Be inyalo paro kinde moro ma nigorie piny ka ne pod in nyathi? Nyalo bedo ni gimoro nong’ado lweti kata tiendi, kata chongi noridhre. Be inyalo paro kaka minu nohoyi? Samoro noyweyoni kama nohinyoreno, kae to notueyonigo maber gi kitamba. Onge kiawa ni niywak malit, kata kamano, weche mang’won ma notiyogo kod yo ma nodembigo nohoyi mi iwinjo maber. E kindego, ninyalo yudo hoch mayot ahinya kendo mapiyo.

Kata kamano, kaka wamedo dongo, e kaka ngima medo bedo matek. Chandruoge ma wayudo medo bedo madongo moloyo, to joma hoyowa to medo mana bedo manok. Thoth chandruoge ma wayudo e kindego ok gin chandruoge ma dwaringgo ir minewa mondo gihowa. Ne ane ranyisi moko.

• Be osegariembi e tich midong’ ka chunyi onyosore marach? Julian wacho ni ka ne oriembe e tich, nodong’ ka oparore ahinya. Noparore kama: ‘Ere kaka abiro rito jooda? Bang’ tiyo matek kuom higni mang’eny kama, ang’o momiyo koro jo kambini ok ne ni anyalo konyogi? ’

• Be dibed ni kendni nokethore midong’ kikuyo? Raquel wacho kama: “Dweche 18 mokalo, chwora noweya apoya nono. Kuyo maduong’ nomaka. Ne chalna mana ka gima ne opog chunya nyadiriyo. Lit ma ne an-go ne onyoso chunya kendo denda ne obwok ahinya.”

• Dibed ni tuo moro ma ok rum chandi? Samoro isewinjo e chunyi kaka Ayub ma nowacho kama: “Ajok gi piny; ok adwar bedo mangima.” (Ayub 7:16) Kata, nyalo bedo ni isewinjo e chunyi kaka Luis ma jahigni 80 nowinjo; nowacho kama: “Samoro agomboga ni atho ayue.”

• Koso dibed ni tho mar watni kata osiepni moro miyo idong’ kinyosori kata ihung’asra? Robert wacho kama: “Ka ne wuoda otho e aksident mar ndege, ne ok ayie ni mano otimore gadier. Bang’e nawinjo lit moro e chunya, lit ma Muma pimo gi lit ma ng’ato winjo sama ochwoye gi ligangla.”​—Luka 2:35.

Robert, Luis, Raquel, gi Julian noyudo hoch e kinde ma ne gikalo e chandruoge malichgo. Ne gifwenyo ng’at maberie moloyo ma ne nyalo hoyogi, ma en Nyasaye Manyalo Duto. Gin yore mage ma Nyasaye chiwogo hoch? Be Nyasaye nyalo hoyi?

Jaote Paulo noluongo Jehovaa ni “Nyasach hoch duto, ma hoyowa e masichewa duto.” (2 Jo-Korintho 1:3, 4) Mano nyisowa ni onge ng’at ma nyalo hoyowa e yo maber moloyo Wuonwa manie polo, kendo onge chandruok ma nyalo tamo Nyasaye tieko.

Kata kamano, nitie gik ma wan be nyaka watim ka wadwaro ni Nyasaye ohowa. Kuom ranyisi, ere kaka laktar nyalo chako thiedhi ka ok itudori kode mondo ilerne gima tuoyi? E yo ma chalo kamano, janabi Amos nopenjo niya: “Ji ariyo nowuothi kanyakla mak giwinjore koso? ” (Amos 3:3) Penjono inyalo ket e yo mayot kama: ‘Be ji ariyo nyalo wuotho kanyakla mak gitudore kata ma ok gichano timo kamano? ’ Ndiko jiwowa niya: “Suduru machiegni gi Nyasaye to en bende nosud iru.”​—Jakobo 4:8.

