dhi bedoni mayot miyo joodi chiemo kod kar dak. Samoro niluor ni kilalo tiji, to ok ne dhi bedoni mayot yudo tich machielo. Kata, mana kaka Nestor gi María ma ne wasewuoye, samoro niluor timo lokruoge moko e tiji mar andika nikech mano ne dhi miyo osachi odog piny. Satan osetiyo gi luoro ma kamago e miyo ji mang’eny oweyo tiyo ne Jehova.

6. En ang’o ma Satan dwaro ni wapar?

⁶ Satan dwaroga ni wapar ni Jehova ok dewwa kendo ni ok okonywaga pidho joutewa. Mano nyalo miyo watim gimoro amora mondo warit tijwa mar andika kata ka po ni gik ma watimogo ok luwre gi puonj mag Muma.

7. En wach mane ma Yesu nonyisowa?

⁷ Yesu e jal mong’eyo Jehova e yo maber moloyo ng’ato ang’ata. Nonyisowa ni Jehova ‘ong’eyo gik ma wachando kata ka pok wakwaye.’ (Mat. 6:8) Yesu ong’eyo ni Jehova oikore miyowa gik ma wachando. Nikech wan Jokristo, wan jood Jehova. To nikech Jehova e wi joot duto, wan gadier ni obiro timo gima iwacho e 1 Timotheo 5:8.

8. (a) Ang’o ma biro konyowa loyo luoro ma wanyalo bedogo ni samoro pidho joodwa nyalo tamowa? (Mathayo 6:31-33) (b) Mana kaka onyis e picha, ere kaka wanyalo luwo ranyisi mar owadwa gi jaode motero ne nyaminwa moro chiemo?

⁸ Ka wan gadier ni Jehova oherowa, kendo ni ohero joodwa, biro bedonwa mayot yie ni obiro miyowa gik ma wachando. (Som Mathayo 6:31-33.) Jehova en Wuoro ma jahera kendo jachiwo. Ogombo ahinya miyowa gik ma wachando. Ka nochueyo piny, nochueyo gik mang’eny moloyo mana gik ma nyalo siro ngimawa. Nopong’o piny gi gik ma miyowa mor. (Cha. 2:9) Kata obedo ni nitie kinde ma wan-ga mana gi gik matin, pod wanyalo bedo gadier ni kata matin-go Jehova e momiyowa. (Mat. 6:11) Dwarore ni waket e paro ni gimoro amora ma wachiwo ne Jehova sani ok nyal pim gi gik ma omiyowa e kindegi kod mobiro miyowa e kinde mabiro. Mano e gima Nestor gi María noduogo ofwenyo.​—Isa. 65:21, 22.

9. Ranyisi mar Nestor gi María puonji ang’o?

⁹ Nestor gi María nodak e ngima maber ka ne gin Colombia. Ne giwacho kama: “Ne wajaparoga kaka wanyalo dak e ngima mayot mondo wati gi thuolo momedore e tij Jehova. Kata kamano, ne waluor ni mano ne dhi mayowa mor kendo ne dhi miyo wadag gi pesa matin.” Ang’o ma nokonyogi loyo luoro ma ne gin-go? Ne giparo matut kuom yore mang’eny ma Jehova nosenyisogigo hera. Ne gibedo gadier ni Jehova ne ok nyal jwang’ogi, kendo ne giweyo tijegi ma ne ichulogie osara maber. Ne giuso odgi kendo ne gidar mi gidhi e alwora ma jolendo dwaroree ahinya e pinygi. Gineno nade yiero ma ne gitimono? Nestor wacho kama: “Waseneno adiera mag weche manie Mathayo 6:33. Pok wachando gimoro amora, kendo sani wamor ahinya.”

LUORO DHANO

10. Gin timbe mage ma miyoga ji luoro dhano wetegi?

¹⁰ Kuom higni mang’eny, ji osebedo ka hinyo dhano wetegi. (Ekl. 8:9) Kuom ranyisi, thoth ji tiyoga marach gi teko momigi, jomahundu ohero timo timbe maricho, nitie nyithindo ma sandoga nyithindo wetegi e skul, kendo jomoko to timoga gik maricho ne joodgi. Timbe ma kamago miyoga ji luoro dhano wetegi. Ere kaka Satan tiyoga gi luoro dhano e miyo ji kik luw chike Jehova?

11-12. Ere kaka Satan tiyoga gi luoro dhano mondo omi waketh chike mag Nyasaye?