Ere kaka wanyalo bedo gi adier ni Nyasaye nyalo sudo machiegni kodwa? Mokwongo, Nyasaye owuon nyisowa ni odwaro konyowa. (Ne sanduk manie giko sulani) Mar ariyo, nitie ranyisi mag joma noyudo hoch kuom Nyasaye e kinde machon kod kindewagi bende.

Nitie kinde moro ma Daudi nokwayo Jehova kama: “Winj dwond sayona, kaywakni.” Be Nyasaye nodwoko lamone? Ee. Daudi nomedo wacho niya: “Osekonya. E momiyo chunya oil ahinya.” (Zaburi 28:2, 7) Mana kaka Ruoth Daudi, ji mang’eny e kindegi yudo chandruoge mang’eny kendo gikwayoga kony kuom Nyasaye.

MIGAWO MA YESU NIGO E HOYO JI DUTO MA YWAK

Jehova nomiyo Yesu migawo mar hoyo ji. E wi migepe mamoko ma Jehova nomiye, nonego ‘okue jogo ma neno masira e chunygi’ kendo ‘oho jogo duto ma yuagore.’ (Isaiah 61:1, 2) Mana kaka nokor, Yesu nohero hoyo joma ‘ojony kendo ma ting’ turo.’​—Mathayo 11:28-30.

Yesu ne hoyo ji kokalo kuom ng’adonegi rieko, timonegi gik moko yo mamuol, kendo seche moko nochango kata joma tuo. Nitie chieng’ ma jadhoho moro nosayo Yesu niya: “Kidwaro, to mi abed maler.” Yesu ne okeche modwoke kama: “Ee, adwaro! Bed maler.” (Mariko 1:40, 41) Kendo jadhohono nochango.

Kata obedo ni sani Yesu Wuod Nyasaye ok nyal biro hoyowa achiel kachiel e piny ka, Jehova Wuon-gi ma en “Nyasach hoch duto” dhi nyime konyo joma dwaro hoch. (2 Jo-Korintho 1:3) Ne ane yore ang’wen madongo ma Nyasaye tiyogo e hoyo dhano.

• Muma. “Weche duto ma ne ondik chon, ne ondikgi mondo gipuonjwa, mondo kokalo kuom nano ma wanyiso, kendo kokalo kuom hoch moa e Ndiko, wabed gi geno.”—Jo-Rumi 15:4.

• Roho Maler. Kinde matin bang’ ka Yesu nosetho, kanyakla mar Jokristo nobedo gi kue. Nikech ang’o? Nikech ‘ne giwuotho ka giluoro Jehova kendo e hoch mar roho maler.’ (Tich Joote 9:31) Roho maler en teko ma Nyasaye tiyogo e timo gik moko. Nyasaye nyalo tiyo gi rohono e hoyo ng’ato ang’ata e chal moro amora.

• Lamo. Muma jiwowa kama: “Kik ubed gi parruok e wi gimoro amora.” Kar mano, ojiwowa ni ‘wanyis Nyasaye kwayowa, eka kue mar Nyasaye ma loyo ng’eyo duto biro rito chunywa kod pachwa.’​—Jo-Filipi 4:6, 7.

• Jokristo Wetewa. Jokristo wetewa gin osiepewa madier ma nyalo hoyowa sama wan e chandruok. Jaote Paulo nowacho ni osiepene ne ‘kelone hoch ahinya’ e kinde mag ‘chandruok kod masiche.’​—Jo-Kolosai 4:11; 1 Jo-Thesalonika 3:7.

Kata kamano, samoro nyalo bedo ni iwuoro ka be yore ma Jehova hoyowagogo konyo adier. We wanon ane e yo matut ranyisi mag joma osekalo e chandruoge mowuoye e sula motelo ne mae. In be inyalo fwenyo ni Nyasaye chopo singone ma wacho ni: ‘Kaka nyathi ma min mare hoyo, e kaka nahou.’—Isaiah 66:13.

SAMA TIJ YUTO OKETHORE

Setha wacho kama: “An kaachiel gi jaoda ne tich orumonwa riat. Kuom higni ariyo, wedewa e ma ne konyowa. Kibarua moko matindo tindo bende ne watimo. Parruok mang’eny nomiyo Priscilla jaoda oyudo tuo mar depression. Gigo nomiyo achayora ahinya.

“Ang’o ma nokonyowa nyagore gi pekgo? Priscilla nosiko ka paro weche ma ne Yesu owacho e Mathayo 6:34 ni kik chunywa parre nikech kiny, nimar odiechieng’ kodiechieng’ nigi parruokne owuon. Lamo bende ne miye teko mar dhi nyime. An to ndiko mar Zaburi 55:22 e ma ne hoya. Mana kaka jandik-zaburino, naketo ting’ maga kuom Jehova, kendo nafwenyo ni norita maber. Kata obedo ni sani koro an gi tich, pod wadak e ngima mayot ka luwore gi puonj ma Yesu nochiwo e Mathayo 6:20-22. To moloyo duto, wasemedo sudo machiegni gi Jehova kendo e kindwa kaka joot.”

Jonathan bende wacho niya: “Ka ne ohandwa opodho, chunya ne ochandore ahinya ka awuoro kaka ne wadhi dak. Higni 20 ma ne wasebedo ka watiyo matek ne odhi nono. Ne wachako bedo gi ywaruok gi jaoda e weche pesa. Ne ok wanyal kata nyiepo gi kad mar bengi nikech ne waluor ni samoro kadno ne ok dhi tiyo.

“Kata kamano, Wach Nyasaye kod roho mare maler nokonyowa ng’ado paro mabeyo. Napuonjora timo tich moro amora ma ne oyudore, kendo ne waweyo nyiewo gik ma ok ochuno. Ne wayudo kony kowuok kuom Joneno mag Jehova wetewa. Ne gijiwowa ahinya kendo konyowa e kinde ma ne weche tekno.”

SAMA KEND OKETHORE

Raquel wacho kama: “Ka jaoda noweya apoya nono, chunya nonyosore ahinya. Kuyo maduong’ nomaka. Kata kamano, nasudo machiegni gi Jehova, kendo nohoyo chunya. Sama nalemo pile ka pile, kue ma Nyasaye chiwo norito chunya. Ne chalo mana ka gima nothiedho chuny malit ma ne an-go.

“Bende, Wach Nyasaye ma en Muma nokonya loyo ich-wang’ kod sadha ma ne an-go. Naparo matut kuom weche ma Paulo nondiko e Jo-Rumi 12:21 ma wacho niya: ‘Kik iyie mondo gima rach oloyi, to sik kiloyo gima rach kuom timo gima ber.’

“Osiepna moro nokonya ng’eyo gimomiyo ok onego aket pacha kuom chandruoge ma akaloe. Nosomana ndiko mar Eklesiastes 3:6, kae to nonyisa e yo mamuol ni nitie kinde moko monego wayie ‘lalo gimoro.’ Mano ne en puonj ma tiyogo tek, kata kamano, mano e gima ne dwarore ni atim. Sani koro ok aket pacha kuom pek ma an-go; kar mano, adich gi gik ma kelona mor.”

Elizabeth wacho niya: “Sama kendni okethore, onego iyud jip. Ne an gi osiepna moro ma ngita gi del ma nosira ahinya e kinde ma kendna nokethore. Noywak koda, nohoya, kendo nomiyo awinjo e chunya ni nitie ng’at mohera. An gadier ni Jehova e ma notiyo kode e hoyo chunya.”

SAMA NG’ATO TUO KATA HIKE ONIANG’

Luis ma nosewuo kuome e sula mokwongo nigi tuo mar adundo, kendo nitie kinde moko ariyo ma ne both kotho. Sani mondo odhi nyime bedo mangima, nyaka mede muya mar oxygen kuom seche 16 odiechieng’ kodiechieng’. Owacho niya: “Alemo kinde duto ka akwayo Jehova mondo okonya. Bang’ lemo, awinjoga ka roho mar Jehova miya teko. Lamo miya chir mar dhi nyime dak nikech an gi geno kuom Nyasaye kendo ang’eyo ni odewa gadier.”