¹¹ Satan tiyoga gi luoro dhano mondo omi waketh chike mag Jehova kendo mondo wawe lendo. Satan osemiyo sirkande moko ogoyo tijwa marfuk kendo moko osesandowa. (Luka 21:12; Fwe. 2:10) E piny Satanni, ji mang’eny landoga weche mag miriambo e wi Joneno mag Jehova. Joma winjoga miriambo kaka mago nyaloga jarowa kata goyowa. (Mat. 10:36) Be yore ma Satan tiyogogo gin yore manyien? Ooyo. Notiyoga gi yorego e kinde Jokristo mokwongo.​—Tich 5:27, 28, 40.

¹² Bedo maluor ni sirkal biro kwedowa ok e yo kende ma Satan tiyogago. Nitie joma oluorga ka giparo apara gik ma joodgi biro timonegi ka po ni gifwenyo ni gin Joneno mag Jehova. Wachno nyalo miyogi luoro ahinya moloyo luoro ma ginyalo bedogo ka ging’eyo ni inyalo sandgi. Gihero wedegi ahinya, kendo gigombo ni wedegigo bende obi oti ne Jehova. Omiyo, giwinjoga marach ahinya sama wedegigo wuoyo e yor achaya e wi Nyasaye madier kod jotichne. Kata kamano, nitie wedewa ma ne kwedoga adiera, to bang’e ne gipuonjore adiera ma gibedo Joneno mag Jehova. To nade ka po ni joodwa ong’ado tudore kodwa chuth mana nikech wabedo Joneno mag Jehova? Wabiro timo ang’o?

13. Ere kaka bedo gadier ni Jehova oherowa nyalo konyowa nyagore sama joodwa ong’ado tudruok kodwa? (Zaburi 27:10)

¹³ Weche manie Zaburi 27:10 nyalo jiwowa ahinya. (Som.) Ka waparo apara hera ma Jehova oherowago, wawinjoga ka wan gi chuny mokue kata sama waromo gi akwede. Kendo wan gadier ni Jehova biro guedhowa ka wanano. Jehova kende e ma nyalo miyowa gige ringruok mochuno. En e monyalo hoyo chunywa, kendo onyalo konyowa siko ka wan machiegni kode! Mano e gima Biniam ma ne wasewuoye noduogo ofwenyo.

14. Ranyisi mar Biniam puonji ang’o?

¹⁴ Biniam nobedo achiel kuom Joneno mag Jehova kata obedo ni nong’eyo ni sirkal mar pinygi ne sandoga Joneno. Ne ane kaka ng’eyo ni Jehova ohere nokonye loyo luoro dhano. Owacho kama: “Nisando Joneno mag Jehova malit moloyo kaka naparo. To gima naluoro moloyo kata sandno ne en akwede ma ne a kuom joodwa. Ne aluor ni yiero ma nasetimo mar bedo Janeno mar Jehova ne dhi chwanyo wuonwa, kendo ni joodwa ne dhi nena kaka ng’at manono.” Kata kamano, Biniam ne ni gadier ni Jehova dewoga ahinya joma ohere. Biniam medo wacho kama: “Naparo matut e wi kaka Jehova nosebedo ka konyo jomamoko nano sama gin gi pek mag yuto, sama omonjgi, kod sama ibuonogi. Nang’eyo ni ka amakora gi Jehova, to nodhi guedha. Polise nomaka kendo nosanda nyading’eny. E kindego, naneno kaka Jehova konyowaga sama wadwaree moloyo, tek mana ni wamakore kode motegno.” Biniam noneno Jehova kaka Wuon-gi madier, kendo noneno jotich Jehova kaka joodgi.

LUORO THO

15. Ang’o momiyo waluoroga tho?

¹⁵ Muma wacho ni tho en jasigu. (1 Kor. 15:25, 26) Wanyalo bedo gi parruok mang’eny ka waparo e wi tho, to moloyo ka po ni watuo kata watwa moro kata osiepwa moro tuo matek. Ang’o momiyo waluoroga tho kamano? En nikech Jehova nochueyowa gi gombo mar dak gi mor nyaka chieng’. (Ekl. 3:11) Bedo gi luoro e okang’ moro nyalo ritowa. Kuom ranyisi, luoro ma kamano nyalo konyowa timo yiero ma kare e wi chiemo ma wachamo, kit rieyo del ma wabiro timo, kod thieth ma wabiro manyo sama watuore. Bende, luorono nyalo konyowa tang’ gi gik ma nyalo hinyo ngimawa.

16. Ere kaka Satan nyalo tiyo gi luoro tho mondo omi waketh chike Jehova?

¹⁶ Satan ong’eyo ni wahero ngima ahinya. Owachoga ni wanyalo timo gimoro amora, moriwo nyaka ketho winjruokwa gi Jehova, mana ni mondo wares ngimawa ma sani. (Ayub 2:4, 5) To mano doko miriambo maduong’! Nikech Satan e “jal ma nigi nyalo mar kelo tho,” otemoga tiyo gi luoro tho mondo omi wajwang’ Jehova. (Hib. 2:14, 15) Nitie kuonde ma Satan osetiyoe gi joge e bwogo jo Jehova ni ka ok gikwedo yiegi, to gibiro negogi. Kata, Satan nyalo tiyo gi tuoche kod weche mag thieth e miyo waketh chike mag Jehova. Lakteche kod joutewa ma ok gin Joneno, nyalo thung’owa ni omedwa remo, to mano en ketho chik Nyasaye. Kata, ng’ato nyalo thung’owa mondo waluw kit thieth ma tuomore gi puonj mag Muma.

17. Ka luwore gi Jo-Rumi 8:37-39, ang’o momiyo ok onego waluor tho?

¹⁷ Kata obedo ni ok wadwar tho, wang’eyo ni Jehova ok bi weyo herowa kata ka watho. (Som Jo-Rumi 8:37-39.) Sama osiepe Jehova otho, oparogiga mana ka gima pod gingima. (Luka 20:37, 38) Ogombo ahinya chierogi. (Ayub 14:15) Jehova osechulo nengo matek ahinya mondo ‘wabed gi ngima ma nyaka chieng’.’ (Joh. 3:16) Wang’eyo ni Jehova oherowa ahinya kendo odewowa. Kuom mano, kar weyo Jehova sama watuore kata sama tho ochomowa, ber ka wagene mondo en e ma ohowa, omiwa rieko, kendo omiwa teko. Mano e gima Valérie kod jaode notimo.​—Zab. 41:3.

18. Ranyisi mar Valérie puonji ang’o?

¹⁸ Ka ne Valérie jahigni 35, noyude gi kit kansa moro marach. Ne ane kaka hera ma Jehova oherego nokonye loyo luoro tho. Owacho kama: “Tuonano nomiyo ngimawa olokore apoya. Ne dwarore ni otimna yeng’o moro maduong’. Nawuoyo gi lakteche mopogore opogore, kata kamano, giduto ne gitamore ni ok ginyal yang’a ma ok gimeda remo. En adier ni naluor, kata kamano, ne ok anyal yie mondo omeda remo nikech mano ne dhi ketho chik Nyasaye e wi wach tiyo gi remo. E ngimana duto, Jehova nosebedoga ka nyisa herane. To koro an be nayudo thuolo mar nyiso ni ahere. Sa asaya ma nayudo wach moro marach, naneno mano kaka thuolo mar miyo chuny Jehova mor, to ok Satan. Gikone, noyang’a maber ma ok omeda remo. Kata obedo ni pod atuora, Jehova osebedo ka miyowa gik moko duto ma wachando. Kuom ranyisi, ka ne pok ofweny kit kansa ma ne an-go, e giko jumano, ne wanono sula ma ne wacho ni ‘Nyagruok gi Chandruoge mag Kindegi gi Chir’ e chokruok mar kanyakla.c Sulano nohoyowa ahinya. Ne wasome nyadinwoya. Sula kaka mago kod bedo gi chenro maber mar timo gik motudore gi lamo, osekonya gi jaoda mondo wabed gi chuny mokue kendo timo yiero mabeyo.”

LOYO LUORO MA WAN-GO

19. Ang’o ma biro timore machiegnini?

¹⁹ Jehova osekonyo Jokristo e piny mangima mondo gilo pek mopogore opogore ma gi kaloe, kendo gisekwedo Jachien. (1 Pet. 5:8, 9) In bende onyalo konyi timo kamano. Machiegnini, Jehova biro chiko Yesu kod joloch wetene mondo ‘giketh tije mag Jachien.’ (1 Joh. 3:8) Bang’ mano, jotich Nyasaye ma biro dong’ e piny kae biro tiyone ma ‘ok giluoro gimoro amora kendo onge gima nobuoggi.’ (Isa. 54:14; Mika 4:4) Nyaka chop kindeno, dwarore ni watim matek mondo walo luoro ma wanyalo bedogo.

20. Ang’o ma biro konyowa loyo luoro ma wan-go?

²⁰ Dwarore ni wadhi nyime medo bedo gadier ni Jehova ohero jotichne kendo oritogiga. Paro matut e wi kaka Jehova norito jotichne e kinde machon kendo wuoyo gi jomamoko e wi wechego biro konyowa loyo luoro ma wan-go. Kendo wanyalo paro matut kaka Jehova osekonyowa loyo chandruoge mopogore opogore. Ee, Jehova nyalo konyowa loyo luoro ma wan-go!​—Zab. 34:4.