Petra ma jahigni 80 gi dire wacho kama: “Agombo timo gik mang’eny, to ok anyal. Neno ka tekona dok chien ok en gima yot. Awinjo ka aol kendo yedhe e ma kura. Atemoga paro kaka Yesu nokwayo Wuon-gi mondo chandruok moro okalne ka nyalore. Kata kamano, Jehova nomiye teko, to mano e kaka otimona an be. Lamo e yath mosebedo ka konya. Sama asewuoyo gi Jehova e lamo, awinjoga ka ategno.”​—Mathayo 26:39.

Julian mosebedo ka nyagore kuom higni ma hawo 30 gi tuo mong’ere kaka multiple sclerosisb bende winjoga kamano. Owacho niya: “Sani ok anyal bet e kombe mabeyo ma nabetiega e ofis. Tinde wheelchair e ma atiyogo kamoro amora ma adhiye. To gima mora en ni an gi chuny mokue nikech achiwora konyo jomamoko. Bedo jachiwo nyalo dwoko ne ng’ato rem chien, kendo Jehova chopo singone mar hoyowa e kinde mag chandruok. Mana kaka jaote Paulo, anyalo wacho ni: ‘E weche duto, an gi nyalo kokalo kuom jalno ma miya teko.’ ”​—Jo-Filipi 4:13.

SAMA THO ONENO

Antonio wacho kama: “Ka ne mtoka ogweyo wuonwa mi otho, thoneno ne chalona mana lek. Naneno ni ne ok onego otho athoya mayot kamano to onge kosa ma notimo. En mana ni onge gima ne anyalo timo e wi wachno. Bang’ aksidentno, dhoge nomoko kuom ndalo abich e ka otho. Natemo ahinya mondo kik minwa nena ka aywak, to sama ne an kenda namodho ywak ka pi. Nasiko ka apenjora ni, ‘Ang’o momiyo gigi timore?’

“E kinde ma ne an gi kuyogo, nasiko ka akwayo Jehova mondo okonya abed gi kue e chunya. Mosmos nachako bedo gi kue. Nachako paro kuom ndiko ma wachoga ni ‘gik ma timore apoya’ nyalo yudo ng’ato ang’ata. Nikech Jehova ok riambga, an gadier ni abiro neno wuonwa kochier.”​—Eklesiastes 9:11, New World Translation; Johana 11:25; Tito 1:2.

Robert ma ne osewuo kuome e sula mokwongo bende paro kamano. Owacho kama: “Bedo ni an gi jaoda Maribel ne wasiko walemo mondo Jehova okonywa nomiyo wabedo gi kue ma iwuoye e ndiko mar Jo-Filipi 4:6, 7. Kue ma Nyasaye chiwono nomiyo wabedo gi chir mar lero geno ma wan-go mar chier ne jolendo mag redio gi TV kod jo gaset. Kata obedo ni wuodwa notho e aksident mar ndege, pod waparoga gik mabeyo ma ne wajotimo kode e kinde ma pod nongima. Watemo ahinya mondo waket pachwa kuom gik mabeyogo.”

“Ka ne Joneno wetewa onyisowa ni ne ginenowa e TV ka walero yiewa ka wan gi chir, ne wanyisogi ni lamo ma ne gilamonwago e ma ne konyowa. An gadier chuth ni Jehova ne sirowa kokalo kuom weche ma ne gihoyowago.”

Mana kaka ranyisi ma wasenonogo nyiso, Nyasaye nyalo chiwo hoch ne ji ma nigi chandruoge mopogore opogore. To nade in? Bed king’eyo ni kata irom gi chandruok ma chalo nade, inyalo yudo hoch ma nyalo konyi nyagori gi chandruogego.c Donge nyalo bedo maber kikwayo Jehova mondo okonyi? En e “Nyasach hoch duto.”​—2 Jo-Korintho 1:3.